Mbaʼépa ojejapohína oñepytyvõ hag̃ua umi guaraníme oñeʼẽvape
1 Yma Jehová heʼivaʼekue Zacaríaspe ohai hag̃ua peteĩ profesía ijojahaʼỹva. Heʼi chupe: “Upérõ diez mombyrygua [káda uno oñeʼẽva iñidiómape] ipojáita peteĩ Israelguáva ao ruguáire ha heʼíta: ‘Rohose penendive rohendúgui Ñandejára oĩha penendive’” (Zacarías 8:23). Umi hudío ohenduvaʼekue upe profesía noimoʼãichenerakaʼe oikotaha upéva. Koʼág̃a katu ñande jahecháma mbaʼeichaitépa oñekumplihína. Mbaʼéichapa oikohína upéva?
2 Ko profesíape ningo oñemombaʼetereihína umi idióma. Upévare Jehová organisasiónpe yma guivéma ojetradusi ñane puvlikasionkuéra heta ñeʼẽme. Péro oiméne ojapo veinte áño rupi oñembaʼapo kyreʼỹvehague ko mbaʼépe. Káda áño hetave idiómapema ojetradusi ohóvo ñane puvlikasionkuéra, ohasáma voi 400 idióma. Upéva ningo tuichaitereíma ñanepytyvõ ko Paraguáipe.
3 Áño 2000 guive, Paraguaipegua Betélpe oñembaʼapo ojetradusi hag̃ua ñane puvlikasionkuéra guaraníme. Ko Departamento de Traducciónpe ombaʼapohína koʼág̃a 13 ermáno ha ermána. Ha hetave rupi ohóvo hikuái oñembotuichavehína koʼág̃a Betel. Ojejapohína ofisína umi otradusívape g̃uarã guaraníme ha lenguaje de señas paraguáyope ikatu hag̃uáicha oñepytyvõ umi nohendúivape.
4 Mbaʼe mbaʼémapa ojehupyty? Hetaireterei mbaʼe porãma ningo ojehupytyhína. Ojeguerekóma heta folléto, tratádo ha ambue puvlikasión guaraníme. Brasilpegua Betel omombeʼu ojejapomaha 78.605 folléto Mbaʼépa ojerure Ñandejára ñandehegui? Jaguerekóma avei Ñane Rembiapo Rréino Rehegua marzo 2005 guive, ha ñande rrevísta Ñemañaha katu enero 2007 guive. Káda més ojejapo 5.488 Ñane Rembiapo Rréino Rehegua, ha 10.398 Ñemañaha. Oñemondo avei káda més Argentínape 1.300 Ñemañaha.
5 Upe 1 de octubre guive katu oĩma cuatro sirkuíto guaraníme. Koʼã sirkuítope oĩma 70 kongregasión. Heta kongregasión noĩriva sirkuíto guaraníme ojapo jepi avei guaraníme umi rreunión. Argentinapegua Betel omombeʼu oĩmaha upépe mbohapy kongregasión ha 14 grúpo ojapóva rreunionkuéra guaraníme, ha opredikaha hikuái umi guaraníme oñeʼẽvape.
6 Mbaʼéichapa oipytyvõ upéva ñane ermanokuérape? Ojapo porãiterei ningo hesekuéra ha avei umi tapicha oikuaasevévare Ñandejárape. Upéva jahechakuaa peteĩ ansiáno omombeʼuvaʼekuére. Haʼe heʼi: ‘Ore kongregasiónpe ningo oĩ peteĩ ermáno aréma oservíva Jehovápe, péro ndaikatúiva gueteri oiko chugui ansiáno. Koʼág̃a katu, ojejapo rupi guaraníme umi rreunión, oipytyvõ meme ifamíliape omombareteve hag̃ua ijerovia. Ko ermáno heta vésema heʼi chéve umi rreunión ojejapóva guaraníme oipytyvõhague chupe oiko hag̃ua chugui ansiáno’.
7 Upe ermáno omombeʼu avei: ‘Ore territóriope oĩ peteĩ kuñakarai aretereíma ostudiáva la Biblia, péro ndahaʼéi mbaʼevégui ndoikóiva chugui mbaʼeve, haʼéʼanganingo nontendéinte umi mbaʼe oleéva jepi. Upe rire olee pe lívro Mbaʼépa añetehápe omboʼe la Biblia? Oleepávo peteĩ párrafo heʼi: “Natekotevẽvéima ere chéve mbaʼeve. Hesakã porãiterei ningo kóva ha antendepaite voi”. Péicha, ko kuñakarai hetaite tiémpo oñehaʼã rire, ndahasyvéima chupe koʼág̃a ontende hag̃ua la Biblia omboʼéva’.
8 Hetápe ningo hasy gueteri olee porã hag̃ua guaraníme. Upévare, enterovékena ñañensaja meme jaleekuaa hag̃ua. Heta kongregasiónpe opa rire estúdio de lívro umi ermanokuérape oñemboʼe oleekuaa hag̃ua. Jajeprepara ha ñaimékena koʼã mbaʼe ojejapo jave. Upéicharõ pyaʼeterei jaleekuaáta ñamombaʼeguasu hag̃ua avei Ñandejárape péicha.
9 Mbaʼépa jajapokuaa avei jaagradese hag̃ua Jehovápe omeʼẽhaguére ñandéve koʼãichagua mbaʼe porã? Ikatu jaiporu umi puvlikasión oĩva guaraníme jastudia hag̃ua ñane família ndive. Péva ningo tuichaiterei oipytyvõta ñande rogayguakuérape. Ñande ningo jaipota avei umi ñande territóriope oikóva olee ñane puvlikasionkuéra iñeʼẽtépe. Jaguerahákena upéicharõ ñande rrevísta Ñemañaha predikasiónpe, ha oimehápe avei ikatu hag̃uáicha ñaikuaveʼẽ oimeraẽvape. Upearã, tekotevẽ jajerure heta rrevísta káda més, peteĩteĩ ñande rogayguakuérape g̃uarã ha avei ñaikuaveʼẽtava predikasiónpe.
10 Jahecháma mbaʼeichaitépa og̃uahẽve ñande rapichakuérape japredikáramo iñeʼẽtépe. Upévare jaagradese Jehová ha iñorganisasiónpe omoĩhaguére ñandéve umi puvlikasión ñane ñeʼẽtépe. Jaguerohoryeténingo ñane ermanokuéra oĩvape kongregasión guaraníme ha oñehaʼãmbaitevahína oikóvo. Ñañemboʼékena Jehovápe ñanepytyvõ meme hag̃ua ko tembiapópe, ikatu hag̃uáicha ‘ojesalva opaichagua tapicha’ (1 Timoteo 2:4, BNP).