¡Opukavy rupínte ojehupyty peteĩ mbaʼe iporãva!

MOKÕI kuñataĩ oguata kuri ohóvo oñondive peteĩ lugár oĩháme heta negósio siuda de Báguiope, Filipinas. Haʼekuéra ohecha peteĩ karríto ojepurúva predikasiónpe, péro noñembojái hikuái. Peteĩ ermána hérava Helen oñemboʼy hína kuri pe karríto ykére ha torýpe opukavy chupekuéra. Haʼekuéra osegínte hape, péro ohecharamoiterei mbaʼéichapa Helen opukavy chupekuéra.

Upéi umi mokõi kuñataĩ ohokuévo hógape kolektívope, ohecha tapére peteĩ kartél tuicháva orekóva umi létra jw.org, oĩva peteĩ Salón del Reino parére. Haʼekuéra imanduʼa ohecha hague avei umi létra pe karrítore. Upémarõ oguejy hikuái pe kolektívogui ha oho pe Salón del Réinope, ha ohecha mbaʼe órapa irreunión umi kongregasión oñembyatýva upépe.

Upe rire umi kuñataĩ oho peteĩva umi rreunionhápe, ha oikévo pe Salónpe oñesorprende hikuái ohechárõ guare Hélenpe. Upepete haʼekuéra imanduʼa mbaʼéichapa haʼe torýpe opukavy kuri chupekuéra. Helen omombeʼu: “Ahechárõ guare haʼekuéra ouha che rendápe chenerviosaʼi kuri ha apensa: ‘¿Oime piko ajapo vai raʼe álgo?’”. Péro umi kuñataĩ omombeʼu Hélenpe ohecha hague chupe hikuái pe karríto ykére.

Umi mokõi kuñataĩme ogustaiterei pe rreunión ha ovyʼaiterei umi ermáno ha ermanakuéra apytépe, oñeñandu voi hogapeguáicha. Ha ohechávo umi ermáno omopotĩha pe Salón opa rire la rreunión, oporandu hikuái ikatúpa oipytyvõ avei. Peteĩva umi kuñataĩ ndoikovéima koʼág̃a Filipínaspe, péro pe ótra oñepyrũma oho rreunionhápe ha ostudia la Biblia. Koʼã mbaʼe ojehupyty ojepukavy rupínte.