Ñamoñepyrũkena estúdio vívliko umi ogár de ansiánope

1. ¿Mbaʼérepa tekotevẽ ñamog̃uahẽ pe marandu porã umi oikóvape ogár de ansiánope?

¹ Umi ijedáva ningo ombohovái heta mbaʼe ijetuʼúva (Ecl. 12:1-7). Ha hetápe ojegueraha oiko hag̃ua umi lugár oñeñangarekohápe umi ijedávare, upéicha rupi sapyʼánte ndaikatúi jatopa hesekuéra japredika jave ogahárupi. Heta tetãme umi hénte ijeda vove, oho jey oiko ifamiliakuérandi, péro koʼã tetãme sapyʼánte oĩ avei ogueraháva ifamília ijedáva umi ogár de ansiánope. Umi oikóva koʼãichagua lugárpe ikatu oime naimbaretevéima térã hesaraipareíma heta mbaʼégui, upéicharõ jepe ikatu hína oaprende hikuái Jehovágui ha upéi ou ohayhu ha omombaʼe chupe. ¿Mbaʼépa ikatu jajapo ñamog̃uahẽ hag̃ua chupekuéra “pe esperánsa ñanembovyʼaitéva”? (Tito 2:13.)

2. ¿Mbaʼépa ikatu jajapo jaikuaa hag̃ua moõ moõpa opyta umi ogár de ansiáno?

² Mbaʼéichapa jajapo vaʼerã. Jaikuaa hag̃ua moõ moõpa opyta umi lugár oñeñangarekoha umi ijedávare, ikatu jaheka Internétpe térã ñaporandu ñane konosidokuérape ndoikuaáipa moõpa opyta peteĩ ogár de ansiáno. Pe superintendénte de servísio ikatu hína oñenkarga oasigna hag̃ua umi maranduhára ikatupyrývape oho hag̃ua ovisita koʼã lugár. Jajeroviáramo Jehováre ha ñañeorganisa porã, pyaʼeterei ikatu hína ñamoñepyrũ estúdio vívliko umi ogár de ansiánope (Prov. 21:5; 1 Juan 5:14, 15).

3, 4. a) ¿Mávandipa ñañeʼẽ vaʼerã ikatu hag̃uáicha ñamoñepyrũ estúdio vívliko umi ogár de ansiánope? b) ¿Mbaʼépa jaʼe vaʼerã ñamyesakã hag̃ua mbaʼéichapa ojejapo pe estúdio?

³ Ñaikuaveʼẽta jave estúdio vívliko umi ogár de ansiánope, jahecha vaʼerã oĩpa heta ijedáva ha orekópa hikuái heta personál, oimérõ upéicha okonvenivéta ñañeʼẽ pe enkargádondi. Péro oimérõ ndahetái umi oikóva upépe ha oĩ mokõi térã mbohapy empleádonte, iporãvéta ñañeʼẽramo pe ogár de ansiáno jára ndive.

⁴ Javisita jave umi ogár de ansiáno ñamombeʼu vaʼerã pe enkargádo térã ijárape ñaipytyvõseha gratiete umi oaprendesévape la Bíbliagui, ha ñaporandu ndaipóripa opartisipaséva peteĩ kúrso vívlikope. Ha oĩramo oaprendeséva, jaʼekuaa ikatuha jaha 30 minúto káda semána ñamboʼe hag̃ua chupekuéra. Jareko hína heta puvlikasión ikatúva ñanepytyvõ, por ehémplo heta maranduhára oiporu pe lívro Istória oĩva Ñandejára Ñeʼẽme ha El hombre mas grande de todos los tiempos, ha heʼi ideprovechoitereiha chupekuéra. Iporãta jahechauka raẽramo pe enkargádope pe puvlikasión jaiporútava. Ñaporandu vaʼerã avei mbaʼe óra, mbaʼe día ha moõpa jajapóta pe estúdio, ikatu hag̃uáicha umi enkargádo oanotáma ilísta de aktividápe. Ani ñanderesarái jaʼe hag̃ua ñande haʼeha testigo de Jehová, avei ñamyesakã porã vaʼerã ndajahamoʼãiha jajapo peteĩ servísio rrelihióso, síno ñaipytyvõ hag̃ua umi oaprendesévape la Bíbliagui.

5. ¿Mbaʼépa jajapo vaʼerã igústo ha ideprovécho hag̃ua pe estúdio?

⁵ Mbaʼéichapa jajapo vaʼerã pe estúdio. Jadesidi mboyve mbaʼéichapa jajapóta pe estúdio, jahecha vaʼerã mbaʼetekópa pe lugár ha avei mbaʼéichapa umi oikóva upépe, upearã tekotevẽ ñanembaʼerechakuaa ha ani jajopyeterei hendivekuéra. Pe ojapóva pe estúdio omeʼẽ vaʼerã káda únope pe puvlikasión ojestudiátava, ha opa rire ogueraha jey. Ha oĩramo ndohechaporãiva, pe puvlikadór ikatu ogueraha chupekuéra puvlikasión ilétra tuicháva. Jajapo jave pe estúdio jajerure vaʼerã umi oleesévape tolee umi párrafo térã rreláto vívliko, ha upéi jajapo umi porandu. Aníkena ñanderesarái ñanderory ha ñanembaʼeporã vaʼerãha pe estúdio aja. Pe ogár de ansiáno jára térã pe enkargádo omeʼẽramo ñandéve permíso, ikatu avei jahechauka chupekuéra umi vidéo omyesakã porãvéva mbaʼéichapa ikatu jajapo umi konsého oĩva la Bíbliape, térã oipytyvõtava chupekuéra ojeroviave hag̃ua Ñandejára Ñeʼẽre. Ñamoñepyrũ hag̃ua ha opakuévo ikatu jajapo peteĩ orasión mbykymi. Oĩ avei puvlikadór oiporúva kántiko omoñepyrũ hag̃ua pe estúdio.

6. ¿Mbaʼépa ikatu jajapo oĩramo heʼíva ndogueroviaiha upe ñamboʼéva?

⁶ Jajapo jave pe estúdio ikatu oĩ heʼíva ndogueroviaiha pe ñamboʼéva, ¿mbaʼépa ikatu jajapo péicha jave? Ñambohovái porãnte vaʼerã chupe ha ikatu voi jahechauka peteĩ téxto omyesakãva upe mbaʼe ndogueroviáiva (Col. 4:6). Péro jahechakuaáramo ikuentaveha ñañeʼẽ hendive ótro moméntope, iporãvéta jaagradese heʼi haguére mbaʼépa opensa, ha jaʼe chupe opa rire pe estúdio ikatuha ñañeʼẽ hendive upe témare.

7. ¿Mbaʼépa jajapo vaʼerã oĩramo ombaʼeporandúva térã oaprendeséva hetave mbaʼe?

⁷ Sapyʼánte ningo ikatu oĩ ombaʼeporandúva ñandéve térã oikuaaséva hetave mbaʼe pe téma jastudiávagui. Oiko jave upéva, peteĩ ermána omombeʼu mbaʼépa heʼi jepi: “Iñimportanteterei ningo la ne pregúnta. Péro, ¿mbaʼépa ere ñatermina rire ñande estúdio ñañemongetáramo upe témare?”. Oĩramo heʼíva ñandéve oikuaaseha hetave mbaʼe la Bíbliagui, jaʼekuaa chupe ikatuha jastudia hendive ótra óra ha ótro hendápe.

8. ¿Mbaʼéichapa ñainforma vaʼerã pe estúdio jajapóva en grúpo ha avei umi ñamoñepyrũva umi oaprendesévandi hetave mbaʼe?

⁸ Iporãvéta ohóramo ojapo pe estúdio umi puvlikadór ohóva jepi voi, ha ani oho diferénte ermáno káda semána. Umi ohóva guive pe estúdiope oanota vaʼerã mboy órapa ojapo. Péro pe oñenkargáva pe grúpore añoite oanota vaʼerã peteĩ rrevisíta káda oho, ha fin de méspe katu peteĩ estúdio. Ha oĩramo oaprendeséva hetave mbaʼe ha ñamoñepyrũ hendive apartete peteĩ estúdio vívliko, ñainformáta jajapoháicha jepi voi.

9, 10. ¿Mbaʼe kualidápa ohechauka vaʼerã umi ojapóva pe estúdio?

⁹ Ñakumplíkena. Ñamoĩkena peteĩ día ha óra jastudia hag̃ua pe grúpondi ha ñañehaʼã ñakumpli. ¿Mbaʼérepa iñimportánte upéva? Umi estudiánte ha umi ombaʼapóva upépe ohaʼarõta rupi jaha káda semána, ha oipotáta ñamoñepyrũ ha ñatermina oraitépe (Mat. 5:37). Upévare iñimportánte ñaneordenádo ha ñanerresponsávle. Avei, umi experiénsia ohechauka omachaveha mokõi puvlikadór ojapo pe estúdio (Ecl. 4:9, 10). Péro hetáramo umi oikóva pe ogár de ansiánope, ikatu hína oñekotevẽ hetave puvlikadór.

¹⁰ Iñimportanteterei avei ñandekalida ha jahechauka jajepyʼapyha hesekuéra (Filip. 2:4). Pe primer díape jadedika vaʼerã tiémpo jaikuaa hag̃ua káda únope, ñaanota herakuéra ha ótro jahávape ñañehaʼã jaikuaáma de memória. Ñanemanduʼa vaʼerã heta persóna ijedáva ndoipotaiha ñahenói chupekuéra hérarupi, síno oipota jaiporu ijapellído. Ñanembaʼerechakuaa ha ñanepasiénsiaramo, enterove oñeñandu porã ha ovyʼáta.

11. ¿Mbaʼéichapa ikatu jahechauka ñanderory ha ñanembaʼeporãha?

¹¹ Aníkena ñanderesarái ñanderory ha ñanembaʼeporã vaʼerãha umi ombaʼapóvandi upe lugárpe ha avei umi ijedáva hentekuérandi. Oimérõ ñamoĩma raʼe peteĩ óra ha día jastudia hag̃ua, ndovaléi ñakambia ñañeʼẽ mboyve pe enkargádondi. Ha ñaporandu mimi vaʼerã chupe mbaʼépa opensa hína pe estúdiore. Umi estudiánte hentekuéra oúramo de visíta jajapo jave pe estúdio, ñande voi ñañepresenta vaʼerã ha ñamombeʼu chupekuéra maʼerãpa ñañembyaty upe grúpondi. Jaʼékena avei jajepyʼapyha ihentekuérare ha ñainvita chupekuéra opyta hag̃ua ohendu.

12, 13. ¿Mbaʼe iporãvapa ojehupyty ojejapo rupi estúdio vívliko umi ogár de ansiánope?

¹² Mbaʼépa ojehupyty. Umi kongregasión ojapóva ko tembiapo ha umi superintendénte viahánte omombeʼu ojehupytyha heta mbaʼe porã. Por ehémplo, peteĩ ogár de ansiánope, pe primera klásepe opartisipa 20 persónarupi, ha umíva apytégui 6 ojerure ojejapo hag̃ua chupekuéra peteĩ estúdio vívliko, ha koʼãvagui peteĩ kuñakarai oprogresa ha ojevautisa. Ótro ogár de ansiánope, peteĩ kuñakarai orekóva 85 áño oho meme rreunionhápe ha heʼi voi ojevautisaseha. Ótro ogár de ansiánope katu ojedesidi ndojejapomoʼãveimaha pe estúdio, péro umi oikóva upépe ojerure ani hag̃ua oñesuspende. Amo ipahápe ojejapo jey pe kúrso ha opartisipa 30 persónarupi.

¹³ Umi persóna ijedáva ha umi enkargádo omombaʼeterei pe mborayhu jahechaukáva chupekuéra, upéicha rupi heta ogár de ansiánope umi personál jepe opartisipa pe estúdiope. Ñañehaʼãmbaite rupi ñaipytyvõ umi ijedávape, heta hénte oñeʼẽ porã Jehová organisasiónre (1 Ped. 2:12). Peteĩ jey, ñane ermanokuéra heʼi peteĩ ogár de ansiáno járape mbaʼérepa iñimportánte umi oikóva upépe ostudia la Biblia, upérõ pe karai heʼi: “¡Ambyasyetéiko ymáma ndapejúi hague! ¿Arakaʼéiko ikatu peñepyrũ?”. Peteĩ kuñakarai oñenkargáva peteĩ ogár de ansiánore heʼi: “Ko siudápe ningo oĩ heta ogár de ansiáno, ha hiʼãite chéve umi oikóva guive koʼã lugárpe, ostudia avei la Biblia testigo de Jehovándi. Haʼekuéra ningo ndokovrái mbaʼevete oipytyvõ haguére umi héntepe”. Peteĩ ogár de ansiáno oĩva Hawáipe omeʼẽ voi peteĩ prémio umi testigo de Jehovápe, ha heʼi hesekuéra “tuicha oipytyvõha” umi oiko ha ombaʼapóvape upépe.

14. ¿Mbaʼérepa ñaipytyvõse umi oikóvape ogár de ansiánope?

¹⁴ Jehová oipota avei umi ijedáva omombaʼeguasu chupe (Sal. 148:12, 13). Umíva apytépe oĩ hína oikóva umi ogár de ansiánope. ¿Oĩpa ñande territóriope peteĩ lugár oñeñangarekoha umi ijedávare? Oiméramo upéicha, ñanemanduʼa vaʼerã haʼekuéra avei ikatuha oñevenefisia la Bíblia omboʼévagui. Umi ansiáno kongregasionpegua ha umi oñenkargáva umi ogár de ansiánore, ikatu hína ñanepytyvõ jaikuaauka hag̃ua pe marandu porã umi ijedávape. Jehová ningo ndahesaráiri koʼãichagua héntegui, upévare jajapóvo ko tembiapo iñimportantetéva jahechauka hína jasegiha iñehémplo (Sal. 71:9, 18).