Jajepokuaákena ñag̃uahẽ órape
1. ¿Mbaʼéichapa Jehová omoĩ ñandéve ehémplo porã?
1 Jehová siémpre ojapo opa mbaʼe itiempoitépe. Por ehémplo oipytyvõ isiervokuérape oikotevẽve jave (Heb. 4:16). Avei omeʼẽ ñandéve “hiʼupy hiʼoraitépe” (Mat. 24:45). Upéicharõ, ikatu jajerovia pe día Haʼe oiporavóva ohundi hag̃ua umi hénte añáme “nog̃uahẽmoʼãiha tárde” (Hab. 2:3). Hetaiterei mbaʼe porã ningo jahupyty Jehová ojapo rupi opa mbaʼe itiempoitépe (Sal. 70:5). Ñande katu, ñaneimperfékto ha ñanerembiapo heta rupi, sapyʼánte ijetuʼu jajapo hag̃ua opa mbaʼe hiʼoraitépe. ¿Mbaʼérepa jajepokuaa vaʼerã jajapo opa mbaʼe órape?
2. ¿Mbaʼérepa ikatu jaʼe ñamombaʼeguasuha Jehovápe ñag̃uahẽramo órape?
2 Koʼã ára pahápe umi hénte ndojejokokuaái ha opensa ijehénte, upévare ndoikuaái hikuái mbaʼépa heʼise ñag̃uahẽ órape (2 Tim. 3:1-3). Upéicha rupi, ñande kristiáno ñag̃uahẽramo órape ñande traváhope, rreunionhápe térã ambue kompromíso jarekóvape, umi hénte ohechakuaa ha omombaʼe upéva, avei péicha oñemombaʼeguasu Jehová réra (1 Ped. 2:12). ¿Jajepokuaápa ñag̃uahẽ oraitépe ñande travahohápe, péro tárde rreunionhápe ha predikasiónpe? Ñag̃uahẽramo órape rreunionhápe, ojepurahéi ha oñeñemboʼe mboyve, jahechauka hína jajaposeha opa mbaʼe hekopete, ñande Ru yvagapegua ojapoháicha (1 Cor. 14:33, 40).
3. ¿Mbaʼérepa ikatu jaʼe ñanembaʼerechakuaaha ñag̃uahẽramo órape?
3 Ñag̃uahẽramo órape jahechauka hína ñanembaʼerechakuaaha ñande rapichakuérandi (Filip. 2:3, 4). Ñag̃uahẽramo órape rreunionhápe térã pe aty ojejapóvape oñesẽ mboyve ojepredika, nañamolestamoʼãi ñane ermanokuérape. Péro jajepokuaáramo ñag̃uahẽ tárde jahechauka ñapensaha ñandejehénte ha ndajarrespetaiha chupekuéra. Opavavénte ñandeguerohorýta ñañehaʼãmbaitéramo ñag̃uahẽ órape, upéicha jahechaukágui ñanerresponsavleha, jajapoha opa mbaʼe hekopete ha ikatuha ojejerovia ñanderehe.
4. Oimérõ ijetuʼu ñandéve ñag̃uahẽ órape, ¿mbaʼépa ikatu ñanepytyvõ?
4 Oiméramo reg̃uahẽ jepi tárde ne kompromisokuérape, ehecha vaʼerã mbaʼérepa oiko nderehe upéva. Remohenda porãramo ne tiémpo ikatúta rejapopa oraitépe ne rembiapokuéra (Ecl. 3:1; Filip. 1:10). Ejerure Jehovápe tanepytyvõ (1 Juan 5:14). Jajepokuaáramo ñag̃uahẽ órape ñakumpli hína umi mokõi mandamiénto iñimportantevéva; jahechauka jahayhuha Jehovápe ha ñande rapichakuérape (Mat. 22:37-39).