Eñeʼẽ rejapoháicha jepi normálmente

REÑEʼẼRAMO normál porã, reñeʼẽháicha jepi voi káda día, umi nerendúva ojeroviáta nderehe. Epensamína, ¿rejeroviátapa peteĩ persónare omoĩva peteĩ máskara oñeʼẽ jave? Iporãvéramo jepe pe máskara, lomímonte redeskonfiáta hese. Upéicharõ, reñehaʼã rangue rejogua ótrope térã rekambiapa la nde vos reñeʼẽ jave, ikuentave reñeʼẽ ha reñekomporta rejapoháicha normálmente.

Péro upéva ndeʼiséi nderejepyʼapýi vaʼerãha mbaʼevére ha reñeʼẽtaha péicha péichante. Upéva rangue reñehaʼã vaʼerã reñeʼẽ porã ha repronunsia hendaitépe umi palávra. Ñande kristiáno tekotevẽ jajeporta ha ñañeʼẽ hekópe opa lugárpe. Péro reñeʼẽ jave ndovaléi ndeserioiterei ni rexahera rejechaukase rupínte ótrope.

Reime jave predikasiónpe. ¿Nenerviósopa reñeʼẽta jave peteĩ persónandi predikasiónpe? Entéronte voi ñanenerviosoʼimi péicha jave, péro oĩ umi hasypeterei oñetrankilisáva. Ha ñanenervióso jave ñañepyrũma jachuchupa ñañeʼẽ jave, ndajapytái peteĩ hendápe, hoʼapa la jarekóva ñande pópe, ha amo ipahápe nosẽvéima ñandéve mbaʼeve.

¿Mbaʼérepa ñanenervióso jepi japredikáta jave? Ikatu jajepyʼapyeterei mbaʼépa opensáta ñanderehe pe ogajára térã osẽ porãtapa ñandéve ñane presentasión. ¿Mbaʼépa ikatu rejapo nenerviosoitereíramo resẽta jave predikasiónpe? Rejeprepara porã vaʼerã ha eñemboʼe Jehovápe nde pyʼaite guive (Hech. 4:29). Iporãta avei rejepyʼamongetáramo mbaʼépa ojehupyty pe predikasión rupive: japredikávo jahechauka Jehová oiporiahuverekoha umi héntepe, ha ñainvita chupekuéra oiko hag̃ua opa árare peteĩ hardín neporãvape. Repensa vaʼerã avei mbaʼeichaitépa umi hénte tekotevẽ ohendu pe marandu porã.

Nemanduʼa vaʼerã avei umi hénte orekoha derécho odesidívo nerendútapa térãpa nahániri. Jesús ningo ndoovligái vaʼekue avavépe ohendu hag̃ua chupe (Mat. 24:14). Jepe umi hénte nanerenduséi, nde rekumplíma hína la nde párte: ndaikatuvéima heʼi hikuái avave ndopredikái hague chupekuéra. Nemanduʼáke Jehová ojevaléma hague nderehe reikuaauka hag̃ua hembipota, ha upéva la ovaléva. Péro oĩramo nerenduséva, ¿mbaʼéichapa reñeʼẽ vaʼerã? Ikatu hag̃uáicha igústo la eréva ha reñeʼẽ normál porã, repensa vaʼerã mbaʼépa oikotevẽ umi nerendúva ha ani rejepyʼapyeterei ndejehe.

Repredika jave reñeʼẽ vaʼerã rejapoháicha normálmente, péicha umi hénte oñeñandu porãta avei ha nerendusevéta. Reho rangue rediskursea umi héntepe, reñehaʼã vaʼerã reñemongeta hendivekuéra. Iporã nderory ha ereko enkuénta pe ogajára heʼíva, péicha rehechaukáta reñeinteresaha hesekuéra.

Rerekóta jave párte kongregasiónpe. Reñeʼẽta jave heta hénte renondépe iporãta avei reñeʼẽ rejapoháicha normálmente nde rapichándi. (Péro tekotevẽramo ikatu reñeʼẽ hatãmie nerendu hag̃uáicha umi hénte.) Reskrivíramo palávra por palávra nde diskúrso térã ereséramo de memória, katuete rejepyʼapýta rejavýramo g̃uarã ha nenerviosovéta. Iñimportánteramo jepe reiporavo umi palávra reiporútava, repensaitereíramo umívarente rekambiapáta la nde vos ha umi mbaʼe eréva nosẽmoʼãi nde pyʼaite guive. Iporã ningo repensa reñeʼẽ mboyve, péro ani rejepyʼapy umi palávrarente, síno mbaʼe idéapa remog̃uahẽse hína.

Koʼã konsého jahecha vaʼekue, iporãta avei resegi ojejapótaramo ndéve entrevísta kongregasiónpe. Tekotevẽ rejeprepara porã ha ani rememorisa umi mbaʼe erétava, eñehaʼãnte eñeʼẽ rejapoháicha normálmente, péicha umi mbaʼe eréva osẽta ne korasõite guive ha opokóta umi nerendúva korasõre.

Ideprovécho hag̃ua ñandéve umi konsého oĩva ko lívrope, tekotevẽ jajapo hendaitépe ha ani jahasa la rrája. Por ehémplo reñeʼẽ ha relee porã vaʼerã, péro ani repronunsia porãitereiségui rekambiapa la nde vos. Igústo hag̃ua la nde diskúrso rejapo vaʼerã umi séña ha hésto, péro ani oimehápe rei térã natekotevẽihápe. Rehecha vaʼerã moõpa tekotevẽ reñeʼẽ hatãmie, péro ani redesahusiapa hag̃uáicha umi nerendúvape. Reiporavo vaʼerã mbaʼe pártepa ikatu remoĩve sentimiénto nde diskúrsope, ani reñepyrũ guive opa peve voi. Ani nderesarái iporãha reñeʼẽ kyreʼỹme nde diskúrso aja. Péro opa koʼã mbaʼe ndovaléi rejapo reñembotuicha hag̃ua, síno reporomboʼe hag̃ua hekoitépe.

Heta héntepe ogusta voi oñeʼẽ hekoitépe tahaʼe oñemongeta jave hapichándi térã ojapo jave diskúrso, péro ótro katu ndojepyʼapyguasúi umi palávrare ha oñeʼẽ normál porãnte. Añetehápe la iñimportánteva hína ñañeʼẽ ha ñañekomporta porã káda día. Oiméramo nde rejepokuaa jepi rejapo péicha, rereko jave asignasión osẽ porãta avei ndéve normál porã.

Releéta jave kongregasiónpe. Osẽ hag̃ua ndéve nde lektúra reñeʼẽháicha jepi voi normálmente, heta reñehaʼã vaʼerã. Tekotevẽ redistingi porã umi idéa prinsipál ha rehecha mbaʼéichapa oñemyesakã ohóvo pe informasiónpe. Rentende porã vaʼerã umi púnto prinsipál, péicha ndereleemoʼãi palávra por palávra. Reheka vaʼerã diksionáriope umi palávra nerentendéiva. Epraktika nde lektúra en vos álta elee syryry peve, eñehaʼã elee por fráse ha toñentende porã la eréva. Estudia porã pe informasión, péicha ikatúta relee kyreʼỹme, pe reñeʼẽháicha jepi voi normálmente. Péva hína la ojehupytyséva ko leksiónpe.

Heta mbaʼe otokátava ndéve relee oñeg̃uenohẽ ñane puvlikasióngui. Ikatu otoka ndéve relee la Biblia ko eskuélape, repredika jave térã rejapo jave diskúrso. Oĩ ermáno oleéva rrevísta Ñemañaha oñehesaʼỹijo jave kongregasiónpe, térã ótra puvlikasión ojejapo jave Ñandejára Ñeʼẽ Ñehesaʼỹijo, ha umi ermáno ikatupyrývape otoka jepi ojapo diskúrso aty guasuhápe. Oiméramo pe pártepe oĩ téxto vívliko térã fráse peteĩ persóna heʼi vaʼekue, péicha jave ojejapo vaʼerã peteĩ kámbio de tóno. Reñatende vaʼerã ani rexahera, reñehaʼã vaʼerã relee con sentimiénto péro normál porãnte.

Osẽ porã hag̃ua ndéve nde lektúra, reñeʼẽ vaʼerã rejapoháicha jepi voi normálmente. Ha ani rexahera ni rejoguase ótrope.