Ñaporopytyvõramo jahupyty heta mbaʼe porã Jehovágui
1. Mbaʼéichapa David ha Nehemías ohechauka oporopytyvõseha?
1 Goliat oñembohoryrõguare Israel ehérsitore, oimeraẽ soldádo ikatúkuri osẽ oñorairõ hendive. Péro peteĩ mitãrusu ovecha rerekua, ni noñensajáiva gueteri oñorairõ hag̃ua, oñekuaveʼẽ oñorairõ hag̃ua hendive (1 Sam. 17:32). Ou jeýrõ guare Jerusalénpe umi hudío ojererahavaʼekue esklávoramo, noñehaʼãivaʼekue omopuʼã jey hag̃ua pe murálla. Upémarõ peteĩ ofisiál oservíva víno pe rréi Persiayguápe omboyke pe hembiapo iñimportantetéva ha oho Jerusalénpe ikatu hag̃uáicha oñemopuʼã pe murálla (Neh. 2:5). Jehová ovendesi David ha Nehemíaspe ikyreʼỹhaguére oporopytyvõ hag̃ua (1 Sam. 17:45, 50; Neh. 6:15, 16).
2. Mbaʼérepa ñande kristiáno ñaporopytyvõvaʼerã?
2 Ko ‘ára paha’ jaikohápe noporopytyvõséivamante henyhẽ. Umi hénte oiko ‘ijupekuéra g̃uarã añónte’, naitiémpoi voi ótrope g̃uarã (2 Tim. 3:1, 2, BNP). Umi opensáva térã ojepyʼapýva ijehénte ni ndohechái voi pe hapicha oikotevẽ jave hese. Péro ñande kristiáno tee ndaupéichai. Jajapose uvei yma Jesús ojapohaguéicha. Haʼe nohaʼarõivaʼekue ojejerure raẽ chupe oporopytyvõ hag̃ua (Juan 5:5-9; 13:12-15; 1 Ped. 2:21). Upéicharõ, mbaʼéichapa ikatu jahechauka ñaporopytyvõseha, ha mbaʼépa jahupyty jajapóramo upéicha?
3. Ñaipytyvõséramo, mbaʼépa ikatu jajapo kongregasiónpe rreunión jave?
3 Ñane ermanokuéra rehehápe. ‘Ñaipytyvõitereiningo’ ñane ermanokuérape ñakomentáramo rreunionhápe ojejerure jave (Rom. 1:11). Ñakomenta jave ñamombaʼeguasuñaína Jehovápe. Upéicha avei oikeve ñane akã ha ñane korasõme pe añetegua jaikuaáva Ñandejáragui, ha javyʼaitereive rreunionhápe (Sal. 26:12). Ikatu sapyʼánte ndoúi peteĩ ipárteva pe Eskuéla dél Ministério Teokrátikope. Upéicha jave ikatu ñañekuaveʼẽ jajapo hag̃ua hekovia. Jajapóramo upéicha ñañembokatupyryvetañaína ñaporomboʼe hag̃ua.
4. Mbaʼéichapa ikatu avei jahechauka ñaporopytyvõseha?
4 Kuimbaʼekuéra ikatu ohechauka oporopytyvõseha oñehaʼãramo ombaʼapove kongregasiónpe (Isa. 32:2; 1 Tim. 3:1). Enterovénte ikatu ñaipytyvõ osẽ porãmba hag̃ua umi asambléa tahaʼe tuicháva térã michĩva, ñañekuaveʼẽramo ñaipytyvõ hag̃ua oñekotevẽhápe. Katuete ningo “ñañomokyreʼỹ” ñasẽramo vyʼápe japredika superintendénte de sirkuíto ndive térã ñainvitáramo chupe okaru hag̃ua ñanendive (Rom. 1:12, BNP). Javyʼaitereiningo ñaipytyvõ jave kongregasiónpe ñane ermáno hasývape ha umi mitã tyreʼỹme, umi viúdape térã umi ermána orekóva mitã michĩvape. Javyʼaitereiningo jajapóramo upéicha ha ñambovyʼa avei Jehovápe (Pro. 19:17; Hech. 20:35).
5. Mbaʼe ojejapo hag̃uápa oñekotevẽhína umi ikatúvare oipytyvõ?
5 Jaiporukuaa avei ñane tiémpo, ñamopotĩ térã ñamyatyrõ hag̃ua ñane Salón del Reino. Jahechaháicha, heta tapicha oĩ koʼág̃a ohendu ha omombaʼéva pe añetegua, ha upévare oñekotevẽventemahína ñanderehe oñemopuʼãve hag̃ua Salón ipyahúva. Peteĩ ermáno ha hembireko, ndoikuaáiramo jepe mbaʼéichapa oñemopuʼã peteĩ óga, oñekuaveʼẽ hikuái oipytyvõ hag̃ua pe Comite Regional de Construcción-pe. Upépentema oñemboʼe chupekuéra ha koʼág̃a g̃uarã ikatupyryetereíma hikuái. Pe ermána heʼi “Rombaʼapóvo péicha ore ermanokuéra ndive, koʼág̃a hetavéma ore amígo. Ha pe kaʼarúrõ g̃uarã ore kaneʼõramo jepe, orembareteverei espiritualménte”.
6. Mbaʼérepa jaʼe pe predikasión haʼeha pe tembiapo iñimportantevéva ikatuhápe ñaipytyvõ?
6 Japredika jave. Pe predikasión haʼe pe tembiapo iñimportantevéva ikatuhápe ñaipytyvõ. Ñaipytyvõramo ñande rapichápe ontende ha ojapo hag̃ua la Bíbliape heʼíva, oikuaáta maʼerãpa jaikove, ha ikyreʼỹvéta omboyke hag̃ua umi mbaʼe vai. Upéicha avei oikuaáta umi mbaʼe iporãitéva Ñandejára orekóva ñandéve g̃uarã tenonderã gotyo. Javyʼaitereiningo ñamboʼéramo ñande rapichápe Ñandejára Ñeʼẽ, ha heta mbaʼe porã jahupytýta opa árare ñande voi ha umi ñanerendúva (Juan 17:3; 1 Tim. 4:16). Ikatu jahechakuaa ñaimeha ñaipytyvõve hag̃uáicha ko tembiapópe, jajapo rupi pe precursorado auxiliar térã regular. Ikatu avei java oñekotevẽhápe térã ñaaprende ótro idióma.
7. Mbaʼérepa iñimportantete jahechauka koʼág̃a ñaporopytyvõseha?
7 Peteĩ profesíape David heʼivaʼekue pe Mesías oñepyrũ vove ogoverna, Jehová siervokuéra kyreʼỹme ‘oñekuaveʼẽtaha’ (Sal. 110:3, Salmokuéra, nóta, NM). Koʼág̃a Jehová ombyatypahína umi ipyʼaporãvape. Upévare hetaiterei mbaʼépe ikatu ñañekuaveʼẽ ñaipytyvõ hag̃ua (Isa. 60:22). Ndépa ere avei: “Ape aime. Chejokuái chéve”? (Isa. 6:8.) Katuete ñambovyʼañaína Jehovápe jahechaukáramo ñaporopytyvõseha, ha heta mbaʼe porã jahupyty upe haguére.