Párte 11
Oñemoĩhína peteĩ simiénto pe múndo pyahúpe g̃uarã
1, 2. Mbaʼépa jahechañaína oikoha ohechaukáva oñekumpliha pe Ñandejára Ñeʼẽ heʼivaʼekue?
AVEI iporã pe oñemoĩva ohóvo koʼág̃ama voi peteĩ simiénto pe múndo pyahúpe g̃uarã, ha upe aja Satanás múndo tuja ivai vaive ohóvo. Koʼág̃a jahechañaína mbaʼéichapa Ñandejára ombyaty tapichakuéra opa tetãgui ojapo hag̃ua umívagui pe múndo pyahu simientorã, oĩtava ko yvýpe pe múndo vai rekovia. Ñandejára Ñeʼẽme, 2 Pedro 3:13-pe, oñehenói chupekuéra “yvy ipyahúva”.
2 La Biblia heʼi avei: ‘Ha og̃uahẽvo huʼãme umi ára [koʼã ára jaikoha] [...] heta tetã añetehápe ohóta ha heʼíta: “Peju, ha jajupi Jehová montáñape [pe adorasión añeteguáva] ha haʼe ñanerekomboʼéta hapégui, ha añetehápe jaikóta hapére”’ (Isaías 2:2, 3, NM).
3. a) Máva mávarepa oñekumpli Isaías profesía? b) Mbaʼépa heʼi upévare pe último lívro oĩva Ñandejára Ñeʼẽme?
3 Koʼág̃a pe profesía oñekumpli umi ‘Ñandejára rapére oikóva’ apytépe. Pe último lívro oĩva la Bíbliape heʼi koʼã tapicha ohayhúva pyʼaguapy haʼeha “peteĩ aty guasu [...], opa tetã, ha tetãygua, ha trívu, ha ñeʼẽ rehegua”, peteĩ aty ojoayhúva oñoermánoicha ha oservíva oñondivepa Ñandejárape. Heʼi avei: “Koʼãva niko umi ouvaʼekue pe jehasa asy guasúgui”. Péva heʼise noñehundimoʼãiha hikuái ko múndo vaiete oñehundi vove (Revelación 7:9, 14, VP; Mateo 24:3).
Tapichakuéra opa tetãgui ojoayhúva oñoermánoicha
4, 5. Mbaʼéicha rupípa umi testigo de Jehová osẽva opa tetãgui ijaty ha ojoayhu oñoermánoicha?
4 Hetaiterei Testigo de Jehová oñehaʼã ipyʼaite guive oiko hag̃ua Ñandejára rapére ha haʼe omboʼeháicha. Ohaʼarõ hikuái pe jeikove opaʼỹva oĩtava Ñandejára múndo pyahúpe. Iñeʼẽrendúvo Ñandejárape opa mbaʼépe, ohechauka chupe oñemoĩseha isãmbyhy poguýpe, koʼág̃a ha pe múndo pyahúpe avei. Opárupi, tapichakuéra opaichagua pire kolór ha opaichagua tetãgui, peteĩcha ojapo umi mbaʼe Ñandejára omoĩva Iñeʼẽme. Upévare oiko chuguikuéra peteĩ aty Ñandejára ojapóva pe múndo pyahúpe g̃uarã, osẽva opa tetãgui, ojoayhúva oñoermánoicha (Isaías 54:13; Mateo 22:37, 38; Juan 15:9, 14).
5 Umi Testigo de Jehová ndeʼíri oĩha pe aty ijojahaʼỹvape haʼekuéra ikatupyry rupínte. Oikuaa ohupytyha hikuái upéva ojapógui Ñandejára léipe heʼiháicha ha ijespíritu oipytyvõgui chupekuéra (Hechos 5:29, 32; Gálatas 5:22, 23). Ñandejára haʼehína pe ojapóva upéva. Heʼihaguéicha Jesús, ‘kuimbaʼekuéra ikatuʼỹva ojapo Ñandejára ikatu ojapo’ (Lucas 18:27, VP). Ñandejára, pe ojapovaʼekue ko univérso oĩtava opa ára g̃uarã, ombyatyhína umi tapicha oĩtava pe múndo pyahúpe opa ára g̃uarã avei.
6. Mbaʼérepa ikatu jaʼe haʼeha peteĩ milágro pyahu pe joayhu ijojahaʼỹva oĩva testigo de Jehová apytépe?
6 Ñandejára koʼág̃a ojapóma heta mbaʼe omoñepyrũ hag̃ua pe múndo pyahu, ha péicha ohechauka mbaʼéichapa ogovernáta pe múndo pyahúpe. Ikatu ojeʼe haʼeha peteĩ milágro pyahu pe Ñandejára ojapóva umi Testígogui. Mbaʼérepa? Ombyaty rupi chupekuéra opa tetãgui, ha ojoayhúgui hikuái oñoermánoicha. Ko aty naisarambimoʼãi arakaʼeve oñemombaʼevégui peteĩ tetã, rrása térã rrelihión. Oĩrõ jepe millones umi Testigo, ha oikóramo jepe heta tetãme, koʼág̃a 235-pe, oiko hikuái peteĩ ñeʼẽme ikatuʼỹre avave upéva ombyai. Ko aty ojoayhúva oñoermánoicha, ndojehecháiva gueteri koʼág̃a peve, añetehápe haʼe peteĩ milágro pyahu... Ñandejára rembiapokue (Isaías 43:10, 11, 21; Hechos 10:34, 35; Gálatas 3:28).
Mbaʼéicha ikatu jaikuaa mávapa Ñandejára puévlo
7. Mbaʼéichapa heʼi Jesús ojekuaataha mávapa umi hemimboʼe añetéva?
7 Mbaʼéichapa avei ikatu jaikuaa mávapa pe puévlo Ñandejára oiporúva omoñepyrũ hag̃ua imúndo pyahu? Ha mávapa ojapo Jesús heʼihagueichaite Juan 13:34, 35-pe? Haʼe heʼi: “Ko tembiapoukapy ipyahúva aheja peẽme: Pejoayhúkena. Ha che pohayhuhaguéicha, pejoayhu avei peẽ. Peẽ pejoayhúramo, opavave ohechakuaáta peẽ haʼeha che remimboʼe”. Opavave testigo de Jehová oguerovia ha ojapo pe Jesús heʼihaguéicha. Ñandejára Ñeʼẽ heʼiháicha, “mborayhu tuicháva” oĩ ijapytepekuéra (1 Pedro 4:8). ‘Oñemonde hikuái mborayhúgui, haʼégui pe mbaʼe oporombojoaju porãva’ (Colosenses 3:14). Upéicha pe mborayhu, pe seméntoicha, ombojoaju chupekuéra ojuehe oĩmba hag̃ua peteĩ ñeʼẽme oparupiete ko yvy ape ári.
8. Mbaʼéichapa 1 Juan 3:10-12 ñanepytyvõ jaikuaa hag̃ua mávapa Ñandejára puévlo?
8 Avei, 1 Juan 3:10-12-pe heʼi: ‘Upéicha ojekuaa mávapa umi Ñandejára raʼýva ha mávapa umi aña raʼýva, opavave umi ndojapóiva pe hekopeteguáva térã ndohayhúiva iñermánope ndahaʼéi Ñandejára raʼy. Pe ñeʼẽ pehenduvaʼekue iñepyrũha guive niko kóva: jajohayhúkena. Ha ani Caíncha, aña mbaʼe vaʼekue haʼe ha ojuka tyvýrape [iñermánope]’ [VP]. Jahechaháicha, Ñandejára puévlo ojoayhu oñoermánoicha, ha noñorairõi avave ndive.
Mbaʼéichapa ikatu ojekuaa avei
9, 10. a) Mbaʼeichagua tembiapo rupípa ojekuaáta mávapa oservi Ñandejárape koʼã ára pahápe? b) Mbaʼéichapa ojapo umi testigo de Jehová pe heʼíva Mateo 24:14-pe?
9 Oĩ avei ambue mbaʼe ohechaukáva ñandéve mávapa oservi Ñandejárape. Pe profesía Jesús heʼihaguépe ko múndo oñehunditaha, omombeʼu heta mbaʼe ohechaukáva hiʼag̃uimaha pe ára paha (Ehecha Párte 9). Peteĩ mbaʼe ojekuaa porã vaʼerã ko profesíagui oĩ Mateo 24:14-pe: ‘Ha pe Ñandejára rréino rehegua ñeʼẽ oñemoherakuãvaʼerã opárupi, opa tetãygua oikuaa hag̃ua, ha upe rire katu og̃uahẽvaʼerã pe ipaha [fín]’ [VP].
10 Oikópa pe profesía heʼivaʼekue? Oikopaite. Oñepyrũ guive umi ára paha 1914-pe, umi testigo de Jehová oikuaauka opárupi pe marandu porã Ñandejára Sãmbyhy rehegua, umi tapicha róga rupi Jesús heʼihaguéicha (Mateo 10:7, 12; Hechos 20:20). Millones umi Testigo oho hapicha rendápe oparupiete oñeʼẽ hag̃ua chupekuéra pe múndo pyahu rehe. Haʼekuéra avei ojapo ha omosarambi heta kuatiañeʼẽ oñeʼẽva Ñandejára Goviérnore. Upéicha rupi nde rehupyty avei ko folléto. Reikuaápa nde mávapa haʼekuéraicha opredika avei umi ogaha rupi Ñandejára Sãmbyhýgui oparupiete? Ha Marcos 13:10 ohechauka oñemoherakuã ha oñemboʼe “raẽ” vaʼerãha opa tetã rupi pe marandu porã og̃uahẽ mboyve pe fín.
Mbaʼéichapa oñembohovái pe mbaʼe ojekuaasevaʼekue avei
11. Mbaʼépa avei ohupyty umi testigo de Jehová oñemoĩvo Ñandejára poguýpe?
11 Ojapóvo opa mbaʼe Ñandejára oipotáva, umi testigo de Jehová ohupyty avei peteĩ mbaʼe. Ohechauka hikuái Satanás ijapuhague heʼírõ guare yvyporakuéra ohejataha Ñandejárape ojejopy vaíramo. Péicha ombohovái hikuái pe porandu mokõiha ojekuaasevaʼekue (Job 2:1-5). Millones umi Testigo oĩva opárupi, ohechauka peteĩcha ojeroviaha Ñandejára goviérnore. Iñimperféktoramo jepe yvyporakuéra, ha Satanás ojopýramo jepe chupekuéra, oñemoĩ hikuái Ñandejára ykére ohechaukávo mávapa iderécho oisãmbyhy hag̃ua opaite mbaʼe.
12. Máva mávapepa ohaʼanga ijeroviápe umi Testigo?
12 Koʼág̃a hetaiterei testigo de Jehová opredika ojapohaguéicha umi Testigo yma guare, ohechaukavaʼekue ojeroviaha Ñandejárare. Umíva apytépe oĩvaʼekue Abel, Noé, Job, Abrahán, Sara, Isaac, Jacob, Débora, Rut, David ha Daniel, ha oĩ hetave (Hebreos, kapítulo 11). Heʼiháicha la Biblia, koʼãva haʼehína umi heta Testigo ojeroviavaʼekue Ñandejárare (Hebreos 12:1). Koʼãva, ha avei umi Jesús remimboʼekuéra, ojerovia meme vaʼekue Ñandejárare. Ha Jesús avei arakaʼeve ndohejái Ñandejárape ha péicha omoĩ pe ehémplo iporãvéva.
13. Mbaʼépa Jesús heʼivaʼekue Satanás rehe ojehecháva añeteha?
13 Péva ohechauka añetehague pe Jesús heʼivaʼekue Satanás rehe umi rrelihión omoakãvape: “Upéva rangue katu che haʼéramo jepe peẽme pe añetegua, che Ru chemboʼehaguéicha, peẽ chejukase. [...] Pende ru niko aña; ha peẽ imbaʼe, ha pejapose hembipota. Aña niko porojukaharavaʼekue iñepyrũha guive, ha ijapueterei ha ndaiporiete pe añeteguamíva ipype. Oñeʼẽramo japúmante heʼi; ijapúgui ha japu rúgui voi haʼe” (Juan 8:40, 44, VP).
Mbaʼépa nde reiporavóta?
14. Mbaʼépa oikohína pe múndo pyahu simientorã rehe?
14 Pe simiénto pe múndo pyahúpe g̃uarã Ñandejára ojapovahína umi testigo de Jehovágui, imbarete mbareteve ohóvo. Oikuaa porãgui pe añetegua Ñandejáragui, káda áño hetaiterei tapicha oiporu iliverta oiporavo hag̃ua, ha oñemoĩ Ñandejára goviérno ndive. Oike hikuái pe aty pyahu apytépe oĩva pe múndo pyahúpe g̃uarã, oñemoĩ Ñandejára ykére ojehechauka hag̃ua mávapa iderécho oisãmbyhy hag̃ua opaite mbaʼe, ha ohechauka hikuái Satanás ijapuha.
15. Mbaʼeichagua jeporavópa ojapóta Jesús?
15 Oiporavóvo Ñandejára goviérno, ojapóma pe oñekotevẽva oñemoĩ hag̃ua chupekuéra Cristo deréchape haʼe oipeʼáta vove ojuehegui “umi ovecha” ha “umi kavara”. Jesús heʼi mbaʼépa oikóta hiʼag̃uívo pe ára paha: “Ha opa tetãmeguakuéra, oñembyatypavaʼerã henondépe, ha haʼe oipeʼavaʼerã ojuehegui, ku ovecha rerekua oipeʼaháicha ijovechakuéra ikavarakuéragui. Omoĩvaʼerã umi ovecha ijakatúa gotyo ha umi kavara katu ijasu gotyo”. Umi ovecha haʼe umi tapicha noñemombaʼeguasúiva, ojeheʼa ha oipytyvõva Cristo ermanokuérape, ha péicha oñemoĩva Ñandejára sãmbyhy ndive. Umi kavara katu haʼe umi tapicha ndohayhuséiva Cristo ermanokuérape ha noñemoĩriva ni mbaʼevéicharõ Ñandejára goviérno ndive. Mbaʼépepa osẽta chupekuéra upéva? Jesús heʼi: “Ha koʼãva [umi kavara] ohovaʼerã pe kastígo opaʼỹvaʼerãme, ha umi imbaʼeporãva [ovechakuéra] katu ohovaʼerã pe tekove tapia g̃uarãme” (Mateo 25:31-46, VP).
16. Mbaʼépa rejapovaʼerã reikoséramo pe paraíso oupotávape?
16 Añete, Ñandejára ojepyʼapy ñanderehe! Koʼẽrõitéma omoĩta peteĩ paraíso iporãitereíva ko yvy ape ári. Reikosépa nde pe Paraísope? Upéicharamo, ehechaukákena reguerohoryha umi mbaʼe Jehová omoĩva jaikuaave hag̃ua chugui ha jaiko hag̃ua haʼe ñanerekomboʼeháicha. “Peheka Ñandejárape ikatu aja pejuhu chupe, pehenói chupe hiʼag̃ui jave. Iñañáva toheja hape vai, mbaʼe vai apoha anive oguereko iñakãme ivaíva. Pejere Ñandejára gotyo, haʼe pendeporiahuverekóta [...], haʼe niko ipojera oheja rei hag̃ua ñandéve ñane rembiapo vaikue” (Isaías 55:6, 7).
17. Mbaʼérepa naiporãi ñahaʼarõiterei jaiporavo hag̃ua mávapepa jaservíta?
17 Ani ñahaʼarõitereítei. Koʼẽrõite opáta ko múndo tuja. La Biblia oñemoñeʼẽ ñandéve kóicha: “Ani pehayhu yvypóra reko téra oĩva ipype. Ohayhúva yvypóra reko ndohayhúi pe Túvape [...] Yvypóra reko katu opa ohóvo opa hembipota vai reheve. Upe Túva rembipota ojapóva katu oikove opa árape g̃uarã” (1 Juan 2:15-17).
18. Mbaʼépa rejapovaʼerã ikatu hag̃uáicha rejerovia reikotaha Ñandejára múndo pyahúpe?
18 Koʼág̃a oñemboʼehína Ñandejára puévlope oiko hag̃ua opa ára g̃uarã pe múndo pyahúpe. Oñehekomboʼe chupekuéra ikatupyry hag̃ua espiritualménte ha heta hendáicha, ojapo hag̃ua hikuái pe paraíso. Romokyreʼỹ reiporavo hag̃ua Ñandejárape ne Mburuvicharã. Embaʼapo meme reipytyvõ hag̃ua tapichakuérape ikatu hag̃uáicha ojesalva. Upéva haʼe peteĩ tembiapo Ñandejára omotenondéva opárupi. Restudiavaʼerã la Biblia umi testigo de Jehová ndive ha péicha reikuaáta Ñandejárape, pe ojepyʼapy añetéva ñanderehe ha oipeʼaitétava opa jehasa asy. Upéicha ndehegui avei oikóta peteĩ simiénto pe múndo pyahúpe g̃uarã. Ha ikatúta rejerovia Ñandejára ndeporavóta ha reikovetaha opa ára g̃uarã pe múndo pyahu iporãmba jepévape.
[Nóta oĩva taʼanga ndive páhina 31]
Umi testigo de Jehová osẽva opa tetãgui, añetehápe ojoayhu oñoermánoicha
[Nóta oĩva taʼanga ndive páhina 32]
Oñemoĩhína peteĩ simiénto pe múndo pyahúpe g̃uarã