Prográma pyahu ñande día espesiál de asambléape g̃uarã
Ñande resa ojejapo porãiterei vaʼekue (Sal. 139:14). Upéicharõ jepe, peteĩ mbaʼérente ikatu jajesareko. Upéva upéicha umi mbaʼe jahecha añetévape ha umi jahecháva espiritualméntepe avei. Upe jahecháva espiritualménte hesakã porã hag̃ua ñandéve, jajesarekovaʼerã pe Ñandejára oipotávare. Koʼág̃a ko múndo Satanás ogovernáva hetaitereive mbaʼe omoĩ ñane renondépe jajesareko hag̃ua, ha upévare iporãta ñande día espesiál de asambléa téma: “Toĩ porã memékena ñande resa” (Mat. 6:22).
Mbaʼépa ikatu jajapo Jehová omeʼẽ hag̃ua ñandéve heta mbaʼe porã? (Pro. 10:22). Oñemombeʼu hag̃ua ñandéve upéva oñemeʼẽta peteĩ diskúrso hérava “Emonoʼõ heta mbaʼe porã nde resa oĩ porã haguére”. Oĩta entrevísta ohechaukáva umi mbaʼe porã ikatúva jahupyty jaiporúramo umi prinsípio oguerekóva Ñandejára Ñeʼẽ. Pe primer diskúrso omeʼẽtava pe ermáno visitánte héra “Ñañehaʼã ñande resa oĩ porã meme ko múndo vai jahasávape”, ha ohechaukáta mbaʼe mbaʼépa ikatu ojapo vai ñanderehe ha ñandejoko ani hag̃ua ñapuʼã espiritualménte. Jaikuaáta avei mbaʼépa heʼise pe ‘mbaʼe iporãva’ ikatúva jaiporavo (Luc. 10:42).
Mbaʼéichapa ikatu tuvakuéra, ha oimeraẽva, omokyreʼỹ mitãrusukuérape ojesareko hag̃ua umi mbaʼe espirituál rehe? Umi diskúrso hérava “Tuvakuéra opoi porãva iflechakuéra” ha “Mitãrusukuéra ombaʼapóva ohupyty hag̃ua umi mbaʼe espirituál”, oguerekóta avei tuvakuéra ha mitãrusukuéra oñeʼẽva koʼã mbaʼe iñimportántevare (Sal. 127:4). Opakuévo pe asambléa, pe ermáno visitánte omeʼẽta peteĩ diskúrso ohechaukátava mbaʼéichapa ikatu jaha tenonderãme Jehová organisasión ndive, peteĩteĩ, ñande rogaygua ndive ha ñane kongregasión ndive.
Ndaʼaréiramo jaikuaahague pe añeteguáva, térã jaservímaramo heta áño Jehovápe, ‘toĩ porã memékena ñande resa’. Ko prográma ñande día espesiál de asambleapegua ñanepytyvõta upéicha jajapo hag̃ua.