Oñeporandúva jepi

¿Mbaʼérepa 2 Samuel 21:7-9 heʼi rréi David ‘oiporiahuvereko hague Mefibósetpe’, péro upéi heʼi ontrega hague Mefibósetpe ojejuka hag̃ua chupe?

Oiméramo jalee pyaʼe pyaʼénte ko rreláto ikatu hína ñañeporandu upéva. Péro en rrealida koʼápe oñeñeʼẽ mokõi persónare, sólo ke hústo mokõivéva héra Mefibóset, ha ikatu ñaaprende peteĩ mbaʼe iñimportánteva upe oiko vaʼekuégui.

Rréi Saúl ningo 9 ifamília vaʼekue, 7 kuimbaʼe ha 2 kuña. Ha la itaʼýra tuichavéva héra vaʼekue Jonatán. Upéi pe rréi oreko kuri ótro itaʼýra hérava Mefibóset ha la isy héra vaʼekue Rizpá. Upéi itaʼýra Jonatán ifamília vaʼekue avei ha ombohéra chupe Mefibóset. Upéicharõ Saúl oreko vaʼekue peteĩ itaʼýra ha peteĩ iniéto ojotokájova, hérava Mefibóset.

Peteĩ vuéltape rréi Saúl oñakontrariaite vaʼekue umi gabaonítare ha ohundipase voi chupekuéra. Ha amalisia ojuka voi hetápe ijapyteguikuéra. Péro upéva ningo oĩ vaieterei kuri, pórke Josué tiémpope umi israelita ha umi gabaonita ojapo vaʼekue peteĩ kompromíso siémpre oikotaha pyʼaguapýpe (Jos. 9:3-27).

Upe kompromíso osegi gueteri vaʼekue Saúl tiémpo peve. Péro Saúl nopenái hese, ha haʼe ha ifamília ojuka umi gabaonítape (2 Sam. 21:1). Tiémpo rire Davídgui oiko rréi ha umi gabaonita ojesalva vaʼekue oho omombeʼu chupe la Saúl ojapo vaʼekue. Upévare David oporandu chupekuéra mbaʼépa haʼe ikatu ojapo umi gabaonita operdona hag̃ua umi israelítape ha Jehová ovendesi jey hag̃ua chupekuéra. Umi gabaonita ndojeruréi pláta, upéva rangue haʼekuéra oipota oñentrega chupekuéra 7 Saúl familiare ojuka hag̃ua chupekuéra (Núm. 35:30, 31). Ha David oasepta upéva (2 Sam. 21:2-6).

Upe tiémpope g̃uarã ningo Saúl ha Jonatán omanóma kuri gerrahápe, péro Jonatán raʼy Mefibóset osegi vaʼekue oikove. Haʼe ningo imitãme oreko vaʼekue peteĩ aksidénte ha upéicha rupi opyta vaʼekue irréngo. Upévare haʼe ndaikatúi vaʼekue oho oataka umi gabaonítape omanda haguéicha ijavuélo. David ha Jonatán ningo ojapo vaʼekue peteĩ kompromíso oñondive, ha David oñekompromete vaʼekue okuidataha Jonatán familiarére, umíva apytépe itaʼýra Mefibóset rehe (1 Sam. 18:1; 20:42). La Biblia omombeʼu: “David ha Jonatán ojapo vaʼekue peteĩ promésa Jehová renondépe, upévare rréi David oiporiahuvereko Mefibósetpe, haʼéva Jonatán raʼy ha Saúl niéto” (2 Sam. 21:7).

Upéicharõ jepe, David ojapo la ojerure vaʼekue chupe umi gabaonita. Haʼe ojagarra omeʼẽ chupekuéra mokõi Saúl raʼy ha hústamente peteĩva haʼe kuri Mefibóset, ha avei omeʼẽ chupekuéra 5 iniéto (2 Sam. 21:8, 9). Ha ojapo rupi upéicha Jehová operdona umi israelítape ojuka haguére umi gabaonítape.

Jehová léi ningo heʼi porã: “Tuakuérape ndojejukái vaʼerã itaʼýra pekadokuére” (Deut. 24:16). ¿Mbaʼérepa upéicharõ Jehová opermiti vaʼekue oiko upéva? Ikatu ñaĩ segúro Jehová nopermitimoʼãi hague kuri ojejapo upéva, umi mokõi Saúl raʼy ha umi 5 iniéto haʼérire inosénte. Pórke pe léi heʼi avei: “Peteĩ persónape ojejuka vaʼerã ipekádore añoite”. Posívlemente koʼã 7 Saúl familiare oipytyvõne raʼe chupe ojukapa lénto hag̃ua umi gabaonítape. Ha oimérire upéicha, haʼekuéra kulpávle avei kuri ha omerese voi omano la ojapo vaʼekuére.

Ko rreláto ohechauka ñandéve ndaikatuiha ñamoĩ de exkúsa jajapo hague algúna kósa ivaíva oñemanda haguérente ñandéve. Káda uno oñerresponsavilisa vaʼerã la ojapo vaʼekuére. Upévare voi la Biblia heʼi: “Káda uno ogueraháta ikárga” (Gál. 6:5; Efes. 5:15).