Lección 5

Mbaʼe propósitopa oguereko Ñandejára ko Yvýpe g̃uarã?

Mbaʼérepa ojapo Jehová ko Yvy? (1, 2)

Mbaʼére ko Yvy ndahaʼéi koʼág̃a peteĩ paraíso? (3)

Mbaʼépa oikóta umi iñañávagui? (4)

Mbaʼépa ojapóta Jesús koʼẽrõite umi hasývare?, umi itujávare?, umi omanovaʼekuére? (5, 6)

Mbaʼépa rejapovaʼerã rehupyty hag̃ua umi mbaʼe porã oútava? (7)

1. Jehová ojapo ko Yvy yvyporakuéra ovyʼa hag̃ua ipype eternamente. Haʼe oipotavaʼekue oiko hiʼári tapichakuéra horýva ha ijústova. (Salmo 115:16; Isaías 45:18.) Yvy noñehundimoʼãi arakaʼeve; opytavaʼerã eternamente. (Salmo 104:5; Eclesiastés 1:4.)

2. Ojapo mboyve yvypórape, Ñandejára oiporavo ko Yvýgui peteĩ tenda michĩmi, ojapo chugui peteĩ vyʼarenda iporãitereíva ha ohenói “jardín de Edén”. Upépe omohenda pe kuimbaʼe ha kuña ojapovaʼekue iñepyrũme: Adán ha Eva. Ñandejára oipotavaʼekue itaʼýra heta ha omyenyhẽ ko Yvy. Mbeguekatúpe ojapovaʼerãmoʼã hikuái peteĩ paraíso ko Yvy tuichakue rehe. (Génesis 1:28; 2:8, 15.)

3. Adán ha Eva hoʼa pecádope omboykégui Ñandejára ley, oikuaa porãrõ jepe. Upe haguére, Jehová omosẽ chupekuéra jardín de Edéngui, ha oñehundi pe paraíso. (Génesis 3:1-6, 23.) Upevére Jehová ndahesarái ipropósitogui ko Yvýpe g̃uarã. Haʼe opromete ojapotaha ko Yvýgui peteĩ paraíso oiko hag̃ua tapichakuéra opa ára g̃uarã. Mbaʼéichapa ojapóta Haʼe upéva? (Salmo 37:29.)

4. Oiko mboyve ko Yvýgui peteĩ vyʼa renda, oñehundipavaʼerã umi iñañáva. (Salmo 37:38.) Upéva oikóta Armagedónpe, haʼevahína Ñandejára guerra oipeʼa hag̃ua opa mbaʼe vai. Upe rire oñembotýta Satanáspe mil áñore, upéva heʼise ndopytamoʼãiha avave iñañáva ombyai hag̃ua ko Yvy. Opytáta Ñandejára pueblo añoite. (Revelación 16:14, 16; 20:1-3.)

5. Upéramo Jesucristo ogobernáta Yvy mil áñore (Revelación 20:6) ha mbeguekatúpe oipeʼáta ohóvo pecado ñane akã ha ñande retégui. Oikóta ñandehegui yvypóra perfecto, haʼehaguéicha Adán ha Eva hoʼa mboyve pecádope. Upéramo g̃uarã opáta mbaʼasy, tuja ha ñemano. Umi hasýva okueráta ha itujáva ipyahu jeýta. (Job 33:25; Isaías 33:24; Revelación 21:3, 4.)

6. Oisambyhy aja Jesús mil áñore, umi tapicha heko potĩva ombaʼapóta ojapo hag̃ua Yvy tuichakuégui peteĩ paraíso. (Lucas 23:43.) Avei hetaiterei omanovaʼekue oñemoingove jeýta oiko hag̃ua Yvy ape ári. (Hechos 24:15.) Ojapórõ Ñandejára ojeruréva chuguikuéra, opytavaʼerã oiko hag̃ua opaite ára g̃uarã ko Yvy ári. Ndojapóirõ upéicha, omanoitéta hikuái. (Juan 5:28, 29; Revelación 20:11-15.)

7. Upéicha og̃uahẽta huʼãme Ñandejára propósito ko Yvýpe g̃uarã. Hiʼãpa ndéve rehupyty umi mbaʼe porã? Upéicharamo, reikuaavevaʼerã Jehovágui ha rejapovaʼerã rehóvo pe heʼíva. Reho meme vaʼerã reunionhápe oguerekóva umi testigo de Jehová nde róga jerére. Upéva rejapórõ tuicha nepytyvõta. (Isaías 11:9; Hebreos 10:24, 25.)

[Nóta oĩva taʼanga ndive páhina 10]

Paraíso oñehundivaʼekue

[Nóta oĩva taʼanga ndive páhina 11]

Armagedón rire, ko Yvýgui ojejapóta peteĩ paraíso