‘Peju meme che rapykuéri’
1 Oĩ heta tapicha oikóva ojapo hag̃ua umi mbaʼe chupekuéra ombovyʼátavante. Upéicharõ jepe umíva ndovyʼái jepi. Jesús katu oipota jajepyʼapy ñande rapicháre, ikatu hag̃uáicha javyʼa añetehápe (Hech. 20:35). Haʼe heʼi: “Ouséva guive che rapykuéri, tahesarái ijehegui [...] ha tou che rapykuéri” (Mar. 8:34, JMP). Upéva jahupyty hag̃ua sapyʼánte ndaikatúi jajapo opa mbaʼe jajaposéva, síno ñaikotevẽve upévagui. Jaikovaʼerã káda día jajapo hag̃ua Jehová oipotáva. Ndajaikoivaʼerã ñandejupe g̃uarãnte (Rom. 14:8; 15:3).
2 Pe apóstol Pablo omoĩ ñandéve peteĩ ehémplo. Haʼe heʼi ‘tuichaite mbaʼeha pe Cristo Jesúspe oikuaahague’, ha upévare ohejapa pe ohupytysevaʼekue ijupe g̃uarã ha oñepyrũ ombaʼapo ipyʼaite guive Ñandejára Rréinope g̃uarã (Fili. 3:7, 8, JMP). Haʼe heʼi: “Che, che pyʼaite guive ameʼẽta opa arekóva ha añemeʼẽ jey jeýta pende rehehápe” (2 Cor. 12:15). Upévare iporã enterove ñañeporandu: “Mbaʼépepa aiporuʼaína che tiémpo, mbarete, katupyry ha oimeraẽ mbaʼe aguerekóva? Añemotenondépa chejupe, térãpa añehaʼã ajapo Jehová oipotáva?”
3 Mbaʼéichapa ikatu ñameʼẽ ñandejehegui. Ñandejára puévlo hetaiterei ombaʼapo hapichakuéra rehehápe. Káda áño opredika hetave mil millones de óragui. Enterove oĩva kongregasiónpe, mitã térã kakuaa, ojapo heta mbaʼe hapichakuéra rehehápe. Heta oñembaʼapo ojejapo hag̃ua umi asambléa de sirkuíto ha distríto, oñemopuʼã ha oñemyatyrõ hag̃ua umi Salón del Reino ha umi óga ojeporúva oñemotenonde hag̃ua pe adorasión añeteguáva. Oĩ avei umi ermáno mborayhúpe ombaʼapóva umi Comité de Enlace con los Hospitales-pe, ha oĩ umi Grúpo Ovisitáva Hasývape. Opavavete ermánope ou porã koʼã tembiapo mborayhúpe ojejapóva (Sal. 110:3).
4 Oiko vove peteĩ desástre térã jejopy vai oĩ avei umi mbaʼe ikatúva jajapo ñande rapichakuéra rehehápe. Péro pyʼỹinte ikatu ñaporopytyvõ térã ñaporomokyreʼỹ jahechakuaáramo mbaʼépa oikotevẽ ñane ermanokuéra (Pro. 17:17). Ñañekuaveʼẽramo kyreʼỹme ñaipytyvõ hag̃ua ñande rapichakuérape ha ñambaʼapo hag̃ua Ñandejára Rréinore, jajapoñaína Jesús ojapohaguéicha (Fili. 2:5-8). Upévare, jajapo memékena umichagua tembiapo.