Israel osẽ Babilóniagui

HAIMETE dos áñoma ohasa médo ha persakuéra ojagarrahague Babilonia. Ha emañami mbaʼépa oiko koʼág̃a! Heẽ, isrraelitakuéra osẽhína Babilóniagui. Mbaʼéichapa osẽ hikuái upégui? Mávapa opoi chuguikuéra?

Upéva ojapo Ciro, pe rréi Persiaygua. Heta tiémpo Ciro onase mboyve, Jehová oskriviuka iproféta Isaíaspe ko mbaʼe chugui: ‘Rejapóta che aipotáva. Umi okẽ ojehejáta ndéve nandi ikatu hag̃ua rejagarra pe siuda’. Ha Ciro ojagarra Babilonia. Umi médo ha persakuéra oike pe siudápe pyharekue ojeheja rupi nandi umi okẽ.

Péro Isaías Jehová proféta heʼivaʼekue avei Ciro omopuʼãuka jeytaha Jerusalén ha itémplo. Ojapoukápa upéva pe rréi Ciro? Ojapouka. Heʼi umi isrraelítape: ‘Tapeho Jerusalénpe, ha pemopuʼã upépe Jehová, pende Dios, témplo’. Ha upéva oho ojapo umi isrraelíta.

Péro naenterovéi umi isrraelíta oĩva Babilóniape ikatu ojapo pe viáhe puku Jerusalénpe. Haʼe peteĩ viáhe puku oguerekóva 800 kilómetro rupi, ha heta isrraelitakuéra itujaitereíma térã hasypáma oho hag̃ua. Ha ndahaʼéi upévagui añónte. Péro umi ndohomoʼãivape, Ciro heʼi: ‘Pemeʼẽ pláta ha óro ha hetave rregalokuéra umi ohótavape omopuʼã hag̃ua Jerusalén ha itémplo’.

Upévare, umi isrraelíta ohótava Jerusalénpe orresivi heta rregálo. Ciro avei omeʼẽ umi tasón ha kópa pe rréi Nabucodonosor oipeʼavaʼekue Jehová témplogui ohundírõ guare Jerusalén. Pe puévlo heta mbaʼe ogueraha.

Oviaha rire cuatro mése rupi, umi isrraelíta og̃uahẽ Jerusalénpe haʼetépe. Ojapo 70 áño oñehundihague pe siuda, ha pe tetã opytahague henteʼỹre. Péro, oĩ jeýramo jepe isrraelitakuéra hetãme, ohasáta hikuái heta jejopýre, jahechataháicha.