¿Mbaʼérepa Ñandejára omandavaʼekue umi isrraelítape ani hag̃ua omenda umi ndoservírivare chupe?

▪ Ñandejára omeʼẽvaʼekue ko mandáto ipuévlo Israélpe: “Ani pemenda [umi kuña tetã ambueguáre]. Térã peheja pende rajy térã pende raʼy omenda hesekuéra” (Deuteronomio 7:3, 4). ¿Mbaʼérepa Ñandejára oproivi chuguikuéra ko mbaʼe?

Primero, Jehová oikuaa porã Satanás ojapotaha ikatúva entéro pe tetã Israel omombaʼeguasu hag̃ua umi ñandejára guaʼúpe. Jehová heʼi porã isiervokuéra omendáramo umi ndahaʼéivare hetãygua omboyketaha chupekuéra hapégui ha oservitaha umi ñandejára guaʼúpe. Oĩ heta mbaʼe iñimportánteva ohechakuaavaʼerã hikuái. Pór ehémplo, naiñeʼẽrendúiramo ko mbaʼépe, Jehová noĩmoʼãvéima hendivekuéra, ha upépe ndahasyietéta umi iñenemígo ipuʼaka hag̃ua hesekuéra. Ha upéicha oikórire, hasýta ou hag̃ua Israel rupive pe Mesías oñeprometevaʼekue. Jahechakuaa mbaʼérepa Satanás oñehaʼãmbaite omomýi umi isrraelítape omenda hag̃ua umi ndoservírivare Jehovápe.

Segundo, Ñandejára ojepyʼapyvaʼekue peteĩteĩ umi Israelguáre. Haʼe oikuaa porã, peteĩ tapicha ovyʼa ha oiko porã hag̃ua, tekotevẽha oĩ porã hendive. Ñandejára ningo oikuaa mbaʼépa ikatu oiko peteĩ isiérvo omendáramo peteĩ ndoservírivare chupe, ¿oĩ porãpa raʼe ojepyʼapy upévare? Epensamína oikovaʼekuére rréi Salomón rehe. Haʼe oikuaa porã vaʼekue mbaʼépa oguerúta chupe omendáramo umi ndoservírivare Jehovápe, Ñandejára heʼi chupekuéra: ‘Katuete omboykevaʼerã pene korasõ ijarakuéra rapykuéri’. Péro Salomón ojeroviaiterei ijehe iñarandu haguére ha oimoʼã ndoikomoʼãiha hese upéva. Upéicha rupi, oiko nohenduirõguáicha Jehová heʼíva. ¿Mbaʼépa oiko hese? Mbeguekatúpe hembirekokuéra “omombia chupe Ñandejára rapégui” omombaʼeguasu hag̃ua umi ñandejára guaʼúpe. ¡Ajépa ñambyasyete Salomón rehe oikovaʼekue! Jehová ndoguerohoryvéi chupe ha naiñeʼẽrendúigui pe goviérno ojedividi (1 Reyes 11:2-4, 9-13, ÑÑB).

Ikatu oĩ heʼíva naenterói osẽ vaiha Salomón rehe oiko haguéicha. Pór ehémplo, Mahlón omendavaʼekue Rut rehe, peteĩ Moabgua ndoservíriva Jehovápe. Péro tiémpo rire Rut ou oservi Ñandejárape. Añetehápe peteĩ Israelgua ikatuvaʼekue osẽ vai omendárõ peteĩ Moabguáre. Upévare la Biblia nomoporãiete Mahlón ojapovaʼekue. Haʼe omano imitã reheve, ikatu voi Rut oservi mboyve Jehovápe. Iñermáno Kilión katu omenda Orpá rehe, haʼe ningo peteĩ kuña Moabgua avei, péro haʼe ndohejaivaʼekue “ijarakuérape”. Upéi heta áño Rut oservi rire Jehovápe, Boaz ou omenda hese, ha umi hudío ohenoivaʼekue Rútpe “Ñandejára rembiguái ijojahaʼỹva”. Rut ha Boaz ombojoaju rupi hekove ohupytyvaʼekue heta mbaʼe porã (Rut 1:4, 5, 15-17, ÑÑB; 4:13-17).

Jaikuaa rire Mahlón ha Rut rembiasakue, ¿ikatúpa jaʼe ndoserviriha pe mandáto Jehová omeʼẽvaʼekue? Ñapensáramo upéicha, haʼetéta jaiporúva ehémploramo peteĩ tapichápe oganavaʼekue lotería, jaʼe hag̃ua ikatunteha jahuga umi lotería ñañemantene hag̃ua. Péro upéva ndeʼiséi osẽ porãtaha avei ñandéve.

La Biblia heʼi umi kristiánope omenda hag̃ua umi oservívare añoite Jehovápe. Ha ohechauka porã chupekuéra ani hag̃ua “oñemoĩ peteĩ júgo guýpe umi ojeroviaʼỹva ndive”. Koʼã konsého ojehai umi kristiáno omendasévape g̃uarã. Péro umi omendámavape peteĩ ndoservírivare Jehovápe, la Biblia omeʼẽ heta konsého oipytyvõtava chupekuéra oiko porã hag̃ua hogapýpe ijetuʼúramo jepe (1 Corintios 7:12-16, 39; 2 Corintios 6:14, NM). Koʼã konsého ohechauka Jehová, pe omoñepyrũvaʼekue ñemenda oipotaha isiervokuéra ovyʼa, tahaʼe soltéro térã omendáva.