Ani jaduda jajesalvataha ou vove pe fin

Koʼág̃a peve Jehová ipasiénsia ko múndore, péro koʼẽrõitéma okambiáta upéva. Pe rrelihión japu oñehundíta, umi goviérno oñomoirũta oataka hag̃ua Ñandejára puévlope, ha Jehová ohundíta umi iñañávape pe Armagedónpe. Ñande jahechasetereíma oiko vove koʼã mbaʼe.

Añetehápe ndajaikuaapái por detálle mbaʼépa oikóta pe jehasa asy guasu aja. Por ehémplo arakaʼetépa oñepyrũta ha mbaʼépa heʼíta umi goviérno oataka hag̃ua umi rrelihiónpe. Ndajaikuaái avei mboy tiémporepa umi goviérno oatakáta Ñandejára puévlope ha mbaʼépa ojapóta hikuái. Ni ndajarekói peteĩ informasión heʼíva ñandéve mbaʼeichaitépa Jehová ohundíta umi hénte añáme Armagedónpe.

Péro la Biblia si omombeʼu ñandéve umi mbaʼe ñanepytyvõtava ñandepyʼaguasu hag̃ua. Por ehémplo, jaikuaa jaikomaha “umi ára pahápe” (2Ti 3:1). Avei jaikuaa ojeataka vove umi rrelihiónpe, ‘Ñandejára omombykytaha upe tiémpo’ ani hag̃ua oñehundi pe rrelihión verdadéra (Mt 24:22). Avei ñaime segúro Jehová osalvataha umi oadorávape chupe (2Pe 2:9). Ha ndajadudái Jesucristo ipoderóso ha ihustoha, chupe ningo Jehová oiporavo ohundi hag̃ua umi iñañávape ha osalva hag̃ua umi ohasátavape pe Armagedón (Apc 19:11, 15, 16).

Oiko vove koʼã mbaʼe “umi hénte odesmajáta pórke okyhyjetereíta”, péro ñande nahániri (Lu 21:26). Jajepyʼamongetárõ umi mbaʼe Jehová ojapo vaʼekuére yma osalva hag̃ua ipuévlope ha ñapensa memérõ la heʼívare oikotaha, ikatúta jajapo la heʼíva Lucas 21:28: “Peñemboʼy ha peñakãrapuʼã, pórke pe tiémpo Ñandejára pendesalva hag̃ua hiʼag̃uimbaitéma”.