David ha Goliat

UMI filistéo ou jeýma oñorairõ hag̃ua Israel ndive. Mbohapy David ermanokuéra tuichavéva oĩ Saúl ehérsitope. Upévare, peteĩ árape Jesé heʼi Davídpe: ‘Egueraha koʼã tembiʼu ha pán ne ermanokuérape. Ha tereho ehecha mbaʼéichapa oĩ hikuái’.

Og̃uahẽvo David pe ehérsito oĩhápe, odispara oho iñermanokuéra rekávo pe ñorairõ oikotahápe. Goliat, peteĩ filistéo tuichaitereíva, osẽ oñembohory hag̃ua umi isrraelítare. Upéicha ojapo oikóvo káda pyhareve ha kaʼaruete 40 día aja. Osapukái: ‘Peiporavo peteĩ oñorairõvaʼerã chendive. Ipuʼakáramo cherehe ha chejuka, ore pene rembiguairã. Péro che chepuʼakáramo hese ha ajuka chupe, peẽ ore rembiguairã. Che podesafia peiporavo hag̃ua peteĩ oñorairõvaʼerã chendive’.

David oporandu umi soldádope: ‘Mbaʼépa oñemeʼẽta pe ojukáva ko filistéope ha oipeʼáva Israélgui ko ñemotĩ?’.

‘Saúl omeʼẽta chupe heta mbaʼe’, heʼi peteĩ soldádo. ‘Ha omeʼẽta avei chupe itajýra hembirekorã.’

Péro umi isrraelíta okyhyje Goliátgui pórke haʼe tuichaiterei. Ipuku 3 métro rupi, ha oguereko peteĩ soldádo ogueraháva chupe ijeskúdo.

Upéi oĩ umi soldádo ohóva heʼi pe rréi Saúlpe David oñorairõseha Goliat ndive. Péro Saúl heʼi Davídpe: ‘Nde ndaikatúi. Ndéningo peteĩ mitãnte, ha haʼe katu soldádo ymaite guive’. David okontesta: ‘Che ajukavaʼekue peteĩ óso ha peteĩ león oguerahavaʼekue che ru ovechakuéra. Ha koʼág̃a ko filistéore ajapóta upeichaite avei. Jehová chepytyvõta’. Upévare Saúl heʼi: ‘Tereho upéicharõ, ha Jehová toĩ nendive’.

David oguejy peteĩ ysyrýpe ha oiporavo cinco ita ijapesỹi porãva ha omoinge imbaʼyrúpe. Upéi ogueraha pe ónda oguerekóva ha oho oñorairõ hag̃ua Goliat ndive. Ohechávo chupe Goliat, ndaikatúi oguerovia. Oimoʼã ndahasyietereitaha ojuka Davídpe.

‘Eju koʼápe’, heʼi Goliat, ‘ha ameʼẽta ne reʼõngue umi guyra ha animalkuérape’. Péro David heʼi: ‘Nde reju chéve peteĩ espáda ha peteĩ lánsa reheve, péro che aha ndéve Jehová rérape. Ko árape Jehová nemeʼẽta che pópe ha che rojukáta’.

Upéi David odispara Goliat oĩha gotyo. Oguenohẽ imbaʼyrúgui peteĩ ita, ha omoĩ pe ónda oguerekóvape, ha ohaʼã Goliátpe imbaretekue omeʼẽháicha chupe. Pe ita oike Goliat akãre, ha hoʼa omano! Umi filistéo ohechávo yvýpe pe ijeroviaha, odisparapa hikuái. Umi isrraelíta omuña chupekuéra ha ogana pe ñorairõ.