Peteĩ vúrro oñeʼẽ

NDÉPA rehendúmava peteĩ vúrro oñeʼẽramo? ‘Nahániri’, eréta. ‘Animalkuéra niko noñeʼẽi’. Péro la Biblia heʼi peteĩ vúrro oñeʼẽhague. Jahechami mbaʼéichapa oikorakaʼe upéva.

Umi isrraelíta oikepotaitéma Canaánpe. Balac, Moabpegua rréi, okyhyje umi isrraelítagui. Upévare ohekauka peteĩ kuimbaʼe katupyrýpe hérava Balaam ou hag̃ua omaldesi umi isrraelítape. Heʼi omeʼẽtaha chupe heta pláta, upévare Balaam ojupi hymba vúrro ári ha oho ohecha Balácpe.

Jehová ndoipotái Balaam omaldesi Ipuévlope. Upévare omondo peteĩ ánhel peteĩ espáda puku reheve, oñemboʼy hag̃ua tapépe ha ojoko Balaámpe. Balaam ndaikatúi ohecha pe ánhel, péro hymba vúrro ohecha. Pe vúrro oñehaʼã ojei pe ánhelgui, ha ipahápe oñeno pe tapépe. Balaam ipochyeterei, ha oinupã chupe peteĩ yvyrápe.

Upévare Jehová ohenduka Balaámpe pe vúrro oñeʼẽramo chupe. ‘Mbaʼéiko ajapo nderehe chenupã hag̃ua?’, oporandu pe vúrro.

‘Cheguerekóningo peteĩ výroramo’, heʼi chupe Balaam. ‘Aguerekórire peteĩ espáda, rojukavaʼerãmoʼã!’.

‘Ajapómavapa nderehe péicha?’, oporandu pe vúrro.

‘Nahániri’, heʼi Balaam.

Upémaramo Jehová oheja Balaámpe ohecha pe ánhel ijespáda reheve, oñemboʼýva pe tapépe. Pe ánhel heʼi: ‘Mbaʼére piko reinupã ne rymba vúrrope? Aju amboty hag̃ua ndehegui tape, pórke nderehoivaʼerã remaldesi Israélpe. Ne rymba vúrro nanemboykéirire chehegui, che rojukavaʼerãmoʼã ha hese ndajapoivaʼerãmoʼã mbaʼeve’.

Balaam heʼi: ‘Che apeka. Ndaikuaáikuri reimehague tapépe’. Pe ánhel oheja oho Balaámpe, ha Balaam oho meme Balac rendápe. Oñehaʼã gueteri omaldesi Israélpe, péro Jehová ovendesiuka chupe Israélpe tres vése.