Ñañehaʼãkena ñaaprende umi ermáno iñexperiensiavévagui

Ñamombaʼeterei ningo añetehápe umi ermáno iñexperiensiavéva ehémplo. Umíva apytépe oĩ umi ermáno heta áñorema oservíva Jehovápe fiélmente, ha umi ikatupyryetereíva predikasiónpe. Koʼã ermáno ohecha mbaʼeichaitépa Jesús odirihi pe predikasión koʼã ára pahápe, ikatu hag̃uáicha ojepredika ha ojejapo disípulo opárupi ko yvy ape ári (Mat. 28:19, 20). Haʼekuéra heta áñorema opredika kyreʼỹme ha ohechakuaa ‘pe podér ijojahaʼ ỹva oúva Ñandejáragui’ oipytyvõha chupekuéra oaguanta hag̃ua opa mbaʼe ohasáva (2 Cor. 4:7). Hetaiterei mbaʼe ningo ikatu ñaaprende umi ermáno iñexperiensiavévagui. Ñameʼẽramo chupekuéra oportunida, haʼekuéra vyʼápe okompartíta ñanendive umi mbaʼe oikuaáva (Sal. 71:18). ¿Mbaʼéicha javépa ikatu jaaprovecha ñaaprendeve hag̃ua koʼã ermánogui?

Predikasiónpe. Umi ipyahuvéva ikatupyryve hag̃ua predikasiónpe, oikotevẽ umi iñexperiensiavéva oipytyvõ chupekuéra. Heta mbaʼe ningo ikatu ñaaprende jahechávo mbaʼéichapa opredika umi iñexperiensiavéva. ¿Mbaʼéichapa nde reñevenefisia resẽvo hendivekuéra predikasiónpe? (Ehecha Ñemañaha 15 de febrero 2015, pe artíkulo “Ñanekyreʼỹ memékena japredika hag̃ua”, párrafo 3, heʼihápe “Ñaipytyvõ umi ipyahúvape”).

¿Ikatúpa reinvita peteĩ ermáno térã ermána iñexperiensiavévape opredika hag̃ua nendive? Oimérõ pe ermáno térã ermána hasykatu, ikatu voi regueraha jepi ne estudiántepe pe ermáno rógape pestudia hag̃ua. Pestudiapa rire, eporandukuaa pe ermánope mbaʼépepa ikatu remehora ha ejerure chupe tomeʼẽ ndéve konsého.

Jahasa tiémpo hendivekuéra. Tekotevẽ jahasa tiémpo umi ermáno iñexperiensiavévandi ikatu hag̃uáicha jaikuaave chupekuéra. Iporã ñainvita umichagua ermánope ñande estúdio de famíliape ha ñambaʼeporandu chupekuéra. Péro oiméramo hasykatu, jahakuaa hogaitépe voi jajapo hag̃ua hendive pe estúdio de família. Ñaporandukuaa chupe mbaʼéichapa oiko chugui Testígo, mbaʼéichapa Jehová ovendesi chupe, mbaʼéichapa okakuaaha ohóvo pe kongregasión ha mbaʼe iporãvapa ohupyty oservívo Jehovápe.

Káda úno ningo ‘ñandekatupyry jajapo hag̃ua diferénte tembiapo’, upévare ñanembaʼerechakuaa vaʼerã avei umi ermáno iñexperiensiavévandi, naentéroi ningo ikatúta ñanepytyvõ peteĩchapa (Rom. 12:6-8). Oĩ ningo umi ijedámava ha upéicha rupi ndaikatuvéima odedika ñandéve hetaiterei itiémpo. Upéicharõ jepe, hetaiterei mbaʼe ikatu ñaaprende umi ermáno iñexperiensiavévagui. Haʼekuéra heta tiémporema oservi Jehovápe ipyʼaite guive.