“Ohundínepa yvyporakuéra ko yvy?”

● Yvága guive ojehecha mbaʼeichaitépa iporã ko yvy, hovy ha morotĩ asy. Péro jaikóvo pype, jahechakuaa mbaʼeichaitémapa oñembyai. Mbaʼérepa oiko upéva? Yvyporakuéra noñangarekóigui hese: Omongyʼa, oitypa kaʼaguy ha oiporu vai umi mbaʼe ko yvy omeʼẽva. Péro ndahaʼéi ko yvy añónte oñembyaíva, síno umi hénte oikóva ipype hekovai, iñaña, ojahéi hapicháre, oporojuka ha oñemomombyry Ñandejáragui.

Ojapóma dos mil áño rupi la Biblia heʼi hague oikotaha koʼã mbaʼe (2 Timoteo 3:1-5; Revelación [Apocalipsis] 11:18). Avei heʼi Ñandejára añoite omyatyrõtaha opa mbaʼe vai, ndahaʼéi yvypóra. Testígo de Jehová ojapóta peteĩ aty guasu tres diagua hérava ‘Tou ne Rréino’, ha upépe oñehesaʼỹijóta peteĩ diskúrso rupive ko téma: “Ohundínepa yvyporakuéra ko yvy?”. Koʼãichagua aty guasu oñepyrũma Estados Unídospe mayo guive ha osegíta ojejapopa peve ko yvy tuichakuére.

Roipotaite ningo rehomi hiʼag̃uivehápe ndéve. Reikuaasevéramo ambue mbaʼe ko aty oikótavagui, ikatu reporandu peteĩ testígo de Jehovápe térã ehecha Internétpe www.jw.org. Upépe rejuhúta moõ moõpa ojejapóta.