Lección 4

Mávapa Satanás?

Mbaʼéichapa oñepyrũrakaʼe Satanás el Diablo? (1, 2)

Mbaʼéichapa ombotavy tapichakuérape? (3-7)

Mbaʼérepa reñemoĩvaʼerã hese? (7)

1. “Diablo” heʼise peteĩ heʼíva japu vai hapicháre. “Satanás” katu heʼise enemigo, opositor. Péicha oñembohéra pe enemigo tuichave oguerekóva Ñandejára. Iñepyrũme haʼevaʼekue peteĩ ángel perfecto oikóva yvágape Ñandejára ndive. Upe rire oñembotuicha ha oipotáma oñemeʼẽ chupe adoración oñemeʼẽvaʼerã Ñandejárape. (Mateo 4:8-10.)

2. Ko ángel, Satanás, oiporu peteĩ mbói oñeʼẽ hag̃ua Eva ndive; ijapu chupe, ha upéicha Eva odesobedece Ñandejárape. Kóicha Satanás otaky Ñandejára soberaníare, pe autoridad oguerekóva opaite mbaʼe ári. Omokangy jerovia ojeguerekóva hese ogoberna porãha umi ipoguýpe oĩvape. Heʼise avei ndaiporimoʼãiha ni peteĩ yvypóra ojepytasóva Ñandejára ykére. Ojapóvo upéicha oiko chugui Ñandejára enemigo. Upévare oñembohéra chupe Satanás el Diablo. (Génesis 3:1-5; Job 1:8-11; Revelación 12:9.)

3. Satanás oñehaʼã ombotavy tapichakuérape omeʼẽ hag̃ua chupe adoración. (2 Corintios 11:3, 14.) Peteĩ mbaʼe oiporúva haʼe religión falsa. Peteĩ religión omboʼérõ japu Ñandejáragui, upéva añetehápe ojapo Satanás oipotáva. (Juan 8:44.) Umi oĩva religión japúpe ikatu oimoʼã oadoraha hendapete Ñandejárape, upevére añetehápe ojapohína Satanás oipotáva. Satanás haʼe ko “mundo ruvicha”. (2 Corintios 4:4, Versión Popular.)

4. Pe espiritismo haʼe avei peteĩ mbaʼe oiporúva Satanás oguereko hag̃ua tapichakuéra ipoguýpe. Oĩ umi ohenóiva espiritukuérape oñangareko hag̃ua hesekuéra, ombohasy hag̃ua hapichápe, oikuaa hag̃ua pe oikótava tenonderã térã ojapo hag̃ua milagrokuéra. Satanás haʼe pe aña oĩva ã mbaʼe vai rapykuéri. Jajaposérõ Ñandejára heʼíva, jahejapaitévaʼerã espiritísmogui oúva. (Deuteronomio 18:10-12; Hechos 19:18, 19.)

5. Satanás avei ombotavy hetápe pe orgullo de raza rupi ha adoración oñemeʼẽva umi organización políticape. Oĩ tapicha oimoʼãva hetã térã irráza mbaʼeguasuveha oimeraẽvagui. Pero ndaupéichai. (Hechos 10:34, 35.) Oĩ katu ohaʼarõva organización política omyatyrõ umi problema oĩva ko Yvy ári. Kóicha ojejapóvo oñemboyke Ñandejára Reino. Upe Reino añoite ikatúta oipeʼa umi problema jaguerekóva. (Daniel 2:44.)

6. Ombotavy hag̃ua yvypórape, Satanás oiporu avei deseo ikyʼáva. Jehová oipota jajei umi mbaʼe kyʼágui, oikuaágui ojapovaitaha ñanderehe. (Gálatas 6:7, 8.) Ikatu oĩ tapicha oipotáva rejapo ã mbaʼe hendive. Upevére aníke nde resarái haʼeha Satanás pe oipotáva reiko upéicha. (1 Corintios 6:9, 10; 15:33.)

7. Satanás ikatu oiporu persecución térã oposición reheja hag̃ua Jehovápe. Ikatu avei oĩ umi rehayhúva apytépe ipochýva nderechávo restudia la Biblia. Oĩne avei oñembohorýva nderehe. Pero mávapa omeʼẽ ndéve nde rekove? Satanás nemondyise ani hag̃ua reikuaave Jehovágui. Ani reheja ipuʼaka nderehe. (Mateo 10:34-39; 1 Pedro 5:8, 9.) Reñemoĩrõ Satanás rehe ikatu rembovyʼa Jehovápe ha péicha rehechauka reimeha Isoberanía ndive. (Proverbios 27:11.)

[Nóta oĩva taʼanga ndive páhina 9]

Religión falsa, espiritismo ha nacionalismo ombotavy yvyporakuérape

Eñemombarete Satanáspe reñehekomboʼe rupi Jehovágui