Lección 6

Mbaʼépa haʼe Ñandejára Reino?

Moõpa oĩ Ñandejára Reino? (1)

Mávapa Rey upépe? (2)

Oĩpa tapichakuéra ogobernátava pe Rey ndive? Ha upéicharõ, mbovýpa? (3)

Mbaʼérepa jaikuaa ñaimeha ára pahápe? (4)

Mbaʼépa ojapóta Ñandejára Reino opa tapicháre? (5-7)

1. Jesús oĩrõ guare ko Yvy ári, omboʼe umi hendive oĩvape tojerure ñemboʼépe ou hag̃ua Ñandejára Reino. España ñeʼẽme reino heʼise gobierno omoakãva peteĩ rey. Ñandejára Reino haʼe peteĩ gobierno ijojahaʼỹva. Yvágape oĩ henda ha upégui oisambyhýta ko Yvy. Osantificáta Ñandejára réra. Pe Reino rupi ojejapóta Ñandejára oipotáva Yvy ári yvágape ojejapoháicha. (Mateo 6:9, 10.)

2. Ñandejára oprometevaʼekue Jesús haʼetaha Rey Ñandejára Réinope. (Lucas 1:30-33.) Oĩrõ guare Jesús ko Yvy ári, ohechaukavaʼekue haʼetaha peteĩ gobernante ipyʼaporãva, ijústo ha iperféctova. Ojevýrõ guare yvágape, noñepyrũi upe jave ogoberna Ñandejára Reino. (Hebreos 10:12, 13.) Og̃uahẽvo 1914, Jehová omeʼẽ Jesúspe autoridad oprometevaʼekue chupe. Upe guive, Jesús haʼe Rey ogobernáva yvágape. (Daniel 7:13, 14.)

3. Jehová avei oiporavo ko Yvýgui kuimbaʼe ha kuña iñeʼẽrendúva oho hag̃ua yvágape. Koʼã persona ogobernáta Jesús ykére, rey, juez ha sacerdóteicha. (Lucas 22:28-30; Revelación 5:9, 10.) Jesús ohenói koʼã omoirũtava chupe irréinope “rebaño michĩva”. Ohupyty hikuái 144.000. (Lucas 12:32, NM; Revelación 14:1-3.)

4. Oñepyrũvo Jesús oisambyhy, omosẽ yvágagui Satanás ha umi ángel añápe ha opoi chupekuéra ko Yvy jerére. Upévare 1914 guive hetaiterei mbaʼe vai oiko ko Yvy ape ári. (Revelación 12:9, 12.) Guerra, ñembyahýi, peste, teko aña opárupi..., umi mbaʼe ojehúva haʼe peteĩ “señal” ohechaukáva Jesús oñepyrũmaha ogoberna, ha ko sistema og̃uahẽmaha hiʼára pahápe. (Mateo 24:3, 7, 8, 12; Lucas 21:10, 11; 2 Timoteo 3:1-5.)

5. Koʼẽrõite Jesús oguerúta peteĩ juicio opavave ári, ha omboykéta chupekuéra ojapoháicha peteĩ pastor omboykérõ ovecha kavarágui. Haʼe oguerekóta “ovecha” ramo umi iñeʼẽrenduvaʼekue chupe, ha omeʼẽta chupekuéra jeikove opaʼỹva ko Yvy ári. “Kavara” katu haʼéta umi omboykevaʼekue Ñandejára Reino. (Mateo 25:31-34, 46.) Jesús ohundipa potaite umi ikavara rekóvape. (2 Tesalonicences 1:6-9.) Reikosérõ Jesús “ovecha” ramo, rehenduvaʼerã pe mensaje Reino rehegua ha rejapo upe heʼíva. (Mateo 24:14.)

6. Ko Yvy oñembojaʼo heta tetãme ha opavave oguereko peteĩ gobierno. Umi tetã oñorairõ jepi oñondive. Ñandejára Reino katu oipeʼapáta umi yvypóra gobierno ha opytáta hekovia. Haʼeñoite oisambyhýta ko Yvy tuichakue. (Daniel 2:44.) Upérõ ndaiporimoʼãvéima guerra, jejuka ha ñorairõ. Opa tapicha oikóta pyʼaguapýpe oñondivepa. (Miqueas 4:3, 4.)

7. Jesús Reinado Milenario aja, umi tapicha ojapovaʼekue Ñandejára heʼíva ohupytýta perfección ha Yvy tuichakuégui oikóta peteĩ vyʼarenda. Og̃uahẽvo huʼãme pe mil años Jesús ojapopátama Ñandejára oipotavaʼekue. Upe rire omeʼẽta pe Reino Itúvape (1 Corintios 15:24.) Mbaʼérepa neremombeʼúi Ñandejára Reino ojapótava umi ne amigokuérape ha nde rogayguápe?

[Nóta oĩva taʼanga ndive páhina 13]

Jesús gobierno guýpe ojeipáta pyʼaro ha joayhuʼỹ