Eñeʼẽ kyreʼỹme

IPORÃRAMO jepe pe jaʼeséva, nañañeʼẽiramo kyreʼỹme, ikatu jajukaite la ñande diskúrso. Umi nerendúva noñatendesemoʼãi nderehe reñeʼẽramo kaigue guasu térã rekumpli hag̃uánte. Enterove, tahaʼe haʼéva ñande lája térã ñane kostúmbre, ikatu ñamehorave ko mbaʼépe.

Eñeʼẽ con sentimiénto. Jesús oñeʼẽrõ guare peteĩ kuña samaritána ndive heʼi chupe tekotevẽha ojeadora Jehovápe “espíritu sánto poguýpe ha añeteguápe” (Juan 4:24). Ñamombaʼeguasu vaʼerã Jehovápe jaagradeségui chupe ñande pyʼaite guive, ha haʼe heʼihaichaite ñandéve Iñeʼẽme. Jahayhu ha jaagradeséramo Jehovápe ñane korasõ mbytete guive, upéva ojekuaa umi mbaʼe jaʼévare. Ha ndahaʼéi upéichante jahechaukáva, síno kyreʼỹme voi ñamombeʼuse Jehová rembipota ha upéva ojekuaa ñande hésto, séña ha ñande vos rehe.

Oĩ diskursánte ohayhúva Jehovápe ha ogueroviáva umi mbaʼe heʼíva iñimportanteha, péro lomímonte ikaigue la omeʼẽ lája idiskúrso. ¿Mbaʼérepa upéva? Pórke ikyreʼỹ hag̃ua peteĩ diskúrso ndahaʼéi rejeprepara porãnte vaʼerã ha oĩma. Tekotevẽ revivi la nde diskúrso ha umi mbaʼe eréva osẽ vaʼerã ne korasõite guive. Ñamoĩ chupe oñemeʼẽha ndéve peteĩ diskúrso ha reñeʼẽ vaʼerã Jesús sakrifísiore. ¿Mbaʼéichapa rejapóta? Ndahaʼéi remombeʼúnte vaʼerã la Biblia heʼíva, síno reñeʼẽ lájare ojekuaa vaʼerã nde pyʼaite guive reagradeseha Jehovápe upe sakrifísiore. Avei rentende vaʼerã mbaʼérepa tuichaiterei mbaʼe upe ojapo vaʼekue hikuái. Upearã rejepyʼamongeta vaʼerã mbaʼeichaitépa remombaʼe ha reagradese Jehová ha Jesúspe. Repensa vaʼerã hetaite mbaʼe porã ikatútava ojehupyty pe sakrifísio rupive, por ehémplo: yvyporakuéra oikovéta opa ára g̃uarã peteĩ hardín neporãmba jepévape, ha ohupytýta perfeksión, upérõ ndaiporimoʼãvéima hasýva ha opavave ovyʼajoáta. Rejapóvo nde diskúrso ojekuaa vaʼerã koʼãichagua sentimiénto osẽha ne korasõite guive.

La Biblia omombeʼu mbaʼépa ojapo vaʼekue pe mboʼehára leipegua ha saserdóte isrraelíta, Esdras: “Oprepara ikorasõ ostudia ha ojapo hag̃ua Jehová Léi heʼíva. Avei omboʼe hag̃ua Israélpe umi mandamiénto ha umi mbaʼe hekopeguáva” (Esd. 7:10). Rejapóta jave ne asignasión ndahaʼéi rehekánte vaʼerã informasión, síno reprepara vaʼerã avei ne korasõ. Péicha umi mbaʼe eréva osẽta nde pyʼaite guive ha rejapóta nde diskúrso con sentimiénto, upéva oipytyvõta umi nerendúvape ohayhuve hag̃ua pe añetegua.

Epensa umi nerendúvare. Nde diskúrso ikyreʼỹve hag̃ua, tekotevẽ nde rentende porã mbaʼérepa iñimportánte pe informasión umi nerendúvape g̃uarã. ¿Mbaʼéichapa reikuaáta upéva? Ani rehekánte informasión, síno rejerure vaʼerã Jehovápe tanepytyvõ rehechakuaa hag̃ua mbaʼéichapa ikatúta reipytyvõ umi nerendúvape (Sal. 32:8; Mat. 7:7, 8). Epensa porã vaʼerã mbaʼérepa tekotevẽ ohendu hikuái upe informasión, ha mbaʼépepa ideprovéchota chupekuéra. Avei ekalkula mbaʼépa nde ikatu rejapo remog̃uahẽ porãve hag̃ua pe informasión umi nerendúvape.

Rembaʼapo vaʼerã nde diskúrsore ndegusta peve pe opyta lája, péicha nekyreʼỹvéta ha remeʼẽsevéta ne asignasión. Jepe otoka ndéve peteĩ téma ikonosidoitereímava, siémpre oĩ peteĩ púnto ikatúva remyesakãve térã remombeʼu mbaʼéichapa ideprovécho ñandéve. Iñimportánte rejepyʼamongeta koʼã porandúre: ¿Reipytyvõtapa umi nerendúvape oñemoag̃uive hag̃ua Jehováre térã, oagradeseve hag̃ua chupe umi mbaʼe porãita omeʼẽvare? ¿Remombaretétapa chupekuéra oñemoĩ hag̃ua ko múndore? Rehechakuaáramo iñimportantetereiha umi informasión nekyreʼỹvéta.

¿Ha otokáramo ndéve lektúra? Relee hag̃ua kyreʼỹme ndahaʼéi repronunsia porãnte vaʼerã káda palávra ha relee syryry. Tekotevẽ restudia porã pe párte otokáva ndéve. Por ehémplo, oñemeʼẽramo ndéve relee hag̃ua la Biblia, reheka vaʼerã informasión omyesakãva upe párte. Estudiáke rentende porã meve; ejepyʼamongeta mbaʼéichapa pe informasión nepytyvõ ha mbaʼépepa ideprovéchota umi nerendúvape. Ha ág̃a relee vove reñehaʼã vaʼerã remog̃uahẽ pe informasión haʼekuéra ontende hag̃uáicha.

¿Mbaʼéicha ikatu rejeprepara predikasionrã? Rerrepasa vaʼerã mbaʼe témarepa reñeʼẽta ha mbaʼe téxtopa reiporúta. Repensa vaʼerã avei mbaʼépa oipyʼapy umi héntepe. Ekalkulamína koʼã mbaʼe: ¿Oĩpa peteĩ notísia ipyahúva ikatúva reiporu? ¿Mbaʼe provléma ombohovái jepi umi hénte? Rejeprepara porãramo katuete nekyreʼỹvéta repredika hag̃ua.

Diskúrso oporomokyreʼỹva. Rejapo jave nde párte, nde vos ha nde rováre ojekuaáta oimépa nekyreʼỹ hína. Ojekuaa vaʼerã nderehe reĩha segúro la erévare, péro ani avei rehasa la rrája, cháke péicha umi nerendúva ikatu opensa remandaseha chupekuéra.

Oĩ diskursánte ohasámava la rrája, ikyreʼỹetereíma voi ha umi hénte ojesareko hesénte oñatende rangue pe mensáhere. Péro ótro diskursánte katu hiʼotĩeterei, ha umívape ofalta ikyreʼỹmie. Upéicharõ, iñimportánteramo jepe nekyreʼỹ rejapo vaʼerã hendaitépe.

Oĩ peteĩ ñeʼẽnga heʼíva: “Topehýi pyaʼe ova”. Upeichaite avei oikóta nekyreʼỹramo, umi nerendúva ikyreʼỹta avei. Reñehaʼãramo remaña umi nerendúvare ha reñeʼẽ direktoite chupekuéra, igustoitereíta la nde párte. Rehejáramo pe espíritu sánto nepytyvõ, kyreʼỹme reñeʼẽta ha remomýita umi nerendúvape ojapo hag̃ua la Biblia heʼíva (Hech. 18:24, 25; Rom. 12:11).

Odepende pe informasiónre. Reñatende vaʼerã ani oñepyrũ guive opa peve la nde diskúrso reñeʼẽ kyreʼỹeterei ha redesahusiapa umi nerendúvape. Rejapóramo péicha mbaʼevépe jey ndaideprovechomoʼãi pe eréva. Tekotevẽ rekambia mimi representa lája nde diskúrso; eñatende mbaʼe pártepepa nekyreʼỹve vaʼerã ha moõpa tekotevẽ trankilomie reñeʼẽ. Péro ani reñeʼẽ avei kaigue guasu, cháke péicha umi nerendúva opensáta naneinteresaiha la ne téma. Añetehápe rejeporekáramo retopáta heta púnto iñinteresánteva, upéicharamo jepe umívagui reiporavo vaʼerã mávapa rerresaltáta.

Tekotevẽ nekyreʼỹve reñeʼẽta jave umi púnto prinsipál rehe, térã reg̃uahẽ jave umi párte iñimportantevéva nde diskúrsope, ¿mbaʼérepa? Ikatu hag̃uáicha opyta porã pe informasión umi nerendúva akãme. Ontende porã rire pe informasión, ikatúma remokyreʼỹ chupekuéra osegi hag̃ua umi konsého. Upéicharõ, osẽ porã hag̃ua ndéve ndahaʼéi oimehápe reínte nekyreʼỹ vaʼerã, síno odepende hína pe informasiónre.