Ñañangarekókena ñane konsiénsiare

1. ¿Mbaʼéichapa héra pe aty guasu ojejapótava áño de servísio 2013-pe, ha mbaʼéichapa ñanepytyvõta?

¹ Káda día oñepresenta heta mbaʼe ikatúva omongyʼa ñane konsiénsia. Upévare pe aty guasu un diagua ojejapótava pe áño de servísio 2013-pe héra: “Ñañangarekókena ñane konsiénsiare” (1 Tim. 1:19). Ko aty guasu ñanepytyvõta jahechakuaa hag̃ua mbaʼéichapa jaiporu hína ko rregálo porãite omeʼẽva ñandéve ñande Apohare.

2. ¿Mbaʼe porandúpa oñembohováita ko aty guasúpe?

² Mbaʼépa oñembohováita ko aty guasúpe. Oñembohováita siete porandu jaikuaaséva jepi ñane konsiénsiagui:

• ¿Mbaʼe mbaʼépa ikatu ombyai ñane konsiénsia?

• ¿Mbaʼépa ñanepytyvõta ñahekomboʼe hag̃ua ñane konsiénsia?

• ¿Mbaʼépa jajapokuaa pono ñande rapicha omano ñande káusare?

• ¿Mbaʼépa jahechauka jajepyʼamongetáramo Ñandejára Ñeʼẽre ha jasegíramo umi konsého oĩva upépe?

• ¿Mbaʼépa jajapokuaa pono ñambyai ñande rapichakuéra konsiénsia?

• ¿Mbaʼéichapa mitãrusukuéra ikatu ombohovái porã umi mbaʼe ijetuʼúva oñepresentáva chupekuéra?

• ¿Mbaʼe iporãvapa ohupyty umi ohekomboʼéva ikonsiénsia la Biblia rupive ha ohendúva oñatõi jave chupe?

3. ¿Mbaʼépa jajapovaʼerã jaaprovecha porã hag̃ua pe aty guasu un diagua?

³ Satanás ipy ha ipópe ñaneraʼã ombyai hag̃ua ñane konsiénsia. Péro ñande Ru yvagapegua ñanderayhuetereígui ñanepytyvõ jagueropuʼaka hag̃ua, ha upearã oiporu Iñeʼẽ ha Iñorganisasión heʼi hag̃ua ñandéve: “Kóva hína pe tape, tapeho koʼárupi” (Is. 30:21). Jehová ñanepytyvõ avei jaha hag̃ua tape porãre omeʼẽvo ñandéve heta informasión porã pe aty guasu un diaguápe. Upévare, aníkena jafalta, ñañatende porã umi mbaʼe oñehesaʼỹijótavare, jajepyʼamongeta ha jahecha mbaʼéichapa ikatu jajapo umi mbaʼe ñaaprendéva. Avei iporãta ñañemongetáramo ñande rogayguándi umi mbaʼe ñahenduvaʼekuére. Jajapóramo umi konsého oñemeʼẽva ñandéve, ñanepytyvõta ipotĩ hag̃ua ñane konsiénsia ha ndajahejamoʼãi umi mbaʼe vai oikuaveʼẽva ko múndo oĩva Satanás poguýpe ñandegueraha tape vaíre (1 Ped. 3:16).