Umi ohayhúva Ñandejárape hory ha otrata porã hapichakuérape

¹ Koʼága rupi ningo saʼi oĩ hory ha oporotrata porãva. Mbaʼérepa? Enterovénte ningo ojapura ha ndoporotrataporãsevéima voi. Ndeʼivéima hikuái “ejapomína chéve ko mbaʼe”, “grásiamante” térã “chediskulpána”. Ñandejára Ñeʼẽ ningo heʼimavaʼekue oĩvaʼerãha heta oporotrata vaíva ko ára pahápe. Heʼi hetataha umi ‘ijupénte ojehayhúva, ijejapóva, ijuruguasúva, idesagradesídova, ndoporohayhúiva, ndojejokokuaáiva, ndohayhúiva mbaʼeve iporãva, ha hova atãva’ (2 Tim. 3:1–4). Koʼã mbaʼére ningo ndahoryvéima ñande rapichakuéra. Upévare umi ohayhúva Ñandejárape oñatendevaʼerã ani oporotrata vai ko mundopeguáicha.

² Mbaʼépa heʼise ñanderory ha japorotrata porã? Ñande rapichakuérape nañamoñanduvaimoʼãi ha jaiko porãta hendivekuéra ñanderory ha jatrata porãramo chupekuéra. Upéicha jahechauka ñanembaʼerechakuaa, ñanembaʼeporã ha ñandepyʼaporãha. Koʼã mbaʼe jajapóta jahayhúramo Ñandejárape ha ñande rapichápe (Luc. 10:27). Ndahasýi ningo jajapo hag̃ua péicha, péro tekotevẽterei jaiko porãséramo ñande rapichakuéra ndive.

³ Jesucristo omoivaʼekue pe ehémplo iporãvéva. Katuete ojapóvami pe Regla de Oro heʼíva: “Pejapo pende rapicháre pe peipotáva haʼekuéra ojapo penderehe” (Luc. 6:31). Ñande ningo ñamombaʼeterei mbaʼéichapa Jesús imbaʼerechakuaa ha otrata porã vaʼekue hemimboʼekuérape (Mat. 11:28–30). Haʼe ningo ojapo upéicha ipyʼaite guive ha imbaʼeporãgui, ndahaʼéi oaprendevaʼekue lívrope oporotrata porã hag̃ua. Upévare ñande ñañehaʼãmbaitevaʼerã jajapo haʼéicha.

⁴ Mbaʼéicha javépa ñande ñanderory ha japorotrata porã vaʼerã? Sapyʼántentepa, japyta porãse jave ñande rapicha ndive térã jajapoukase jave peteĩ mbaʼe? Nahániri. Opa árape ñande upéicha vaʼerã. Mbaʼéichapa ikatu ñanderory ha jatrata porã ñane ermanokuérape?

⁵ Salón del Réinope. Salónpe ningo ñamombaʼeguasu Ñandejárape. Ñañembyaty upépe Jehová ñaneinvita rupi. Upéicharõ ñande imbohupahína (Sal. 15:1). Ha jahechaukápa ñande reko porãha jaha jave Salón del Réinope? Ñañatendépa mbaʼéicha ñañemonde? Katuete ndajahamoʼãi péicha péichante térã nañañemondevaimoʼãi. Jaháramo asambléa térã rreunionhápe, ñañemonde porã vaʼerã ojekuaa hag̃ua ñanderehe ñamombaʼeguasuha Ñandejárape (1 Tim. 2:9, 10). Péicha jahechaukáta ñanembaʼerechakuaa ha ñamombaʼeha Jehovápe ha umi ambue imbohupápe.

⁶ Jahechaukáta avei japorotrata porãha ñaguahẽvo órape rreunionhápe hasýramo jepe. Oĩ umi hóga mombyrýva térã ifamília retáva. Upéicharõ jepe, heta kongregasiónpe ojehecha 25% rupi puvlikadorkuéra og̃uahẽha tárde. Ojepokuaa hikuái og̃uahẽ ojepurahéi ha oñeñemboʼepa riréma. Ha upéva ningo naiporãi. Ñanemanduʼavaʼerã japorotrata porãséramo ñañehaʼãvaʼerãha ani ñamyangekói ñande rapichápe. Jehová ningo ñaneinvita ñanemboʼe hag̃ua heta mbaʼe porã. Upévare, ñag̃uahẽramo órape jahechauka jaagradeseha ha avei ñamombaʼeha ñande rapichakuérape. Ha ñag̃uahẽramo tárde katu ñamolestáta ha ndajarrespetamoʼãi umi oĩmavape.

⁷ Oĩpa oho ramóva rreunionhápe? Jaguerohorýramo umívape jahechaukáta japorotrata porãha (Mat. 5:47; Rom. 15:7). Ikatu jasaluda porã, jaipopyhy ha japukavymi ñande rapichápe. Koʼã mbaʼe ningo michĩramo jepe ohechauka porãve ñande kristiáno teeteha (Juan 13:35). Peteĩ karai oho ramórõ guare Salón del Réinope, heʼi: “Un díapente atopa hetaiterei cherayhu añetéva ndachekuaáiramo jepe. Ndahaʼéi pe rrelihión akakuaa haguepeguáicha. Upévare haʼe ajuhuha Ñandejára rape”. Upéi ojapo umi mbaʼe oaprendevaʼekue ha siete mése haguépe ojevautisa. Upéicharõ ñanderory ha jatrata porã rupi ñande rapichápe, tuichaiterei ñaipytyvõta chupekuéra.

⁸ Ñanderorýramo umi ndajaikuaáiva ndive, ‘koʼýte ñanderoryvaʼerã umi ñanemoirũvape ñande jeroviápe’ (Gál. 6:10). Ñandejára Ñeʼẽ heʼi avei kóicha: “Itujávape ejapo mbaʼéramo” (Lev. 19:32). Aníkena nañapenái hesekuéra rreunionhápe jepi.

⁹ Ñañatende porãkena. Rreunionhápe ningo ñañeʼẽ ñamombarete hag̃ua ñande rapicha jerovia (Rom. 1:11). Naiporãmoʼãi rreunionhápe jakéramo, ñambopúramo ñande chíkle, pyʼỹieterei ñañeʼẽ ñemĩramo ñande ykeregua ndive, jahapa rei váñope, jaleéramo oimeraẽ mbaʼe noñehesaʼỹijoivahína rreunionhápe térã jajapóramo ambue mbaʼe. Ansianokuéra ningo ehemplovaʼerã koʼã mbaʼépe. Japorotrata porãse rupi ñañatendéta pe diskursántere ha ñamombaʼéta heʼíva Ñandejára Ñeʼẽ.

¹⁰ Ñamombaʼe rupi pe diskursánte ha ñane ermanokuérape, ndajaiporumoʼãi selulár rreunión aja.

¹¹ Mbaʼéichapa japorotrata porãta ñañangarekóramo mitãnguérare? Tuvakuéra oikuaavaʼerã mbaʼépa ojapo oikóvo itaʼyrakuéra. Peteĩ mitã ningo ikatu hasẽ térã iñakãhatã rreunionhápe ha oporomolesta. Upéicharõ, iporãta ñaguenohẽramo pyaʼemi okápe okirirĩ térã opyta hag̃ua peteĩ hendápe. Hasy jepi jajapo hag̃ua upéva, péro ñañatendéramo jahechaukáta jajepyʼapyha ñande rapichakuérare. Umi túva ha sy orekóva mitã iñakãhatãva, oguapy jepi tapykuépe ani hag̃ua oporomolesta opuʼãtaramo rreunión aja. Upéicharõ, ñande ñanembaʼerechakuaáta umi família ndive ndajaguapýiramo umi sílla tapykuepeguápe.

¹² Tuvakuéra oikuaavaʼerã avei mbaʼépa ojapo itaʼyrakuéra rreunión mboyve ha opa rire. Mitãnguéra ningo ndodiparaivaʼerã salónpe, ikatúgui oiko hese térã ótrore heta mbaʼe. Ndovaléi avei odipara hikuái salón jerére, ha ipeligrosovéntema pyharekue. Ñañemongeta hatãramo okápe ikatu avei omolesta vesinokuérape ha oñeñeʼẽ vai kongregasión rehe. Jaguerohoryvaʼerã umi sy ha túva oñehaʼãva oñangareko ifamíliare salónpe ha okápe avei. Haʼekuéra ningo péicha oipytyvõ ojeiko porã hag̃ua oñondive (Sal. 133:1).

¹³ Estúdio de Lívrope. Jaagradese ningo umi ermanokuéra omeʼẽvape hóga ojejapo hag̃ua rreunión. Jaha jave tekotevẽ japororrespeta ha ñanembaʼerechakuaa óga ahénope. Jaike mboyve ñamopotĩvaʼerã ñande py pono ñamongyʼa píso ahéno. Tuvakuéra oñatendevaʼerã itaʼyrakuérare ani hag̃ua oikepa koty ahénope. Ñanembovýramo jepe peteĩ grúpope ha ñane ermanokuéra rógape haguére ndajajapomoʼãi oimeraẽ mbaʼe rei. Peteĩ mitã ohoséramo váñope, isy térã itúva ohovaʼerã hendive. Estúdio de lívro ningo peteĩ rreunión kongregasionpegua avei. Upévare ñañemondevaʼerã jahatarõguáicha salónpe.

¹⁴ Ñande ningo ñanderory ha japorotrata porã vaʼerã katuete. Péicha ningo ñamoporãvéta ñane predikasión, ha avei jajogueraha porãve enterovéndi (2 Cor. 6:3, 4, 6). Ñamombaʼeguasu rupi peteĩ Ñandejára ovyʼávape, ñandéve ndahasymoʼãi avei ñanderory, japukavymi, ha ñanembaʼeporã. Péichata umi mbaʼe michĩvape jepe, ombovyʼáta rupi ñande rapichápe. Umi ohayhúva Ñandejárape ovyʼave ha hory otrata porã haguére hapichápe.