‘Hembiapokuéra oho hendive’
ÑANE ermáno Theodore Jaracz oĩvaʼekue Cuerpo Gobernante de los testigos de Jehovápe. Omohuʼã hembiapo ko yvy ape ári miércoles 9 de junio de 2010. Haʼe orekovaʼekue 84 áño. Opyta hembireko Melita, peteĩ iñermána, peteĩ isovríno ha mokõi isovrína.
Ermáno Jaracz onasevaʼekue 28 de septiembre de 1925 táva Pike County, Kentucky, Estados Unídospe. Ojevautisa 10 de agosto de 1941 orekórõ guare 15 áño. Upe rire 2 áño haguépe oiko chugui prekursór regular. Upe guive ermáno Jaracz oiporupaite itiémpo Jehová servísiope ha ojapo upéva 67 áño pukukue rupi.
Áño 1946-pe oho Escuela Bíblica de Galaádpe, orekópe 20 áño. Upégui oñemondo chupe Cleveland, Ohio, Estados Unídospe oservi hag̃ua superintendénteramo. Upéi 1951-pe ermáno Jaracz oho Austráliape ombaʼapo siérvo de sukursálramo Betélpe. Pe Anuario de los testigos de Jehová para 1983 omombeʼu mbaʼéichapa haʼe oporopytyvõvaʼekue. Heʼi péicha: “Haʼe ohayhueterei Jehovápe ha ombaʼapo kyreʼỹ oñemoherakuã hag̃ua pe marandu porã, ha upéva tuicha omombarete umi ermáno jerovia”.
Upéi ningo ou jey Estados Unídospe ha 10 de diciembre de 1956 omenda Melita Lasko rehe. Omenda rire oñepyrũ oservi superintendénteramo ha hembirekóndi oviaha mombyrymbyry kyreʼỹme oñatende hag̃ua umi sirkuíto ha distríto. Upéi opapotávo áño 1974 oñeinvita chupe ou hag̃ua ombaʼapo Cuerpo Gobernántepe.
Hasy ñanderesarái hag̃ua mbaʼéichapa ko ermáno oñemeʼẽmbaitevaʼekue Jehová servísiope. Haʼe ohayhueterei hembirekópe ha akóinte oñangareko porã hese; ha avei omotenonde meme hapichakuéra oikotevẽva oiko rangue opensa ijehénte (1 Cor. 13:4, 5). Ermáno Jaracz oipotavaʼekue ojetrata porã enterovépe peteĩchante. Ha ohayhueterei rupi hapichakuérape kyreʼỹme opredikavaʼekue pe marandu porã.
Añetehápe ñambyasyeterei oho haguére ñandehegui ko ermáno iguapoite ha jahayhuetéva. Péro ñandepyʼarory ñanemanduʼávo mbaʼeichaitépa ojerovia mbarete Jehováre hetaite áñore. Haʼe ‘ijeroviaha omanoite peve’ ha oñemeʼẽma chupe ‘jopóiramo pe jeikove’ (Rev. 2:10). Katuete umi ‘hembiapokuéra oho hendive’ (Rev. 14:13).