Umi imboriahúva ohaʼarõ heta mbaʼe porã
1 Jesús ojepyʼapy añete vaʼekue umi imboriahúvare. Haʼe omeʼẽvaʼekue hoʼuvaʼerã umi héntepe ha omonguera umi hasývape. Upéicharõ jepe, haʼe ojepyʼapyvevaʼekue ‘ohenduka hag̃ua umi imboriahúvape marandu porã’ (Mat. 11:5). Koʼág̃a rupi ñane predikasión oipytyvõ avei umi imboriahúvape, ha ambue tapichakuérape (Mat. 24:14; 28:19, 20).
2 Añetehápe heta mbaʼe porã ohaʼarõ chupekuéra. Oĩ tapichakuéra imboriahúramo jepe ipojeráva ijiglésiape g̃uarã. Omeʼẽ hikuái ipláta, umi rrelihión omoakãva heʼi rupi chupekuéra osẽ porãvetaha upéicha. Péro Ñandejára goviérno guýpe añoite ndaiporimoʼãvéima imboriahúva ha mbaʼeveichagua provléma. Ñandejára Ñeʼẽme voi heʼi upéicha (Sal. 9:18; 145:16; Isa. 65:21-23). Upéicharõ, jahechauka jave ñande rapichakuérape mbaʼépa añetehápe omboʼe la Biblia, jaikuaaukañaína chupekuéra ikatuha ohaʼarõ heta mbaʼe porã ha ñaipytyvõ chupekuéra oikuaa hag̃ua Ñandejárape (Mat. 5:3).
3 Umi fariséo Jesús tiémpope guare oapoʼivaʼekue umi imboriahúvape, ohenói voi chupekuéra ‛am ha·’á·rets (hénte tavy ha imboriahuetereíva). Jesúspe g̃uarã katu iporã umi imboriahúva rekove (Sal. 72:13, 14). Ñande ikatu jajapo Jesús ojapohaguéicha ha jaiporiahuvereko umi imboriahúvape, ñanderory ha ñanembaʼerechakuaávo hendivekuéra (Pro. 14:31). Arakaʼeve nañañeʼẽreirivaʼerã umi imboriahúvare térã ndajahasareirivaʼerã chupekuéra japredika jave. Hiʼarive umi imboriahúva ñanerendu porãve japredika jave chupekuéra.
4 Koʼág̃ama voi ñaipytyvõ chupekuéra. Peteĩ tapicha oiko rire Ñandejára Ñeʼẽ heʼiháicha, oaprende avei mbaʼéichapa oikovaʼerã ani hag̃ua imboriahueterei. La Biblia ningo heʼi ani hag̃ua jakaʼu, jahuga plátare, ñaneateʼỹ, japita térã ñanakea ha hetave mbaʼe ikatúva ñanemomboriahuve (Pro. 6:10, 11; 23:21; 2 Cor. 7:1; Efe. 5:5). Heʼi avei ñandéve ani hag̃ua ñanemonda ha ñambaʼapo kyreʼỹ hag̃ua. Koʼã mbaʼe ningo oñemombaʼeterei peteĩ tapicha rehe (Col. 3:22, 23; Heb. 13:18). Peteĩ enkuésta ojejapovaʼekue ohechauka peteĩ patrón omeʼẽta jave traváho ohecharamoitereiha peteĩ tapicha naimondáiva ha ojapóva opa mbaʼe oñehaʼarõva chugui.
5 Jehová ningo ombyasy ohechávo mbaʼéichapa ohasa asy umi imboriahúva. Upévare, koʼẽrõitéma Itaʼýra Jesucristo ‘onohẽta jejopy vaígui imboriahúvape ojerure rupi chupe’ (Sal. 72:12). Upe mboyve, ñande ikatu ñaipytyvõ entéro ñande rapichápe, ha umi imboriahúvape avei ipyʼaguapy hag̃ua. Upéva jajapotañaína jaguerahávo chupekuéra pe marandu porã oĩva la Bíbliape.