Umi mbaʼe jaikuaaséva
◼ Mbaʼéichapa jahechauka ñanembaʼerechakuaaha oĩramo teléfono salónpe oñehendu hag̃ua rreunión?
Oĩ kongregasión omoĩukáva teléfono salónpe ikatu hag̃uáicha umi ermáno hasykatúva térã ndaikatúiva oĩ rreunionhápe ambue mbaʼére, ohendu umi mbaʼe ojeʼéva upépe. Iñimportanteterei ñanembaʼerechakuaa jaikuaa hag̃ua mávapa añetehápe tekotevẽ oiporu pe teléfono. Upéicha rupi umi ansiáno ojesareko porã vaʼerã ojeporu lájare ikatu hag̃uáicha ‘koʼã mbaʼe ojejapo hekópe ha hendaitépe’ (1 Cor. 14:40).
Upéicharõ, mávapepa oñemotenondevaʼerã oiporu hag̃ua pe teléfono? Ansianokuéra omotenondevaʼerã umi ermáno hasykatuetévape térã umi ndaikatúivape osẽ hógagui ambue mbaʼére. Péro ikatu avei oiporu umi puvlikadór térã estudiánte oñakãrapuʼãva kongregasiónpe peichahágui hasýramo sapyʼami, ndaikatúiramo okuʼe porã térã ndaikatúirõ osẽ hógagui. Umi ohendúva ñane rreunión teléfono rupive oñekonta avei ku oĩrõguáicha salónpe. Ha peichahágui oĩvéramo oiporuséva teléfono ohendu hag̃ua ñane rreunión ha pe kongregasión ndoguerekovéima, upéicharõ ojehekavaʼerã chupe ládo oñesolusiona hag̃ua upe provléma. Pór ehémplo, ikatu ojegrava ha upe rire oñembohasa upe oikotevẽvape.
Jaikuaaháicha hetaiteve mbaʼe porã jahupyty ñaiméramo rreunionhápe. Upépe ningo “ñañomokyreʼỹ” ñane ermanokuéra ndive, ha umi ostudia ramóva ontendeve mbaʼérepa iñimportánte ñaime káda rreuniónpe. Avei ñaimévo rreunionhápe ideprovechove ñandéve umi demostrasión, ansianokuéra ñanepytyvõ porãve ha jahechakuaa mbaʼéichapa ñane ermanokuéra ñanderayhu. Pór ehémplo peteĩ ermána ijedáva omombeʼu mbaʼéichapa oñeñandu oñeañuárõ guare chupe osẽnguévo salóngui, haʼe heʼi: “Koʼã mbaʼe ningo ndoikói asy pór teléfono!”. Ajépa siertoite la heʼíva! (Rom. 1:11, 12.)
La Biblia omombeʼu Ana ‘ndofaltái hague témplope’. Upéicha avei heta ñane pehẽnguekuéra mimi ijedáva ha hasykatúva oñehaʼãmbaite oĩ salónpe (Luc. 2:36, 37). Ha oiporúramo jepe teléfono ohendu hag̃ua jepi umi rreunión, ndoikói ojeko upévare opytánte hag̃ua hógape. Ñahaʼangákena koʼã ermánope ha jajapo ikatúva guive ani hag̃ua jafalta rreunionhápe; upépe ningo ñamombaʼeguasuñaína Jehovápe (Sal. 95:1-3, 6; 122:1).