Umi murálla oĩva Jerusalénpe

EMAÑAMI mbaʼeichaitépa oñembaʼapo jejopy koʼápe! Umi isrraelitakuéra omopuʼãhína Jerusalén murálla. Nabucodonosor ohundírõ guare Jerusalén, 152 áño upe mboyve, oitypavaʼekue umi murálla ha ohapypa pe siuda rokẽ. Umi isrraelíta nomopuʼãivaʼekue umi murálla ou jeýrõ guare Babilóniagui.

Mbaʼéichapa reimoʼã oñeñanduhague hikuái oikóvo heta áño peteĩ siuda imurallaʼỹvape? Okyhyje hikuái. Iñenemigokuérape ndahasymoʼãi oataka chupekuéra. Péro, ipahápe, ko kuimbaʼe hérava Nehemías oipytyvõ chupekuéra omopuʼã jey hag̃ua Jerusalén murálla. Ndépa reikuaa mávapa Nehemías?

Nehemías haʼe peteĩ isrraelíta oúva Súsagui, pe siuda oikoha Mardoqueo ha Ester. Haʼe ombaʼapovaʼekue pe rréi palásiope, upévare haʼenerakaʼe Mardoqueo ha Ester amígo. Péro la Biblia ndeʼíri Nehemías ombaʼapohague Ester ménape g̃uarã, pe rréi Asuero. Ombaʼapo upe riregua rréipe g̃uarã, Artajerjes.

Nemanduʼáne, Artajerjes haʼe pe rréi ivuénova omeʼẽvaʼekue Ésdraspe heta pláta ogueraha hag̃ua Jerusalénpe ha omyatyrõ Jehová témplo. Péro, Esdras nomopuʼãi pe siuda murálla hoʼapavaʼekue. Jahechami mbaʼéicha rupípa Nehemías ojapo ko mbaʼe.

Ohasáma 13 áño Artajerjes omeʼẽhague pe pláta Ésdraspe omyatyrõ hag̃ua pe témplo. Koʼág̃a Nehemías haʼe pe rréi Artajerjes kopéro prinsipál. Oservi víno rréipe ha ohecha ndoguerekóipa venéno. Ko tembiapo iñimportánte.

Peteĩ árape, Hananí, Nehemías ermáno ha ótro kuimbaʼekuéra oikóva Israélpe ou ovisita Nehemíaspe. Omombeʼu chupe umi provléma oguerekóva isrraelitakuéra, ha Jerusalén murálla neʼĩraha oñemopuʼã. Nehemías ombyasyeterei, ha oñemboʼe Jehovápe ko mbaʼére.

Peteĩ árape, pe rréi ohechakuaa Nehemías ndovyʼaiha, ha oporandu chupe: ‘Mbaʼére piko nderevyʼái?’. Nehemías heʼi chupe mbaʼérepa: Jerusalén oĩ vai ha umi murálla hoʼapa. ‘Mbaʼépa reipota?’, oporandu pe rréi.

‘Cherejána taha Jerusalénpe’, heʼi Nehemías, ‘ikatu hag̃uáicha amopuʼã jey umi murálla’. Artajerjes ipyʼaporãiterei. Heʼi chupe ikatuha oho, ha oipytyvõ chupe okonsegi hag̃ua yvyra pe konstruksiónpe g̃uarã. Og̃uahẽ riremi Jerusalénpe, Nehemías omombeʼu pe puévlope mbaʼépa ojapose. Chupekuéra iporã pe ojaposéva, ha heʼi hikuái: ‘Ñañepyrũ katu ñambaʼapo’.

Umi isrraelíta enemigokuéra ohechávo oñemopuʼãha pe murálla, heʼi hikuái: ‘Jaha jajukapa chupekuéra ha jajoko pe tembiapo’. Nehemías oikuaávo upéva, omeʼẽ umi ombaʼapóvape espáda ha lánsa ha heʼi chupekuéra: ‘Aníke pekyhyje chuguikuéra. Peñorairõ pene ermáno, pende raʼy, pene rembireko, ha pende róga rehehápe’.

Pe puévlo ipyʼaguasu. Oĩ hikuái armádo ára ha pyhare, ha osegi ombaʼapo. Upévare, 52 día haguépe oñemopuʼãmbáma pe murálla. Koʼág̃a isegúroma hikuái Jerusalénpe. Nehemías ha Esdras omboʼe Ñandejára léi, ha pe puévlo ovyʼa.

Péro ndahaʼéi gueteri isrraelitakuéra ojegueraha mboyvérõ guaréicha prisionéro Babilóniape. Pe rréi Persiaygua ogoverna ha pe puévlo oservivaʼerã chupe. Péro Jehová opromete omboutaha peteĩ rréi pyahu, oguerútava pyʼaguapy pe puévlope. Mávapa ko rréi? Mbaʼéichapa oguerúta pyʼaguapy ko Yvy ape ári? Ohasa jey 450 áño rupi ojekuaave hag̃ua ko mbaʼégui. Upe rire onase peteĩ mitã iñimportantetereíva. Péro upéva haʼéma ótra istória.