Aníkena reheja pe mborayhu rerekovaʼekue iñepyrũrã
1 Síglo primérope, Jesús heʼi pe kongregasión Efesoyguápe: “Oime jepe areko haʼevaʼerã nderehe: ndererekovéima pe mborayhu rerekovaʼekue iñepyrũrã” (Rev. 2:4). Amalisia heta oĩvaʼekue ohejáva pe mborayhu orekovaʼekue iñepyrũrã Jehová rehe. Ñande katu, jaikuaa ypýrõ guare pe añetegua Ñandejára Ñeʼẽgui, jahayhuetereive Ñandejárape ha ñande rapichakuérape avei. Upéva ñanemomyivaʼekue ñasẽ hag̃ua kyreʼỹme ñamombeʼu pe esperánsa iporãitéva oĩva ñandéve g̃uarã. Mbaʼépa ñanepytyvõta ani hag̃ua jaheja pe mborayhu jarekovaʼekue iñepyrũrã ha ani hag̃ua ñanekangy japredika hag̃ua?
2 Jastudia Ñandejára Ñeʼẽ ñaneañohápe ha jaha rreunionhápe. Mbaʼéicha rupípa jahayhuve Ñandejárape ha ñande rapichakuérape avei jaikuaa rire pe añetegua? Ndahaʼéi piko jaikuaahaguére heta mbaʼe Jehovágui jastudia rupi Iñeʼẽ? (1 Juan 4:16, 19.) Upévare, ikatu hag̃uáicha ñane mborayhu ‘okakuaave ohóvo mbaʼekuaa ha arandúpe’, jaikuaavevaʼerã jahávo Ñandejára Ñeʼẽgui. ‘Jaipyguaravaʼerã umi mbaʼe ipypukuvéva’ (Fili. 1:9-11; 1 Cor. 2:10).
3 Koʼã ára pahápe ikatu hasy ñandéve jajepokuaa hag̃ua jastudia Ñandejára Ñeʼẽ, henyhẽgui umi vyʼarã ha umi mbaʼe ñandepyʼapýva (2 Tim. 3:1). Upéicharõ jepe ñamboykevaʼerã ñane tiémpo jaikuaave hag̃ua Ñandejárape. Iñimportanteterei avei jaha meme rreunionhápe, koʼýte koʼág̃a, jahechávo ‘hiʼag̃uimaha Ñandejára ára’ (Heb. 10:24, 25).
4 Ñane predikasión. Japredika kyreʼỹramo, ndoguemoʼãi pe mborayhu jarekovaʼekue Ñandejárare iñepyrũrã. Japredikávo pe marandu porã, ñande voi ñañemomanduʼa umi mbaʼe porãita Jehová oguerútavare, ha upéicha jajerovia mbareteve outaha umi mbaʼe ñahaʼarõva ha jahayhuve Jehovápe. Avei, ikatu hag̃uáicha ñamboʼe Ñandejára Ñeʼẽ ñande rapichápe, ñande voi ñañehaʼã ñantende porã ha upéicha jajerovia mbareteve Ñandejárare (1 Tim. 4:15, 16).
5 Jehovápe ñameʼẽvaʼerã opa mbaʼe, umíva apytépe ñane mborayhu (Rev. 4:11). Jahayhu memékena chupe. Ani jahejátei ikangy ñane mborayhu jarekovaʼekue ñepyrũrã. Upearã jastudia meme vaʼerã ñaneaño Ñandejára Ñeʼẽ, jaha meme vaʼerã rreunionhápe, ha ñamombeʼuvaʼerã kyreʼỹme ñande rapichakuérape umi mbaʼe ñane korasõ oguerohoryvéva (Rom. 10:10).