Párte 1
Añetehápepa Ñandejára ojepyʼapy ñanderehe?
1, 2. Mbaʼépa oikuaase Ñandejáragui heta tapicha, ha mbaʼérepa?
OIMÉNE nde sapyʼánte reñeporandúma: ‘Oĩramo peteĩ Ñandejára ojepyʼapýva ñanderehe, mbaʼére piko oheja yvyporakuéra ohasa asyeterei?’ Opavavete katuete jahasa asýma térã jaikuaa peteĩ tapicha ohasa asy vaʼekue.
2 Ymaite guive oĩva voínte ohasa asýva oĩgui umi ñorairõ guasu, térã ipyʼahatãva hendivekuéra, ndaipórigui tekojoja, imboriahúgui, térã omanógui hapichakuéra ohayhúva. Pe síglo véintepente voi umi ñorairõ guasu ojuka hetaiterei tapichápe. Ha hetaitereive oĩ opyta vaíva, térã hóga ha umi mbaʼe oguerekóva oñehundipáva. Ko tiémpo jahasávape umi mbaʼe vaieta hetápe ombohasa asy, omyasẽ, ha heta oĩ nohaʼarõvéimava mbaʼeve iporãva.
3, 4. Mbaʼépa heʼi heta tapicha Ñandejára ohejahaguére oĩ pe jehasa asy?
3 Oĩ heta tapicha opytáva ipyʼaro ha oimoʼãva oĩramo Ñandejára añetehápe ndojepyʼapyiha ñanderehe. Oĩ katu umi heʼíva ndaiporiha voi Ñandejára. Pór ehémplo peteĩ kuimbaʼe ojepersegi heta vaʼekue pe I Guerra Mundiálpe ndahaʼéigui hapichakuéra rrása rehegua, ha iñamigokuéra ha hogayguakuéra ojejukapavaʼekue, oñeporandu: “Moõ piko oiméraʼe Ñandejára roikotevẽ jave hese?”. Oĩ avei peteĩ kuimbaʼe, ojesalvavaʼekue pe II Guerra Mundiálpe umi nazi ojukahaguépe hetaiterei tapichakuéra, hasyetereíva chupe ohechávo mbaʼeichaitépa ojehasa asy, ha heʼivaʼekue: “Oĩramo peteĩ oheréiva che korasõ, oñeenvenenáne katuete”.
4 Ha upéicha, heta ñande rapicha ndaikatúi ontende mbaʼérepa peteĩ Ñandejára imbaʼeporãva oheja oiko umi mbaʼe vai. Ndogueroviapái Ñandejára ojepyʼapyha añetehápe ñanderehe, térã oĩha Ñandejára. Ha heta oĩ heʼíva yvyporakuéra ohasa asýnte vaʼerãha voi.
[Nóta oĩva taʼanga ndive páhina 2 ha 3]
Og̃uahẽmbotámapa peteĩ múndo pyahu ndaiporimoʼãihápe jehasa asy?