‘Ñandejára ovyʼa’, javyʼákena haʼéicha
1 Jehová añetehápe oipota javyʼa. Iñeʼẽ ñanemokyreʼỹ omombeʼúvo umi mbaʼe porãita Haʼe omeʼẽtava yvyporakuérape (Isa. 65:21-25). Upévare ojekuaavaʼerã ñanderehe javyʼaha ñamombeʼúvo ‘Ñandejára ovyʼáva marandu porã’ (1 Tim. 1:11, NM). Ñañeʼẽ jave Jehová Rréinore ojekuaavaʼerã jahayhuha pe añetegua ha jajepyʼapyha ñande rapicháre (Rom. 1:14-16).
2 Jaikuaáningo heta vése hasyha javyʼa hag̃ua. Ikatu ndahetái umi oñatende porãva japredika jave peteĩ territóriope, térã ñande voi ñane provléma heta. Javyʼa hag̃ua péicha jave, jajepyʼamongetavaʼerã jahecha hag̃ua mbaʼeichaitépa anga oikotevẽ umi hénte ohendu ha ontende Ñandejára Rréino marandu porã (Rom. 10:13, 14, 17). Upéicha jajapóramo javyʼa meméta jaikuaaukávo mbaʼépa Jehová, iporiahuverekógui, omeʼẽ jajesalva hag̃ua.
3 Ñañeʼẽ umi mbaʼe iporãvare. Iporã avei ñañatende pe jaʼévare. Ñañepyrũ hag̃ua ñañemongeta ikatu ñamombeʼu peteĩ provléma téra notísia opavavépe oipyʼapýva. Péro ndovaléi ñañeʼẽterei umi mbaʼe ivaívare. Ñande ningo “ñeʼẽ porã reruha” (Isa. 52:7; Rom. 10:15). Ñamombeʼuñaína Ñandejára oprometehague peteĩ tenonderã iporãitereíva (2 Ped. 3:13). Upévare jaiporuvaʼerã umi téysto iporãva ‘ñambopyʼaguapy hag̃ua ojepyʼapývape’ (Isa. 61:1, 2). Upéicharamo opavave javyʼa meméta ha upéva ojekuaáta ñanderehe.
4 Tapichakuéra katuete ohechakuaáta ñandepyʼarorýramo japredika jave. Upévare, Jehová ovyʼaháicha, javyʼákena ñande avei japredika jave pe marandu porã ñande territóriope.