¿Ikatúpa pe teknolohía operhudika umi mitã erekóvape?
Koʼág̃arupi oĩ heta oipurúva pe teknolohía michĩete guive, ha upévare ifasileterei chupekuéra g̃uarã. Péro la majoría umi kakuaápe katu oforsaiterei pe teknolohía.
Péro upéicha avei, oĩ ohechakuaáva umi imitãva oipuruetereíramo pe teknolohía ikatuha:
oñenvisiaite hese.
omoñeñandu vai ótrope Internet rupive, térã oñemoñeñandu vai chupe.
ohecha pornografía haʼe voi oheka rupi, térã ojeapareséntema rupi chupe.
MBAʼÉPA IPORÃ EREKO ENKUÉNTA
OÑENVISIA
Heta mbaʼe oĩva Internétpe, por ehémplo umi huégo elektróniko, ojeprepara voi oenvisia hag̃uáicha la héntepe ha ijetuʼueterei ojeheja hag̃ua. Peteĩ lívro heʼi: “Umi aplikasión jaguerekóva ñande selulárpe oñediseña voi ani hag̃uáicha japoise chugui” (Reclaiming Conversation). Umi emprésa ogana heta pláta jahecha haguénte umi propagánda osẽva umi aplikasiónpe. Upévare amáske jahecha umíva, hetave ñamogana chupekuéra.
EPENSAMÍNA: ¿Ndépa ere ne família oipuruetereimaha iselulár umía? ¿Mbaʼéichapa nde ikatu eipytyvõ chupekuéra oipuru porãve hag̃ua itiémpo? (EFESIOS 5:15, 16).
OJOTRATA VAI INTERNET RUPIVE
Internétpe ifasilve la héntepe ijarhél, itieʼỹ ha imaledukádo hag̃ua. Upévare oĩ heta noimportáiva chupe mbaʼéichapa oñeñandu hapichakuéra ha otrata vai ótrope.
Oĩ heta ojapóva upéva oipotágui oñepena hese térã orekoségui heta segidór. Oĩ avei opensáva ojetrata vaiha chupe ha oñeñandu vai ohechávo oĩ hague ojapóva peteĩ arréglo ha noinvitái chupe, por ehémplo peteĩ fiestítape.
EPENSAMÍNA: ¿Imaledukádopa ne família oipuru jave Internet? (Efesios 4:31). ¿Mbaʼéicha orreaksiona oñandu jave oñemboykeha chupe?
PORNOGRAFÍA
Koʼág̃arupi Internétpe ifasileterei jatopa hag̃ua umi páhina itieʼỹva. Ha tuakuéra oreko vaʼerã enkuénta oprogramáramo jepe umi komputadóra térã selulár ani hag̃ua osẽ koʼã mbaʼe, upéva ndahaʼeiha la iseguropáva.
Oĩ avei umi omondóva ojupe fóto térã vidéo itieʼỹva, ha upéva tuichaiterei operhudikáta chupekuéra. Por ehémplo, umi fóto térã vidéope osẽramo peteĩ menór de eda, ikatu hína oñedemanda chupekuéra omosarambi rupi pornografía infantíl.
EPENSAMÍNA: ¿Mbaʼéichapa ikatu eipytyvõ ne famíliape ani hag̃ua omondo térã orresivi umi fóto ha vidéo itieʼỹva? (EFESIOS 5:3, 4).
MBAʼÉPA IKATU REJAPO
EHEKOMBOʼE NE FAMÍLIAPE
Umi mitã ivaletereíramo jepe oipuru hag̃ua la teknolohía, lomímonte oikotevẽta ojegia chupekuéra. Peteĩ lívro heʼi voi ipeligrosoitereiha ñameʼẽ umi mitãme selulár térã Internet oiméramo neʼĩra oñemboʼe chupekuéra mbaʼéichapa ikatu ojeprotehe.
TÉXTO BÍBLICO: “Ehekomboʼe pe mitãme oho hag̃ua tape porãre, ha ijeda rire jepe nosẽmoʼãi upe tapégui” (PROVERBIOS 22:6).
Ehecha mbaʼe suherénsiapa eñehaʼãse esegi, térã eskrivi voi mbaʼépa ikatu ejapove.
Amboʼe che famíliape mbaʼéichapa oporotrata vaʼerã Internet rupive
Aipytyvõ che famíliape ani hag̃ua oñeñandu vai opensa jave oĩha omboykéva chupe
Aipuru umi konfigurasión oĩva guive pono osẽ che famíliape umi mbaʼe itieʼỹva
Pyʼỹi arrevisáta che família selulár
Haʼéta che famíliape mboy órapa ikatu oipuru káda día la iselulár
Aipeʼáta che famíliagui iselulár pyharekue oho mboyve oke
Napermitimoʼãi che famíliape oipuru iselulár rokaru aja