Esteban ojejuka itápe

PE KUIMBAʼE oñesũva haʼe Esteban, peteĩ Jesús disípulo ifiélva. Péro ehechami mbaʼépa ojejapohína hese! Koʼã kuimbaʼe ojapihína chupe umi ita tuichaichávape. Mbaʼére piko ndaijaʼeiete Esteban rehe ojapo hag̃ua hese péicha? Jahechamína.

Ñandejára oipytyvõkuri Estébanpe ojapo hag̃ua heta milágro iporãva. Koʼã kuimbaʼépe ndogustái upéva, ha ojodiskuti Esteban ndive omboʼehaguére pe añetegua umi héntepe. Péro Ñandejára omeʼẽ Estébanpe arandu, ha haʼe ohechauka umi kuimbaʼe omboʼehague oikóvo japu. Upéva ombopochyve chupekuéra ha ojagarra hikuái Estébanpe ha ogueru hénte heʼi hag̃ua japu hese.

Pe saserdóte guasu oporandu Estébanpe: ‘Añete piko koʼã mbaʼe heʼíva hikuái?’, Esteban okontesta omeʼẽvo peteĩ diskúrso neporãva Ñandejára Ñeʼẽgui. Opakuévo heʼi ymaite guive oĩmahague umi kuimbaʼe iñañáva ndaijaʼéiva Jehová profetakuérare. Ha upéi heʼi: ‘Peẽ upeichaite avei. Pejuka Jesúspe, upe Ñandejára siérvo, ha ndapejapói Ñandejára léi heʼíva’.

Upéva ombopochyeterei umi líder rrelihiósope! Ipochyetereígui oñehembe suʼupa. Péro Esteban omaʼẽ yvate gotyo ha heʼi: ‘Pemaʼẽ! Ahecha Jesúspe amo yvágape oñemboʼyhína Ñandejára deréchape’. Umi kuimbaʼe omboty ijapysa ha oataka chupe. Ojagarra hikuái Estébanpe ha ombotyryry oguenohẽ meve pe siudágui.

Koʼápe oipeʼa hikuái imantokuéra ha omeʼẽ pe kariaʼy hérava Sáulope oñatende hag̃ua hese. Rehechápa Sáulope? Upéi umi kuimbaʼe apytégui oĩ oñepyrũva ojapi Estébanpe itápe. Haʼe oñesũ, rehechaháicha koʼápe, ha oñemboʼe Ñandejárape: ‘Jehová, ani rekastiga chupekuéra ko mbaʼe vai ojapóvare’. Haʼe oikuaa umíva apytépe oĩha umi líder rrelihióso ombotavyvaʼekue. Upéva heʼi rire Esteban omano.

Oĩrõ ojapóva mbaʼe vai nderehe, reñehaʼãpa nde avei rejapo mbaʼe vai hesekuéra, térã rejerure Ñandejárape okastiga hag̃ua chupekuéra? Esteban ha Jesús ndojapoivaʼekue upéva. Haʼekuéra ivuenovaʼekue umi iñañáva ndive avei. Ñañehaʼãvaʼerã jajapo upéicha.