Mávapa Jesucristo?

“HETA tapicha haʼeʼỹva cristiano jepe oguerovia haʼehague peteĩ kuimbaʼe arandu ha tuicha mboʼehára. Ndaipóri duda haʼehague peteĩ persona ojeguerekóva tuicha mbaʼérõ opárupi.” (The World Book Encyclopedia.) Máva rehepa ojeʼe upéva? Jesucristo rehe, omoñepyrũvaʼekue pe cristianismo. Reikuaápa nde mávapa haʼe? Mbaʼéichapa opoko haʼe nde rekovére?

Umi mbaʼe Jesús heʼi ha ojapovaʼekue oñemoĩ irundy tembiapópe oĩva Bíbliape oñehenóiva Evangelios. Oikóparaʼe añetehápe umi mbaʼe? Ojapo rire peteĩ análisis, Will Durant, historiador herakuãva ohai: “Oime rirérõ pokãmi kuimbaʼe iñaranduʼỹva, peteĩ generaciónpe, onohẽ ijeheguireínte peteĩ personalidad ikatupyry ha ñanembovyʼáva, peteĩ enseñanza ijojahaʼỹva ha oguerekóva peteĩ idea ñanemokyreʼỹva ojeguata hag̃ua hermánoicha, upéva haʼéta peteĩ milagro tuichavéva oimeraẽ otro milágrogui oñemombeʼúva Evangeliokuérape”.

Upéicharõ jepe, hetaiterei tapichápe g̃uarã, Orientegua ha ambue tendágui avei, Jesucristo haʼe peteĩ extraño. Ikatu oguerovia hikuái oikovehague, pero noimoʼãi ikatuha oguereko relación hekove rehe. Otro katu ndoikuaaséi chugui mbaʼeve ohechágui umi mbaʼe ojapovaʼekue umi heʼíva ijehe cristianoha. “Opoivaʼekue hikuái peteĩ bomba atómica Nagasaki ári, peteĩ ciudad oguerekóva hetave cristiano oimeraẽ otro ciudad Japónpe oĩvagui”, ikatu heʼi umi japonpegua.

Pero, ñambojánepa peteĩ médicore pe ipaciente mbaʼasýre haʼe ndojapóirõ pe médico heʼivaʼekue chupe? Ndaikatúi upéva. Heta árama umi heʼíva ijehe cristianoha ndoiporúi pe Jesús omboʼevaʼekue omyatyrõ hag̃ua umi problema tapiagua. Upévare, Jesúspe remboyke rangue rehechágui pe ojapóva umi heʼíva ijehe cristianoha, pero ndojapóiva iñeʼẽ, mbaʼéguipa ndete voi nereñehaʼãi reikuaave chugui? Restudiavaʼerã la Biblia reikuaa hag̃ua mávapa añetehápe Jesús ha mbaʼéicha ikatu haʼe omoporãve nde rekove.

Jesús consejo: jajoayhu

Jesús haʼevaʼekue tuicha mboʼehára oikovaʼekue Palestínape ojapóma haimete dos mil años. Saʼi ojekuaa chugui imitãrõ guare (Mateo, caps. 1, 2; Lucas, caps. 1, 2). Ombotýrõ guare 30 años, haʼe oñepyrũvaʼekue pe ministerio ‘omeʼẽvo testimonio pe añeteguáre’ (Juan 18:37; Lucas 3:21-23). Umi irundy kuimbaʼe ohaivaʼekue Jesús rekove rehegua omombeʼu pe haʼe ojapovaʼekue iministério públicope umi tres año y medio aja, haʼe omano mboyve.

Iministério aja, Jesús omombeʼu hemimboʼekuérape mbaʼépa pe ikatúva omyatyrõ heta problema oguerekóva hikuái hekovépe. Mbaʼépa upéva? Joayhu. Peteĩ discúrsope ojekuaáva opárupi ha oñehenóiva Sermón del Monte, Jesús omboʼevaʼekue hemimboʼekuérape ohayhu hag̃ua opavave hapichápe. Heʼivaʼekue: “Upévare, pejapo pende rapicháre peẽ peipotaháicha ojejapo pende rehe” (Mateo 7:12). Ko princípiope oñehenói Regla de Oro. Umi ‘tapicha’ Jesús imanduʼavaʼekue apytépe oike umi enemigo jepe. Pe sermónpe Jesús heʼi: “Pehayhu umi pende rehe ijaʼeʼỹvape, ha peñemboʼe umi pene mbohasa asývare” (Mateo 5:44). Omyatyrõnepa upeichagua mborayhu heta problema koʼág̃a jahasáva? Pe guía hindú Mohandas Gandhi oimoʼãvaʼekue ikatuha. Heʼivaʼekue: “Jajapo vove Cristo omboʼehaguéicha ko Sermón del Móntepe, ikatúta ñamyatyrõmba [...] problemakuéra [...] oĩva ko múndope”. Ojejapórõ pe Jesús omboʼevaʼekue mborayhu rehegua, ikatu oñemyatyrõ umi mbaʼe vai ohasáva yvyporakuéra.

Ohechauka imborayhu

Jesús ojapovaʼekue pe omboʼehaguéicha. Omotenondevaʼekue tapichakuéra remikotevẽ ijupe rangue, ha ohechauka mborayhu hembiapo rupi. Peteĩ ára, haʼe ha hemimboʼekuéra oñatende heta tapicháre ha upévagui ndaikatúi ni okaru. Jesús ohecha hemimboʼekuéra oikotevẽha ‘opytuʼumi’, upévare oho hikuái peteĩ hendápe oĩ hag̃uáme haʼekuéra añónte. Pero umi tapichakuéra katu oñemotenonde ha ohaʼarõma chupekuéra upépe. Mbaʼépa jajapóneraʼe ñaime rire upe situaciónpe? Jesús “oiporiahuvereko chupe kuéra” ha “oñepyrũ omboʼe chupe kuéra heta mbaʼére” (Marcos 6:30-34). Pe poriahuvereko mbarete oñandúva omomýi chupe oipytyvõ hag̃ua tapichakuérape.

Pe pytyvõ omeʼẽvaʼekue Jesús tapichakuérape ndopytaivaʼekue enseñanza espiritual añóme. Haʼe avei omeʼẽ pytyvõ heta mbaʼe oñekotevẽhápe. Por ejemplo, omongaruvaʼekue 5.000 kuimbaʼépe, ha avei kuña ha mitã, ohenduvaʼekue chupe pyhare peve. Upe rire omongaru avei 4.000-pe. Pe ñepyrũguápe oiporu cinco pan ha mokõi pira, ha upe rireguápe siete pan ha mbovymi piraʼi (Mateo 14:14-21; 15:32-38; Marcos 6:35-44; 8:1-9). Haʼevaʼekuépa milagro koʼã mbaʼe? Añetehápe, Jesús ojapovaʼekue milagro.

Haʼe omongueravaʼekue avei heta hasývape. Omonguera ohechaʼỹvape, ikarẽvape, ileprósova ha ohenduʼỹvape, ha omanovaʼekuépe jepe omoingove jey (Lucas 7:22; Juan 11:30-45).

Peteĩ árape, peteĩ leproso ojerure asy chupe: “Nde reipotárõ che mongueráne che mbaʼasýgui”. Mbaʼépa ojapo Jesús? “Opoko hese ha heʼi chupe: Aipota. Ekuera!” (Marcos 1:40, 41.) Jesúspe hiʼãiterei oiporopytyvõ. Koʼã milagro rupi ohechauka mborayhu oguerekóva umi ohasa asývare.

Hasýpa jaguerovia hag̃ua koʼã mbaʼe? Opavavenunga milagro Jesús ojapovaʼekue tapichakuéra rovake. Umi ndaijaʼéiva ha oñeʼẽ vai mantéva hese, umíva jepe ohechakuaa ojapohague milagro (Juan 9:1-34). Avei, koʼã milagro oguerekovaʼekue peteĩ propósito. Oipytyvõ heta tapichápe ohechakuaa hag̃ua Ñandejára ombouhague chupe (Juan 6:14).

Peteĩ examen mbykymi Jesús omboʼe ha ojapovaʼekuégui ñanemomýi jahayhuve hag̃ua chupe ha jahechaukase hag̃ua avei mborayhu haʼe oguerekóva. Upéicharõ jepe, ndahaʼéi kóicha año ikatúva opoko ñande rekovére. Haʼe ndahaʼeivaʼekue peteĩ mboʼehára guasúnte omboʼéva joayhúgui. Omombeʼu avei oikomahague Ñandejára Raʼy peteĩete ramo ou mboyve ko Yvy ape ári (Juan 1:14; 3:16; 8:58; 17:5; 1 Juan 4:9). Humánoicha oiko rire ko Yvy ape ári, haʼe oikove gueteri ohóvo, ha upéva koʼýte ombotuichave chupe ñandéve g̃uarã. La Biblia ohechauka oñemoingove jey hague chupe, ha koʼág̃a oguapymaha Réicha Ñandejára Réinope (Revelación [Apocalipsis] 11:15). Jesús heʼivaʼekue: “Ha upe jeikove opaʼỹva niko kóva: Ta nde kuaa ndéve Tupã añete ha peteĩetéva, ha Jesucrístope, pe nde rembou vaekuépe” (Juan 17:3; 20:31). Añetehápe, jaikuaavérõ jahávo Jesucrístogui ikatúta jahupyty tekove opaʼỹva peteĩ Paraísope. Mbaʼéichapa ikatúta upéva? Mbaʼérepa ndereikuaavéi chugui ha rehecha mbaʼéicha “pe Cristo mborayhu [...] [ñane] mongyreʼỹ” jajapo hag̃ua haʼe ojapo haguéicha? (2 Corintios 5:14, Jesucristo Marandu Porã.) Testigos de Jehová ovyʼaitereíta nepytyvõ haguére (Juan 13:34, 35).

Ñandejára Ñeʼe ojeporúva oñerenohẽ Sociedad Bíblica Paraguaya traduccióngui. Upeichaʼỹramo oñemombeʼu pe texto bíblico ykére mbaʼe traducciónpa ojeporu.