Ñañembokatupyryvékena jaservívo Ñandejárape
1 Ñande Ru yvagapeguápe ombopyʼarory ohechávo hembiguaikuéra oikuaave chupe ha oñembokatupyryve opredika hag̃ua umi marandu porã. Pablo omokyreʼỹvaʼekue Timotéope olee ha oporomboʼe meme hag̃ua Ñandejára Ñeʼẽ. Upéicharõ opavave ohechakuaáta ikatupyryveha ohóvo (1 Tim. 4:13-15). Opavave ningo ñandekatupyry predikasiónpe ha ñamboʼévo la Biblia. Upéicharõ jepe ñañehaʼã meme vaʼerã ikatu hag̃uáicha jaservi porãve Jehovápe.
2 Umi mbaʼe jahupytyséva. Jaservi porãve hag̃ua Ñandejárape, tekotevẽ jahecha mbaʼépa jahupytyse. Pór ehémplo, ñañehaʼãkuaa ñañembokatupyryve hag̃ua jaiporúvo la Biblia (Efe. 6:17). Ikatu avei ñañembokatupyryve japredika hag̃ua kállere térã negosioha rupi. Ha jajapo porãve hag̃ua rrevisíta. Ñañembokatupyryvekuaa avei ñañepyrũ hag̃ua jastudia la Biblia ñande rapichakuéra ndive ha ñamboʼe porãve hag̃ua chupekuéra.
3 Umi mbaʼe ñanepytyvõva. Umi rreunión jarekóvaningo ñanepytyvõ ñandekatupyryve hag̃ua predikasiónpe. Koʼýte Eskuéla dél Ministério Teokrátiko ha Rreunión de Servísio. Ñanepytyvõvétantema jastudia porãramo jaha hag̃ua koʼã rreunionhápe. Ha iporãta avei jajapóramo upépe ojeʼéva ñandéve (2 Cor. 9:6).
4 Jareko avei ñane ermanokuérape (Pro. 27:17). Ñañatende porãramo ñane ermanokuérare opredika jave, tuicha ñanepytyvõta. Ikatu avei pe superintendénte omoakãva estúdio de lívro ojerure peteĩ ermáno térã ermánape ñanepytyvõ hag̃ua. Ajépa javyʼáta peteĩ prekursór térã puvlikadór ikatupyrýva ñanepytyvõramo ñandekatupyryve ha javyʼave hag̃ua predikasiónpe. Oĩpa ñande estúdio de lívrope peteĩ puvlikadór pyahu? Ikatu ñande voi ñainvita chupe osẽ hag̃ua opredika ñanendive.
5 Ndaipóriningo tembiapo iñimportantevéva koʼã mbaʼégui: Japredika ha ñamboʼe ñande rapichakuérape la Biblia. Iporãveháicha ningo hiʼã jajapo opa mbaʼe Jehovápe g̃uarã (Heb. 13:15). Ñañehaʼãramo ñandekatupyryve jaservívo Jehovápe, jajapóta Timoteo ojapohaguéicha. Haʼe ningo ‘mbaʼapohára hembiapo porãva oguerekoʼỹva otĩ hag̃ua, omboʼéva hekoitépe pe ñeʼẽ añetegua’ (2 Tim. 2:15, BNP).