Mbaʼépa oikóta jaʼu rasáramo vevída?

ALANa ningo 11 áño orekópe oñepyrũma hoʼu la vevída. Haʼe oñembyatymivaʼerã iñamigokuéra ndive kaʼaguýpe ohuga hag̃ua. Ohaʼanga hikuái umi pelikulapeguápe, ha ndahaʼéi guaʼu guaʼúnte omokõva, hoʼuete voi hikuái la vevída.

Tony katu orekórõ guare 40 áño oñepyrũ hoʼu rasa vevída. Ñepyrũrã hoʼu peteĩ térã mokõi vásonte pyharekue, upéi cinco térã seísma ha amo ipahápe katu ni ndoikuaavéima mboýpa hoʼu káda día.

Alan oñehaʼã opoi la vevídagui, péro Tony ndoikuaaséi mbaʼeve ha ndoipotái voi oipytyvõ chupe ifamília ha iñamigokuéra opoi hag̃ua. Mbaʼépa oiko chuguikuéra? Alan oikove gueteri omombeʼu hag̃ua hembiasakue, péro Tony ramointénte omano peteĩ aksidéntepe omaneha haguére kaʼu reheve.

Hetáko oĩ heʼíva avavépe ndoperhudikaiha omokõramo haʼeño, péro umíva tuicha ojavy. Umichagua ningo ombohasa asy hína umi ijerére oĩvape ha hetave provléma ikatu ogueru chupe la vevíva.b Pyʼỹinte umi okaʼúva ijarhél ha oporonupã, oporojuka, ochoka térã oñaksidenta itravahohápe. Hétape avei ojagarra mbaʼasy vai upevakuére. Ha ndahaʼéi upéva añónte, hetaiterei pláta ningo oñemombohína vevídare, ha ivaiveha katu pe ikaʼúva hetaiterei iprovléma ha ombohasa asy hogayguápe entéro.

Péro umi Institutos Nacionales de la Salud de Estados Unidos heʼi: “Ndahaʼéi ningo umi omokõ pyʼỹiva ikaʼúmava, péro umi ikaʼúva ndahaʼéi avei katuete káda día omokõva”. Heta tapicha ningo ndahaʼéi ikaʼúva, péro oimoʼãʼỹre oñepyrũma omokõ rasa. Oĩ katu sapyʼapyʼánte omokõva, péro omokõ jave una votélla guivémante hoʼu.

Upévare, mbaʼéichapa ikatu jaikuaa jaʼu rasamapañaína? Ha mbaʼéichapa ikatu jaikuaa jajejokomavaʼerãha? (Proverbios 23:​29, 30, 35). Umi artíkulo oúva ñanepytyvõta jaikuaa hag̃ua upéva.

[Nóta]