Jajapo umi rreunión videollamáda rupive

Heta goviérno oĩva ko múndo tuichakuére omanda la héntepe ojapo hag̃ua distansiamiénto físiko, térã ani hag̃ua oñemoag̃ui ojuehe, ha oproivi la hénte oñembyaty térã ojapo rreunión. Ñande testígo de Jehová ningo ñaime desidído ñakumplitaha koʼã mbaʼe ojeruréva umi goviérno. Péro jasegise avei ñañembyaty jajapeligraʼỹre. Upearã umi kongregasión oipuru hína oikóvo umi aplikasión ojapo hag̃ua umi rreunión, por ehémplo Zoom.

Jasegi hag̃ua jareko ñane rreunionkuéra jepiveguáicha, pe Kuérpo Governánte omeʼẽ permíso ojepuru hag̃ua umi kontrivusión ojejogua hag̃ua umi kuénta de Zoom kongregasionkuérape g̃uarã. Upéva tuichaiterei oipytyvõ heta kongregasión ndaikatúi vaʼekuépe opaga peteĩ kuéntare, ovaléva 15 a 20 dólar, térã hepyve. Koʼã kongregasión oipuru hína kuri oikóvo umi aplikasión grátiva. Péro koʼã aplikasión nopermitíri hetaitereípe oñekonekta ha ndaiseguropái. Koʼág̃a katu umi kongregasión oipurúva umi kuénta de Zoom ojogua vaʼekue ñane organisasión, ohechakuaa ideprovechoitereiha chupekuéra, pórke umíva ndahasyiete oñekonfigura hag̃ua ikatu hag̃uáicha isegúro, ha hetaiterei persóna ikatu oñekonekta káda rreunionrã. Koʼág̃a g̃uarã oipurúma koʼã kuénta mas de 65.000 kongregasión, mas de 170 paíspe.

Pe kongregasión Kairagi, oĩva siuda de Manádope, Célebes Septentrional, Indonésiape, ndoipuruvéi pe aplikasión grátiva ha oñepyrũ oipuru peteĩ kuénta de Zoom ojogua vaʼekue ñane organisasión. Ermáno Hadi Santoso omombeʼu: “Koʼág̃a umi ermáno naivakeanombáiva jepe oipuru hag̃ua umi aparáto elektróniko, ikatu oaprovecha porãve umi rreunión, prinsipálmente natekotevẽvéima rupi oñekonekta heta vése peteĩ rreunión aja”.

Léster Jijón, peteĩ ansiáno oĩva kongregasión Guayacanes Oéstepe, opytáva Guayaquil Ecuadórpe, omombeʼu: “Umi ermáno ha ermanakuéra imboriahu rupi, ndaikatumoʼãi kuri opaga peteĩ kuénta de Zoom rehe ikatu hag̃uáicha pe kongregasión kompletoite oñekonekta umi rreunionrã. Koʼág̃a ñane organisasión orepytyvõ rupi, ikatúma roreko peteĩ kuénta de Zoom ikatuhápe hetave hénte oñekonekta peteĩ rreunionrã. Upéicha rupi ikatúma roinvita trankílamente hetave héntepe umi rreunionrã, rokyhyjeʼỹre rohasárõ g̃uarã pe kantida de persóna ikatúva oñekonekta”.

Johnson Mwanza, peteĩ ansiáno kongregasión Ngwerere Nortepegua, oĩva siuda de Lusaka Zámbiape, oskrivi: “Heta ermáno ha ermána heʼi jey jey oréve: ‘Pe Zoom ojogua vaʼekue ñane organisasión rupive ñañemoag̃uive ñane ermanokuérare, ha orepytyvõ roñandu hag̃ua Jehová orerayhu ha oñangarekoha orerehe’”.

Oñemeʼẽ rupi umi kontrivusión pe óvra mundiálpe g̃uarã ikatu kuri ojejogua koʼã kuénta de Zoom. Ha upearã ojepuru kuri umi kontrivusión ojeapartáva oñepytyvõ hag̃ua oiko jave umi desástre naturál. Heta koʼã kontrivusión ojejapo donate.jw.org rupive. Roagradese peẽme ore pyʼaite guive pendepojera haguére pemeʼẽ hag̃ua pene kontrivusión, umíva ningo ojepuru avei ko múndo tuichakuére oiko jave umi desástre naturál (2 Corintios 8:14).