Jahekákena umi ipyʼaporãvape
1. Mbaʼéichapa ikatúta jatopa umi ipyʼaporãvape?
1 Jesús oĩrõ guare ko yvy ape ári ojapovaʼekue ikatumíva guive omosarambi hag̃ua hekoitépe Ñandejára marandu umi ipyʼaporãvape (Isa. 61:1, 2). Ha ñande koʼág̃a tekotevẽterei ñahaʼanga chupe, ndahaʼéi ñamaña mañantevaʼerã jahecha oĩpa upérupi, jaipyguara ha jaheka porã vaʼerã jatopa peve (Mat. 10:11; 2 Cor. 5:20).
2. Mbaʼéichapa Pablo ohechauka opredikaha oñekotevẽhápe? Ha mbaʼe iporãvapa ohupyty upéicha rupi?
2 Japredikavaʼerã tekotevẽhápe. Apóstol Pablo ojepokuaámi oho sinagógape raẽ opredika hag̃ua umi hudío ha hudioʼỹvape (Hech. 14:1). Péro oĩrõ guare Filípospe, oho Silas ndive opredika hag̃ua ‘oñemboʼehápe umi Filiposgua’. Upépe oñepyrũ opredika umi kuñanguéra oñembyatývape. Koʼãva apytépe oĩvaʼekue Lidia, haʼe upe guive oñepyrũ oservi Ñandejárape ipyʼaite guive (Hech. 16:12-15).
3. Moõ moõ rupípa ikatu avei japredika?
3 Ñande koʼág̃a rupi jajepokuaa japredika ogahárupi, péro iporãta avei japredikáramo ambue hendápe. Pór ehémplo, terminálpe, oñehaʼãrõháme kolektívo, plásape, ofisinaha rupi, merkádope, negosioha rupi térã umi eskína ijatyvehápe hénte. Avei umi oikóva séntrore ikatu opredika umi edifisioha rupi, ohenói chupekuéra pór teléfono térã oguerahauka chupekuéra kárta. Jajepokuaána japredika avei mamo oñekotevẽhápe, ndahaʼéi opyta porãvehápe ñandéve. Upéicharõ jahechaukáta ‘ñambaʼapoha tapiaite ha kyreʼỹme Ñandejárape g̃uarã’ (1 Cor. 15:58, BNP).
4. Mbaʼépa ojapo heta ermáno opredikave hag̃ua?
4 Heta ermáno ova tetã ambuépe térã ambue kongregasiónpe opredikave hag̃ua. Ótro katu oñehaʼã oñeʼẽ ambue idióma opredika hag̃ua umi tetã ambueguápe.
5. Mbaʼépa ñañeporandukuaa, ha mbaʼérepa?
5 Ñanemanduʼavaʼerã ‘pe kokue haʼeha ko múndo’ (Mat. 9:37; 13:38, ÑÑB). Ha jaikuaaháicha ko múndo koʼẽrõitéma oñehundíta, upévare tekotevẽterei japredika mamo oñekotevẽhápe. Iporã ñañeporandumi: “Ikatúpa amboyke che tiémpo ha apredikave? Ajapópa ikatumíva guive amoherakuã hag̃ua hekoitépe ha opavavépe pe marandu porã?”. Jaipyguara porãkena jatopa peve umi ipyʼaporãvape, jajapóramo upéicha jahechaukañaína ñamotenondeha Ñandejára rembipota ha haʼe katuete ñanderovasáta (Mat. 6:33).