Mitãrusu ha mitãkuña ohesapéva ko yvy ári
1. Mbaʼéichapa la Biblia ohechauka ojehecha porãtaha kristianokuéra idiferenteha, ha mbaʼérepa ikatu jaʼe upeichaha heta mitãrusu ha mitãkuña koʼag̃agua?
1 Jesús heʼi hemimboʼekuérape: “Peẽko tesapeha ko yvy ári” (Mat. 5:14, 16 Versión Popular). Peteĩ táva oñemopuʼãva ijyvatehápe omimbi pe kuarahy ohesape jave. Upéicha avei ojehechavaʼerã Jesús disipulokuéra idiferenteha. Koʼág̃a oĩ heta mitãrusu ha mitãkuña “omimbíva ko múndope estrellakuéraicha”, heko porã ha ipredikasión rupive (Fili. 2:15 [VP]; Mal. 3:18).
2. Mbaʼeichahápepa nde ikatu repredika ne mboʼehárape ha ne irũnguérape avei?
2 Eskuélape. Mbaʼéichapa ikatu repredika nde eskuélape? Oĩ umi mitãrusu opredikáva iklásepe oñeñeʼẽ jave dróga, evolusión, vevída, ha umichagua mbaʼére. Peteĩ ermánape ojejerure oskrivi hag̃ua terrorísmogui, ha upe ohaívape omoĩ avei Ñandejára Goviérno añoite haʼeha pe esperánsa iporãvéva yvypórape g̃uarã. Imboʼehára ohecha iporãitereiha pe oskrivíva, ojekuaaha opensa porã hague, ha upéva rire pe ermána ikatu opredikave.
3. Mbaʼéichapa ikatu rehesape nde eskuélape nde reko porãramo?
3 Ikatu avei jahesape ñande reko porã ha ñañemonde porã rupive (1 Cor. 4:9; 1 Tim. 2:9). Ne irũnguéra ha ne mboʼeharakuéra ohecháramo pe remondéva ha pe reikoháicha idiferenteha, ikatu oikuaaseve Ñandejára Ñeʼẽgui (1 Ped. 2:12; 3:1, 2). Ndikatúi jaʼe ndahasyiha ñande reko marangatu hag̃ua, péro Jehová tuicha nevendesíta upéicha rejapóramo (1 Ped. 3:16, 17; 4:14). Ikatu hag̃uáicha oĩ umi oñeʼẽséva nendive pe marandu porãgui, pepytuʼu aja releekuaa peteĩ lívro térã rrevísta oñeʼẽva la Bíbliagui, térã rehejakuaa pe ojehechatahápe.
4. Mbaʼéichapa ikatu nepytyvõ repredikáramo nde eskuélape?
4 Rehesapéramo nde eskuélape, nde jerovia imbaretevéta ha revyʼáta ne irũnguéra oikuaáramo reserviha Jehovápe (Jer. 9:24). Upéva ikatu avei oñangareko nderehe. Peteĩ ermána heʼi: “Añeʼẽhaguére che irũnguérape, haʼekuéra ndachejopýi ajapo hag̃ua umi mbaʼe Ñandejára Ñeʼẽ heʼíva oĩ vaiha”.
5. a) Mbaʼéichapa oĩ umi mitãrusu oñehaʼãva ojapo hetave predikasionhápe? b) Mbaʼe mbaʼépa nde rehupytysereína Jehová servísiope?
5 Ikatu jajapo hetave. Oĩ heta mitãrusu ha mitãkuña oñehaʼãva ojapo hetave predikasionhápe ikatu hag̃uáicha ohesapeve. Ostudiapa rire pe bachiller, peteĩ ermáno ova opredika hag̃ua oñekotevẽhápe. Oho peteĩ kongregasión michĩmívape, oĩháme peteĩ ansiánonte. “Neʼĩrava avyʼa upeichaite”, oskrivi peteĩ iñirũme. “Ápe javyʼaiterei predikasionhápe! Roñeʼẽ 20 minúto rupi káda ógape. Umi óga jarakuéra ohendupase pe erétava chupekuéra”. Upéi heʼi: “Hiʼã chéve káda mitãrusu ojapo ko che ajapóva ha enterove oñandu ko che añandúva. Jaiporupaitéramo pe jaguerekóva jaservi hag̃ua Jehovápe jajapoñaína pe iporãvéva”.
6. Mbaʼépa nde reguerohoryve umi mitãrusu ha mitãkuña ne kongregasiónpe oĩvagui?
6 Mbaʼeichaitépa rovyʼa pendereheve, peẽ mitãrusu ha mitãkuña, pehesapevapeína ko yvy ape ári (1 Tes. 2:20). Reiporupaitéramo Jehová servísiope ne korasõ, ne álma, ne apytuʼũ, ha ne mbaretekue, remonoʼõta “cien vése koʼág̃a ko tiémpo kóvape voi... ha koʼágui rire katu pe tekovete opaʼỹva” (Mar. 10:29, 30; 12:30).