Ñañeʼẽ ñande rapichakuérape Ñandejára Goviérnore
1 Ijetuʼuetereíningo koʼág̃a rupi. Upévare, heta ñande rapicha nohaʼarõvéima mbaʼeve iporãva (Efe. 2:12). Oĩ katu ojeroviáva umi mbaʼerepýre, mburuvichakuéra térã umi sientífikore, péro umíva nomyatyrõmoʼãi opa mbaʼe vai. Ñande katu, umi mbaʼe ñahaʼarõva “peteĩ ánklaicha ñane ángape g̃uarã, mbaʼeve omomyiʼỹvaʼerã”. Aje piko javyʼaite upévare! (Heb. 6:19, BNP.)
2 Ñandejára Goviérno ojapóta ko Yvýgui peteĩ hardín neporãva. Umi ñande rogaygua omanovaʼekuépe oñemoingove jeýta (Hech. 24:15). Ndaiporimoʼãvéima imboriahúva, oporombohasa asýva, hasykatúva, ituja térã ig̃uaig̃uíva ha noñemanomoʼãvéima avei (Sal. 9:18; Mat. 12:20, 21; Rev. 21:3, 4). Koʼãva ha hetave mbaʼe Ñandejára oprometevaʼekue koʼẽrõitéma oikóta. Mbaʼépa nde rehaʼarõve koʼãva apytégui?
3 Umi marandu porã ningo ñamombeʼuvaʼerã. Ñañomíta piko ñande rapichágui Ñandejára omoĩtaha igoviérno? Jahayhúgui Ñandejárape ha ñande rapichakuérape jajapose Jesús ojapohaguéicha. Upévare avei, ‘ñamoherakuã mbaʼe porã imboriahúvape, oñesẽtaha jehasa asýgui, ha ohechaʼỹva ohecha jeytaha, ha oñemosãsotaha umi ojerereko asývape’ (Luc. 4:18, BNP). Apóstol Pablo oguerahavaʼekue pe marandu porã merkadoha rupi ha mamo hentekuéra oĩhápe. Haʼe ningo ‘oñemeʼẽmbaitevaʼekue omoherakuãvo upe ñeʼẽ’ (Hech. 18:5). Jajapóramo Pablo ojapohaguéicha, ‘ndajajepyʼapymoʼãi heta mbaʼére ha ndajarekosemoʼãi heta mbaʼe’, ikatúgui mbeguekatúpe ñanemokangy (Mar. 4:19).
4 Ñandéngo nañamboykeiñaína ñande jerovia oĩramo jepe nañanerenduséiva térã oñemoĩva ñanderehe. Upéicha, ‘ñaime hatã rupi ñande jeroviápe ñamyiʼỹ rehe’ ha ‘nañaguerotĩri rupi pe marandu porã’ (Heb. 10:23, BNP; Rom. 1:16). Akóinte ñañehaʼãramo jajapo Ñandejára rembipota, ikatu oĩ okambiáva ha ñanerendu porã upe rire.
5 Ndaivaíringo ñañeʼẽ umi mbaʼe vai oikóvare ko múndope ha mbaʼéichapa oñekumplihína heta profesía. Upéicharõ jepe, ñanemanduʼavaʼerã ndajahaiha ñamombeʼu ñande rapichakuérape ko múndo oñehunditaha. Ñamombeʼu uvei chupekuéra Ñandejára ñanesãmbyhytaha, ha oguerutaha heta mbaʼe porã. Upévare, kyreʼỹmekena ñamombeʼu pe marandu porã, ha ‘jahechauka upeichagua kyreʼỹ ipaha peve, jahupyty peve pe ñahaʼarõva’ (Heb. 6:11, BNP).