Aníkena jaiko ñainupãramoguáicha yvytu
1. Mbaʼéichapa ikatu oñekumpli 1 Corintios 9:26 heʼíva ñane predikasiónpe?
1 Apóstol Pablo ohaivaʼekue: ‘Che ndaikói añani rei, ha nañorairõi ku yvytu ainupãramoguáicha’ (1 Cor. 9:26, BNP). Koʼápe Pablo heʼise ojedesidimaha ohupytývo heta mbaʼe Ñandejára servísiope. Péro haʼe heʼíva ikatu avei oñekumpli predikasiónpe, ñande ningo ndajaikoséi ñañehaʼã rei predikasiónpe ku “ñainupãramoguáicha yvytu”, jaipota guei ñane rembiapo osẽ porã ha ideprovécho. Mbaʼépa ikatu jajapo upearã?
2. Mbaʼéichapa ikatu ñahaʼanga Pablo ha ambue maranduhára primer siglopeguápe jaiporavo jave moõ ha mbaʼe órapa japredikáta?
2 Jahavaʼerã umi hénte oĩháme. Pablo ha ambue maranduhára primer siglopegua ohómi vaʼekue opredika oĩháme heta hénte (Hech. 5:42; 16:13; 17:17). Upévare, oiméramo ñande territóriope ñande rapichakuéra opytave hógape pyharekue, iporãvéta jaháramo upe órape japredika hag̃ua chupekuéra. Mbaʼe órapa oĩ hetave hénte terminálpe térã umi paradahárupi pyhareve térãpa kaʼaru, ohokuévo itravahohápe térãpa ojevývo hógape? Mbaʼe órapa oĩ hetave hénte merkádope térã umi negosiohárupi? Ikatuhína jahupyty hetave mbaʼe japredikáramo umi órape kállere.
3. Mbaʼépa jajapovaʼerã ani hag̃ua ñañehaʼã rei predikasiónpe ku “ñainupãramoguáicha yvytu”?
3 Japredikákena hekoitépe ñande territóriope. Ani hag̃ua jaiko ñañehaʼã rei predikasiónpe ku “ñainupãramoguáicha yvytu”, tekotevẽ ñamoherakuã pe marandu porã hekoitépe ñande territóriope. Pór ehémplo, oñemondóramo peteĩ grúpo tuicháva opredika hag̃ua peteĩ hendápente, oñekotevẽ heta tiémpo oñeñangareko porã hag̃ua hesekuéra. Iporãvéta ningo ojedividíramo, ajépa? Avei jaha jave japredika kampañaháre, natekotevẽi jaha hetaiterei maranduhára peteĩ áutope, upéicha jajapo pyaʼevéta ha hetavéndi ikatúta ñañeʼẽ. Ikatu avei jajerure peteĩ território personál ñande róga ypýrupi, jaiporu saʼive hag̃ua ñane tiémpo viáhepe.
4. Mbaʼépa ñanepytyvõta ñandekatupyry hag̃ua jajagarrávo “kuimbaʼe, pira rangue”?
4 Jesús ningo heʼivaʼekue omboʼetaha hemimboʼekuérape “ojagarra hag̃ua kuimbaʼe, pira rangue” (Mar. 1:17, NM). Jaikuaaháicha peteĩ peskadór ikatupyrýva ndahaʼéi oitysénteva irréd ýpe, síno ojagarrase umi pira. Upearã oheka peteĩ óra ha lugár iporãvéva, ha pyaʼe voi oñepyrũ opeska. Ñande avei ñañehaʼãramo jajapo péicha jahechaukáta ñanekyreʼỹ ha ñandekatupyryha predikasiónpe (Heb. 6:11).