Mbaʼépa ikatu ñameʼẽ Jehovápe

¹ Mbaʼépa ñande yvypóra ikatu ñameʼẽ Ñandejárape? Abel ningo osakrifikavaʼekue hymbakuéra iporãvéva Jehovápe g̃uarã, Noé ha Job avei ojapovaʼekue upéicha (Gén. 4:4; 8:20; Job 1:5). Péro, Jehová ningo opa mbaʼe jára, upéicha rupi ndahaʼemoʼãi irrikovétava oñemeʼẽhaguére chupe umi mymba. Ohechauka guei hikuái upéicha ohayhuha Ñandejárape ipyʼaite guive. Ha ñande ñamombaʼeguasu hag̃ua Jehovápe ikatu jaiporu ñane tiémpo, umi mbaʼe jarekóva ha avei ñambaʼapo kyreʼỹ chupe g̃uarã (Heb. 13:15).

² Ñane tiémpo. Iporã ningo ñamboyke umi mbaʼe naiñimportanteguasúiva, ikatu hag̃uáicha jaiporuve ñane tiémpo predikasiónpe (Efe. 5:​15, 16). Ikatu hína ñamohenda ñane tiémpo jajapo hag̃ua ñande precursorado auxiliar un més jepe. Térã ikatu japytamieve jepi predikasiónpe. Japytavéramo treinta minúto jepe káda semána, jajapovétama dos óra káda més!

³ Ñambaʼapo kyreʼỹ. Ñanekyreʼỹséramo predikasiónpe, ñamboykevaʼerã umi vyʼarã ha umi tembiapo ñanemokaneʼõitereítava. Koʼã mbaʼérengo ikatu nañambaʼapokyreʼỹvéima Jehovápe g̃uarã. Péro tekotevẽ avei ñamboyke umi mbaʼe ñandepyʼapy ha ñanemokangýtava jaservi porãve hag̃ua Ñandejárape (Pro. 12:25). Ha ñandepyʼapýramo jepe peteĩ mbaʼe, iporãvetahína jahejáramo Jehová pópe (Sal. 55:22; Fili. 4:​6, 7).

⁴ Umi mbaʼe jarekóva. Ikatu avei ñaipytyvõ ojepredika hag̃ua ñameʼẽramo umi mbaʼe jarekóva. Upévare apóstol Pablo omokyreʼỹ iñermanokuérape ojepokuaa hag̃ua omohemby omeʼẽmivaʼerã umi hapicha oikotevẽvape (1 Cor. 16:​1, 2). Ñande avei ikatu ñamohembyñaína ñameʼẽvaʼerã. Upéicha ñaipytyvõta kongregasiónpe ha avei ojepredika hag̃ua opárupi ko Yvy ape ári. Jehová ningo omombaʼetereihína ñameʼẽva ñande pyʼaite guive michĩramo jepe (Luc. 21:​1-4).

⁵ Jehová hetaiterei mbaʼéma omeʼẽ ñandéve (Sant. 1:17). Ha jaagradeseñaína chupe umívare jaiporúramo ñane tiémpo, umi mbaʼe jarekóva ha ñambaʼapo kyreʼỹramo predikasiónpe. Jajapóramo upéicha ñambovyʼatañaína Jehovápe. Haʼe ningo “ohayhu pe ipyʼaite guive omeʼẽvape” (2 Cor. 9:7).