Eaprovechákena umi oportunida erekóva eñeʼẽ hag̃ua Ñandejára Rréinore

1. ¿Mbaʼépa ñaaprende rréi David ehémplogui?

¹ Rréi David ndohejái vaʼekue umi mbaʼe ohasáva ojoko chupe ojapo hag̃ua Jehová rembipota. Por ehémplo, haʼe omopuʼãseterei vaʼekue pe témplo oñemombaʼeguasu hag̃ua Jehovápe, péro ndojehejái chupe. Upémarõ opreparánte la oñekotevẽtava oñemopuʼã hag̃ua pe témplo, ha oheja itaʼýra Salomón kárgope (1 Rey. 8:17-19; 1 Crón. 29:3-9). Rréi David ndoikói vaʼekue oñelamenta umi mbaʼe ndaikatúivare ojapo, upéva rangue ojapónte la ikatumíva. ¿Mbaʼéichapa ñande ikatu jasegi iñehémplo jahekávo oportunida ñañeʼẽ hag̃ua Ñandejára Rréinore?

2. ¿Mbaʼépa ikatu jajapo ñambaʼaposevéramo Jehová servísiope?

² Ejapókena pe ikatumíva. Heta ermáno oiko sensillomie ikatu hag̃uáicha ojapo iprekursorádo auxiliár térã rregulár (Mat. 6:22). ¿Ikatúpa nde avei rejapo upéva? Eñemboʼékena Jehovápe ha estudia porã la ne situasión, rejapóramo upéva ikatu hína rehechakuaa ojavriha ndéve ‘peteĩ okẽ tuichaitereíva ejapo hag̃ua heta tembiapo’. Oiméramo upéicha, eaprovechákena upe oportunida rembaʼapove hag̃ua Jehová servísiope (1 Cor. 16:8, 9).

3. ¿Mbaʼépa ikatu jajapo ñane situasión nomeʼẽiramo jajapo hag̃ua ñande prekursorádo?

³ ¿Ha ñane situasión nomeʼẽiramo jajapo hag̃ua ñande prekursorádo? Oimérõ upéicha ñapensa vaʼerã umi mbaʼe ikatúvare jajapo. Por ehémplo, rembaʼapóramo umi hénte ndahaʼéivandi Testígo, ¿ikatúpa reaprovecha opaichagua oportunida repredika hag̃ua chupekuéra? Térã oimérõ nderasykatu ha reñeinterna, ¿ikatúpa repredika umi doktór ha enfermérape? Ñanemanduʼa vaʼerã avei umi ndaikatuvéimava ojapo heta mbaʼe, tahaʼe ijedáma rupi térã hasykatúgui, oinformakuaaha quince minúto jepe. Upévare umi oĩva koichagua situasiónpe oanotapaite vaʼerã iñinfórmepe mboy tiémpopa opredika, mboy puvlikasiónpa okoloka ha avei mboy tratádo ha invitasiónpa ontrega. Ikatu hína tuicha oñesorprende hikuái ohechávo mbaʼeichaitépa osuma umi mbaʼe ojapo vaʼekue.

4. ¿Mbaʼépa jajedesidi vaʼerã jajapo?

⁴ Tahaʼe haʼéva ñane situasión, jaaprovechákena opaichagua oportunida japredika hag̃ua ñande rapichakuérape. Péicha jajapóramo, javyʼáta jaikuaa haguére jajapoha hína opa ikatúva ñamotenonde hag̃ua Ñandejára Rréino (Mar. 14:8; Luc. 21:2-4).