Javyʼákena jajapóvare Jehová servísiope
1. ¿Mbaʼérepa javyʼa ñantrega haguére ñane infórme káda fín de més?
1 Enterove maranduhára javyʼavaʼerã ñantrega haguére ñane infórme káda més (Gál. 6:4). Oimérõ ñande prekursór espesiál ha japredika ciento treinta óra térã peteĩ maranduhára opredikáva quince minúto jepe, javyʼaiterei jaservi haguére Jehovápe ñande pyʼaite guive (Sal. 100:2).
2. ¿Mbaʼérepa ñameʼẽvaʼerã Jehovápe iporãnguete?
2 Jehová ningo pe Mburuvicha Guasu, upévare ñameʼẽvaʼerã chupe iporãnguete (Mal. 1:6). Jahayhu rupi chupe ñaprometékuri jajapotaha hembipota opa ára g̃uarã. Upévare, opávo peteĩ día térã og̃uahẽvo fín de més, javyʼaiterei jahechakuaávo jaiporu hague ñane tiémpo, ha ñane mbaretekue jajapo hag̃ua opa ikatúva Jehová servísiope (Pro. 3:9). Péro ñane konsiénsia ñaneatóĩramo ñambaʼapove hag̃ua Ñandejárape g̃uarã, jajepyʼamongeta ha jahechavaʼerã mbaʼépa ikatu jajapo porãve (Rom. 2:15).
3. ¿Mbaʼérepa naiporãi ñañembojoja ótrore?
3 Ani ñañembojoja ótrore. Ñanemitãvérõ guare oiméne jajapóraʼe heta mbaʼe Ñandejára servísiope, péro naiporãmoʼãi jaiko ñapensaiterei umívare térã ñañembojoja ótrore. Ñane situasión ningo okambiánte voi, avei ñanemanduʼavaʼerã káda ermáno idiferenteha. Upévare, jaikóramo ñañembojoja ótrore ikatu ñañeñandu vai ha ñapensa ndajavaleiha mbaʼeverã (Gál. 5:26; 6:4). Jesús nombojojaivaʼekue avavépe ótrore, oguerohory guei káda únope ojapóvare (Mar. 14:6-9).
4. ¿Mbaʼépa ñaaprende pe ehémplo Jesús oiporuvaʼekuégui?
4 Peteĩ ehémplo rupive Jesús omombeʼu peteĩ karai oheja hague pláta hembiguaikuérape omombaʼapo hag̃ua, ha “omeʼẽ peteĩteĩme ipuʼaka hag̃uáicha” (Mat. 25:15, BNP). Ko karai ou rire, ohenói hembiguaikuérape oikuaa hag̃ua mbaʼépa ojapo hikuái pe plátagui. Ha oguerohoryeterei umi ombaʼapo jejopývape ha ojapovaʼekuépe opa ikatúva omomemby hag̃ua pe pláta ohejavaʼekue chupekuéra. Upévare, káda únope heʼi: “Eike nde jára vyʼahápe” (Mat. 25:21, 23, ÑÑB). Upéicha avei ñande ñambaʼapo kyreʼỹramo predikasiónpe javyʼavéta ha Jehová oguerohorýta ñane rembiapo.