Japredika ñañeʼẽʼỹre
1 Heʼiʼỹre mbaʼeve, umi mbaʼe Jehová ojapovaʼekue omombeʼu umi kualida jahechaʼỹva Haʼe oguerekóva (Sal. 19:1-3; Rom. 1:20). Upeichaite, ñande reko porã, umi kualida kristiána ha pe ñañemondeháicha opredika oñeʼẽʼỹre (1 Ped. 2:12; 3:1-4). Ñañehaʼãvaʼerã opavavete, ñande reko porã rupi ‘ñamomorã opa mbaʼépe pe omboʼéva ñande Salvadór, Ñandejára’ (Tito 2:10).
2 Mbaʼéichapa ikatu ñande, umáno imperfékto, ñamoporãve umi mbaʼe omboʼéva Ñandejára Ñeʼẽ? Jahejáramo Ñandejára Ñeʼẽ ohechauka ñandéve ñande raperã ha ñanepytyvõramo pe espíritu sánto añoite ikatúta (Sal. 119:105; 143:10). “Ñandejára ñeʼẽ oikove, ha ipuʼaka, ha haimbeve peteĩ espáda haimbe jováivagui” (Heb. 4:12). Oike pypuku ñande pype ha ñanepytyvõ ñamonde hag̃ua pe teko pyahu (Col. 3:9, 10). Pe espíritu sánto omoheñói ñande pype umi kualida ojeguerohorýva. Umíva apytépe oĩ mbaʼeporã, pyʼaporã, teko pochyʼỹ, ha jejokokuaa (Gál. 5:22, 23). Opavavetépa jahejañaína Ñandejára Ñeʼẽ ha ijespíritu ombaʼapo ñande rekovépe? (Efe. 4:30; 1 Tes. 2:13.)
3 Ñande rapichakuéra ohecha pe jajapóva. Jaikóramo Jehová Ñeʼẽme heʼiháicha, ha ñañehaʼãramo jaiporu umi kualida ñande Apohare oguerekóva, ñande rapichakuéra ohechakuaa ñanderehe. Por ehémplo, peteĩ kuimbaʼére hapichakuéra oñembohory jepi ikarapehaguére. Péro peteĩ ermána ombaʼapóva hendivekuéra orrespeta ha omombaʼe chupe hendápe porã. Upéva omomýi pe kuimbaʼépe ha oporandu ñane ermánape mbaʼérepa haʼe ndahaʼéi umi ótroicha. Pe ermána omombeʼu chupe irrespetuosaha oiporuhaguére umi prinsípio oĩva Ñandejára Ñeʼẽme. Omombeʼu chupe avei oĩha peteĩ esperánsa iporãitereíva, umi mbaʼe Ñandejára Rréino ojapótava. Pe kuimbaʼe oñepyrũ ostudia la Biblia, oñakãrapuʼã, ha upéi ojevautisa. Oho jey rire hetãme, ihentekuéra ohecharamoiterei heko porãha upévare ijapyteguikuéra oĩ koʼág̃a oservímava avei Jehovápe.[1]
4 Ñambaʼapohápe, mboʼehaópe, ñañemongetávo ñane hentekuéra térã ñane vesinokuéra ndive, tovékena ñande reko porã, upe japredikáva ndive toipytyvõ hetavépe omombaʼeguasu hag̃ua Ñandejárape (Mat. 5:16).