Párte 7

Mbaʼépa oiko oñepuʼã rire Ñandejárare?

1-3. Mbaʼéichapa pe tiémpo ohasáva ohechauka añetehague pe Jehová heʼivaʼekue?

OÑEMBOHOVÁI rire pe derécho Ñandejára orekóva oisãmbyhy hag̃ua, mbaʼépa ohechauka umi yvypóra goviérno oĩmava heta síglore? Ohechaukápa yvyporakuéra ogoverna porãveha Ñandejáragui? Jahechávo pe istóriape umi mbaʼe vaieta ojapóva yvyporakuéra hapicháre, jaʼekuaa ndaupeichaieteha.

² Ñande ru ha ñande sy ypykue omboykévo Ñandejára goviérno, ogueru ñandéve umi mbaʼe ivaietereíva. Ogueru heta jehasa asy ijupekuéra g̃uarã ha mayma yvyporakuérape g̃uarã. Haʼekuérante ojapo upéva ijehe. Ñandejára Ñeʼẽ heʼi: ‘Ojapo hikuái pe ivaíva ijeheguieténte; haʼekuéra ndahaʼéi itaʼýra; pe oĩ vaíva chuguikuérante ou’ (Deuteronomio 32:5, NM).

³ Pe istória ohechauka añetehague pe Ñandejára heʼivaʼekue Adán ha Évape, oñembyaitaha ha upéi omanotaha hikuái omboykéramo Ñandejára ñeʼẽ (Génesis 2:17; 3:19). Haʼekuéra omboyke Ñandejára goviérno ha upévare oñembyai ha upéi omano.

4. Mbaʼérepa maymáva ñanase imperfékto, ñanderasy ha ñamano?

⁴ Romanos 5:12-pe oñemombeʼu pe ojehúva upéi Adán ñemoñarépe: “Pe pekádo oikehaguéicha yvy ári peteĩ kuimbaʼe rupi [Adán, yvyporakuéra ypykue] ha pekádo rupi oike pe ñemano, upéicha avei pe ñemano ohasa opavavépe opavave opekágui”, [VP]. Upéicha, ñande ru ha ñande sy ypykue opuʼãvo Ñandejára sãmbyhýre, oiko chuguikuéra pekadór. Pe léi genética-pe oĩháicha, ombohasámante hikuái iñemoñarekuérape pe imperfeksión oúva opuʼãhaguére Ñandejárare. Upévare maymáva ñanase imperfékto ha ñanderasy ha ñamano.

5, 6. Ohechaukápa pe istória yvyporakuéra ikatuha ogueru pyʼaguapy ha jeiko porã?

⁵ Heta sígloma ohasa. Ojupi ha okúima heta goviérno. Opaichagua goviérnoma ojeporu. Upéicharamo jepe, yvyporakuéra ohasa jey jey heta mbaʼe vaíre. Ohasáma 6.000 áño ha ikatúma kuri ñahaʼarõ yvyporakuéra ohupyty pe pyʼaguapy, tekojoja ha jeiko porã ko yvy ape ári. Avei yvyporakuéra ikatumavaʼerãmoʼã ohechauka pyʼaporã, poriahuvereko ha ombaʼapo oñondivepa.

⁶ Péro, añetehápe pe oikóva ko múndope ndahaʼeiete upéicha. Ni peteĩ yvypóra goviérno ndoguerúi gueteri koʼág̃a peve pyʼaguapy ha jeiko porã opavavépe g̃uarã. Pe síglo véintepente voi, millones tapichakuéra ojejuka pe Holocausto-pe, ha umi ñorairõhápe hetave 100 millónesgui ojejuka. Ko ñane tiémpope heta tapichápe oñembohasa asy, ojejuka térã oñemoinge préso, ndaikatúigui ojogueraha porã ha ojoavyhaguére pe polítikape.

Mbaʼépa jahechañaína koʼág̃a

7. Mbaʼéichapa oiko yvyporakuéra koʼág̃a rupi?

⁷ Avei, jahechamína mbaʼéichapa oikohína yvyporakuéra koʼág̃a. Hetaiterei umi tembiapo vai ha violénsia. Opárupi ojeporu vai pe dróga. Umi mbaʼasy ováva umi rrelasión seysuál rupive isarambi opárupi rei. Hetaiterei tapichápema ojagarra pe mbaʼasy vaiete hérava SIDA. Hetaiterei omano káda áño ñembyahýi ha mbaʼasýgui, ha mbovymi oĩ umi ipláta hetaitereíva. Yvyporakuéra omongyʼa ko Yvy ha oiporu vai umi mbaʼe oĩva ipype. Jahahápe noñemombaʼevéi pe família ha teko potĩ. Añetehápe, umi mbaʼe oikóvare ojekuaa mbaʼeichaitépa ogoverna vai Satanás, “ko múndo ruvicha”. Satanás múndope ndaipóri mborayhu, oĩ pyʼahatã ha ojejapo opa mbaʼe vai (2 Corintios 4:4).

8. Ikatúpa jaʼe ogueraha porãha yvyporakuérape umi mbaʼe ohupytýva?

⁸ Ñandejára omeʼẽmbaite yvyporakuérape tiémpo ohupyty hag̃ua pe iporãvéva pe siénsiape ha opaite hembiapokuérape. Péro, ikatúpa jaʼe jaha porãveha pe árko ha flécha rekovia ojejapóramo umi ametralladóra, tánke, avión ipyaʼéva opoi hag̃ua vómba ha umi misíl nukleár? Oho porãvépa añetehápe yvyporakuérape ikatúramo oho pe jasýpe péro ndaikatúi oiko pyʼaguapýpe oñondivepa ko yvy ape ári? Oho porãvépa hentekuéra okyhyjéramo oguata hag̃ua kállere pyharekue, ha arakuépe jepe heta henda rupi?

Mbaʼépa ojehecha koʼág̃a peve

9, 10. a) Mbaʼépa ohechauka porã umi mbaʼe oikovaʼekue koʼág̃a peve? b) Mbaʼérepa Ñandejára ndoipeʼamoʼãi ñandehegui pe liverta jaiporavo hag̃ua?

⁹ Umi mbaʼe oikóva koʼág̃a peve ohechauka yvyporakuéra ndaikatuiha oiko porã Ñandejaraʼỹre, ndaikatuiháicha oiko okaru, hoyʼu ha orrespiraʼỹre. Ko mbaʼe hesakã porãma: Ñaikotevẽ pe ñande Apohare sãmbyhýre, ñaikotevẽháicha tembiʼu, y ha yvytúre.

¹⁰ Ohejávo oiko umi mbaʼe vai, Ñandejára ohechauka porãma opa ára g̃uarã mbaʼéichapa ñasẽ vai katuete jaiporu vaíramo pe liverta jaiporavo hag̃ua. Upéva ningo peteĩ jopói iporãitereíva ha oipeʼarangue ñandehegui Ñandejára oheja jahecha mbaʼépepa ñasẽ jaiporu vaíramo. Ñandejára Ñeʼẽ omombeʼu pe añetegua heʼívo “yvypóra ndahaʼeiha hekove jára, ndoikuaaiha mbaʼépa oikóta chugui”. Avei añete pe heʼíva: “Opa ojejapóva ko yvy apére ha mbaʼekuaa oguerekóva yvypóra ojapo hag̃ua ivaíva hapicháre” (Jeremías 10:23; Eclesiastés 8:9).

11. Oĩmapa peteĩ yvypóra goviérno ikatúva oipeʼa pe jehasa asy?

¹¹ Jehová ohejávo yvyporakuéra ogoverna 6.000 áño aja, ohechauka porãma haʼekuéra ndaikatuiha oipeʼa pe jehasa asy. Ndaikatúi gueteri koʼág̃a peve ojapo hikuái upéva. Pór ehémplo, pe rréi Salomón oisãmbyhyvaʼekue Israel iñarandu, ipoderóso ha orekóramo jepe heta mbaʼe, ndaikatúinte avei oipeʼapa pe jehasa asy oguerúva yvypóra goviérno (Eclesiastés 4:1-3). Upéicha avei, umi governánte koʼag̃agua oiporúramo jepe pe teknolohía ipyahuvéva, ndaikatúi oipeʼa pe jehasa asy. Ha ivaive hag̃ua katu, pe istória ohechauka umi yvyporakuéra omboykéva Ñandejárape ombohetaveha pe jehasa asy, oipeʼarangue.

Ñandejára oikuaáma yma guive mbaʼépa ojapóta

12-14. Mbaʼeichagua venefísiopa oguerúta opa ára g̃uarã pe jehasa asy Ñandejára ohejáva oiko?

¹² Ñandejára ohejávo oĩ pe jehasa asy, opavavépe ñanderupytypa. Péro haʼe ohecha puku, ha oikuaa oñesẽtaha heta mbaʼe porãme. Pe Ñandejára ojapóva oguerúta mbaʼe porã yvyporakuérape ndahaʼéi sapyʼamínte síno opa ára g̃uarã.

¹³ Oĩ jeýramo peteĩ oiporu vaíva pe liverta jaiporavo hag̃ua ha osẽva heʼi Ñandejára ojavyha, natekotevẽmoʼãvéima oñemeʼẽ chupe tiémpo ohechauka hag̃ua añetépa upe heʼíva. Omeʼẽvo umi hese oñemoĩvape hetaite tiémpo koʼág̃a peve, Ñandejára ohechauka porãma mávapa heʼi pe añeteguáva ha ikatúta oiporu upéva oimehápe ha opa ára g̃uarã.

¹⁴ Jehová ohejágui pe mbaʼe vai ha jehasa asy koʼág̃a peve, ojehechauka porãma ndaikatuiha osẽ porã mbaʼeve ojejapóva heseʼỹ. Ojehechauka porãma ndaikatuiha ogueru mbaʼeve iporãva peteĩ tembiapo omoñepyrũva yvypóra térã ánhel omboykéva Ñandejárape. Upévare Ñandejára ohundintemavaʼerã upepete oimeraẽ hese opuʼãvape. “Umi heko vaívape katu haʼe ohundí[ta]” (Salmo 145:20; Romanos 3:4).

[Nóta oĩva taʼanga ndive páhina 15]

Ñande ru ha ñande sy ypykue omboyke rire Ñandejárape ou ituja ha upéi omano

[Nóta oĩva taʼanga ndive páhina 16]

Yvypóra goviérno omboykéva Ñandejárape mbaʼe vaímante ogueru

[Roagradese]

Fóto U.S. Coast Guard