“Mbaʼéichapa ikatu ñaikuaveʼẽ ñande rrevistakuéra...”
Káda més pe Aty Ñanemboʼéva Japredika Hag̃uáme osẽ peteĩ párte ohechaukáva mbaʼéichapa ikatu ñaikuaveʼẽ ñande rrevistakuéra. Ko párte ndojejapói oñemombeʼu hag̃ua káda artíkulo osẽva umi rrevístape, síno ojehecha hag̃ua mbaʼe mbaʼépa ikatu jaʼe ñapresenta hag̃ua umíva. Ñane Marandu Porãme heʼi voi pe ermáno ojapótava ko párte mbykymínte oñeʼẽvaʼerã oñepyrũ hag̃ua ha ikyreʼỹvaʼerãha. Upéi, oiporavovaʼerã peteĩ artíkulo térã umi artíkulo oĩva oñepyrũvo umi rrevísta, ha ojerure umi ohendúvape chupe tomombeʼu mbaʼéichapa opresentase umíva. Péicha enterovéva oñatendéta peteĩ artíkulorente ha oanotáta ohóvo umi komentário ideprovéchotava chupekuéra. Pe ermáno ndojerureivaʼerã oñemombeʼu hag̃ua mbaʼeichaitépa ikatu oñepresenta umi rrevísta, síno mbaʼe porandu ha mbaʼe téxtopa oiporúta hikuái. Omohuʼã hag̃ua, ojejapovaʼerã mokõi demostrasión ohechaukáva mbaʼéichapa ikatu oñekuaveʼẽ koʼã rrevísta. Oñemokyreʼỹ enterovépe voimi olee hag̃ua umi rrevísta ikatu hag̃uáicha okomenta rreunionhápe. Opavave jajepreparáramo ñañopytyvõta jajapo porãve hag̃ua ñane rembiapo (Prov. 27:17).