Jahechauka jajepyʼapyha ñande rapicháre: Ñandepyʼaporã rupive
1 Imanduʼávo pe oikuaa ypýrõ guare peteĩ Testigo de Jehovápe, peteĩ kuñakarai opensa vai vaʼekue Testigokuérare, heʼi: “Che nachemanduʼái mbaʼe témarepa roñemongeta, péro chemanduʼa porã mbaʼéichapa haʼe hory chendive, ha mbaʼéichapa imbaʼeporã ha iñumílde. Añetehápe añepyrũ ahayhu chupe. Koʼág̃a peve amombaʼeterei ore amista”. Upéva ohechauka mbaʼéichapa iñimportánte jajepyʼapy añete ñande rapicháre japredika vove (Fili. 2:4).
2 Pe oporohayhúva ipyʼaporã. Jahechauka jahayhuha ñande rapichápe ñandepyʼaporãramo hendive (1 Cor. 13:4). Pe ipyʼaporãva ojepyʼapy hapichakuérare ha oheka mbaʼépa ojapóta oporopytyvõ hag̃ua. Pe predikasión jajapóva katuetei ohechauka ñandepyʼaporãha ñande rapichakuéra ndive. Péro jajepyʼapy añetéramo ndahaʼéi japredikátanteva chupekuéra. Umi mbaʼe jajapóva —mbaʼéichapa ñanderory, ñanderekoporã, ñaporohendukuaa, pe jaʼéva ha mbaʼéichapa jaʼe, ha mbaʼéichapa ñamaʼẽ jepe ñande rapicháre— ohechauka jajepyʼapyha hesekuéra (Mat. 8:2, 3).
3 Jahayhúramo ñande rapichápe ñamýita ha ñañekuaveʼẽta ñaporopytyvõ hag̃ua ikatuháicha. Opredika aja ogaha rupi, peteĩ kuñakarai iviúdava pyaʼe omosẽ peteĩ ermáno precursórpe oikuaávo haʼeha Testigo de Jehová. Heʼi pe ermánope ojupihaguehína peteĩ eskalérape ikosináme okambia hag̃ua peteĩ fóko ohendúvo ipu pe tímbre. “Péro ipeligrósota ningo rejapóramo upéva neaño”, heʼi pe ermáno. Upémaramo pe kuñakarai heʼi chupe oike hag̃ua. Pe ermáno okambia chupe pe fóko ha upéi osẽ pe ógagui. Upe riremínte pe kuñakarai memby kuimbaʼe, oúvo ohecha hag̃ua isýpe, ohendu pe oikovaʼekue. Haʼe ohecharamoiterei upéva ha oheka pe ermánope oagradese hag̃ua chupe. Pe kuimbaʼe oñemongeta kyreʼỹ pe ermáno ndive ha upe rire oñepyrũ ostudia la Biblia.
4 Ñandepyʼaporãramo, jahechaukañaína Ñandejára mborayhu ñande rapichakuérare ha ñamomorã pe marandu porã. Upévare, ‘jahechauka memékena Ñandejára rembiguaiha, ñandepyʼaporã rupive’ (2 Cor. 6:4, 6).