Japredikákena umi hénte ñanerenduse hag̃uáicha
1. ¿Mbaʼéichapa umi kristiáno ypykue omog̃uahẽvaʼekue pe notísia porã opaichagua héntepe, ha mbaʼépa ñanemboʼe upéva?
1 Umi kristiáno ypykue omog̃uahẽvaʼekue pe notísia porã opaichagua héntepe ha oĩva diferénte rrelihiónpe (Col. 1:23). Haʼekuéra omombeʼu chupekuéra mbaʼépa ojapóta Ñandejára Rréino, upéicharõ jepe ndopredikái opavavépe peteĩchapa, odepende mbaʼeichagua héntepa ohendu chupekuéra ohecha hag̃ua mbaʼéichapa oñeʼẽta pe notísia porã rehe. Pór ehémplo, Pedro oiporuvaʼekue proféta Joel ohaivaʼekue oñepyrũ hag̃ua oñeʼẽ una partída hudíope, oikuaágui haʼekuéra omombaʼeha Ñandejára Ñeʼẽ (Hech. 2:14-17). Ha Hechos 17:22-31-pe katu jahecha mbaʼéichapa Pablo opredika ótro hendáicha umi griégope. Koʼág̃a avei jatopa jepi ñande territóriope umi hénte omombaʼéva Ñandejára Ñeʼẽ, upéicha rupi ndahasyiete jaiporu hag̃ua la Biblia japredika jave ogahárupi. Péro jatopa jave umi hénte ndahaʼéiva kristiáno térã nomombaʼéiva la Biblia, tekotevẽ ñañatende ha jahecha mbaʼéichapa ñañeʼẽta chupekuéra pe notísia porã rehe.
2. ¿Mbaʼéichapa ikatu jaiporu umi puvlikasión ñaipytyvõ hag̃ua umi omombaʼévape la Biblia ha umi ndoikuaaséivape mbaʼeve chugui?
2 Jaiporu porãkena umi puvlikasión oñekuaveʼẽtava. Ko áño de servísiope umi puvlikasión oñekuaveʼẽtava ojeporúta dos mése aja ha upéi oñekambiáta, umíva apytépe oĩta rrevísta, tratádo ha folléto. Jatopáramo ñande territóriope umi ndoikuaaséiva mbaʼeve la Bíbliagui, ikatu jaiporu ambue puvlikasión ogustátava chupekuéra. Ha oĩramo ñanerendu porãva, péro nañañeʼẽi chupe la Bíbliare ha ndajaleéi ni peteĩ téxto vívliko, lomímonte jaha jey vaʼerã hendápe. Upéicharõ añoite ñaipytyvõta chupe oikuaa hag̃ua Ñandejárape ha omombaʼe hag̃ua Iñeʼẽ. Péro jatopáramo umi omombaʼéva Ñandejára Ñeʼẽ, ikatu jaiporu la Biblia japredika hag̃ua chupekuéra ha avei ñaikuaveʼẽkuaa umi puvlikasión oñeʼẽva hese. Ikatu voi ñaikuaveʼẽ pe lívro Mbaʼépa omboʼe la Biblia? ha umi folléto Ehendúkena Ñandejárape térã Ehendúkena Ñandejárape ha reikovéta opa árare, ndahaʼéiramo jepe koʼãva umi puvlikasión ojeporútava upe méspe. Péro ani ñanderesarái japredikavaʼerãha umi héntepe ñanerenduse hag̃uáicha, upéva hína pe iñimportantevéva.
3. ¿Mbaʼépepa ojojogua ñande rapichakuéra korasõ ha pe yvy ñañemitỹ hag̃ua?
3 Japreparákena pe yvy. Ñañemitỹ hag̃ua ningo japreparavaʼerã pe yvy, ha jaikuaaháicha oĩ yvy tekotevẽva oñembaʼapove hese. Upéicha avei heta hénte oikotevẽ oñepytyvõve chupe heñói ha okakuaa hag̃ua ikorasõme Ñandejára Ñeʼẽ (Luc. 8:15). Umi kristiáno síglo primérope guare opredikavaʼekue opaichagua héntepe, ha ojapo rupi hekoitépe hembiapo ohupyty heta mbaʼe porã. Ha upéva omoñeñandu porã ha ombovyʼa chupekuéra (Hech. 13:48, 52). Ñande avei jahupytýta heta mbaʼe porã jajapóramo opa ikatúva japredika hag̃ua umi héntepe ñanerenduse hag̃uáicha.