KO RREVÍSTAPE OÑEANALISA | ¿MÁVAPA UMI TESTÍGO DE JEHOVÁ?
¿Mbaʼeichagua persónapa ore?
Ore organisasión ndojeheʼái ótro rrelihiónre ha ombaʼapo opárupi ko yvy ape ári. Ore ofisína sentrál oĩ Estados Unídospe, péro la majoría roiko diferénte paíspe. Roime amo 8 millónrupi, ha ropredika mas de 230 país ha territóriope. Péicha rokumpli Jesús heʼi vaʼekue: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi” (Mateo 24:14).
Tahaʼe haʼéva pe lugár roikoha, roñehaʼã rorrespeta ha rokumpli umi léi upe paispegua, péro noroñentremetéi polítikape. ¿Mbaʼérepa? Jesús ningo heʼi vaʼekue idisipulokuérape: “Peẽ ndapejeheʼái ko múndore”. Upévare ore ndoropartisipái umi téma polítikope ni ndoroapojái umi gérra (Juan 15:19; 17:16). Ha rojapo upéva sapyʼánte rojapeligráramo jepe. Por ehémplo, oikórõ guare pe segunda gérra mundiál, hetápe oñenkarsela, ojetortura ha algúnope katu ojejuka voi ndopartisipái haguére pe gérrape. Peteĩ karai Alemaniagua haʼe vaʼekue paʼi oskrivi: “Oreko hikuái derécho heʼívo haʼeha pe úniko grúpo tuichamíva ndoapojáiva pe gérra [umi nazi ogovernaha tiémpope Alemania]”.
“[Umi testígo de Jehová] odefende pe ogueroviáva toiko la oikóva. Ha ikatúta voi ñamoĩ chupekuéra umi puésto iñimportantevévape pe goviérnope, pórke omombaʼeterei hikuái hapichakuérape. Péro haʼekuéra ndoaseptamoʼãi upéva [...]. Orrespetáramo jepe pe autorida orekóva umi goviérno, haʼekuéra oguerovia Ñandejára Rréino añoite ikatutaha osolusiona umi provléma oĩva ko múndope.” (Diário Nová Svoboda, República Checa)
Péro upéva ndeʼiséi roñemomombyryha ore rapichakuéragui. Peteĩ vuéltape, Jesús oñemboʼérõ guare Ñandejárape heʼi: “Ndajeruréi ndéve renohẽ hag̃ua chupekuéra ko múndogui” (Juan 17:15). Upévare, ore rombaʼapo, rombaʼejogua ha roho eskuélape, ojapoháicha umi ótro hénte.