Emokyreʼỹ umi nerendúvape oheka hag̃ua umi téxto

ÑANDE jaipota umi hénte oikuaa la Biblia heʼíva. Pe mensáhe jaikuaaukáva ha umi mbaʼe ñamboʼéva oñemopyenda vaʼerã Ñandejára Ñeʼẽme. Ndovaléi ñamboʼe mbaʼeve ñandejehegui reínte, síno ñaipytyvõ vaʼerã ñande rapichápe ohechakuaa hag̃ua umi mbaʼe ñamboʼéva oĩha la Bíbliape.

Predikasiónpe. Jajeprepara jave ñasẽ hag̃ua japredika iporãta jaiporavóramo peteĩ térã mokõi téxto jalee hag̃ua. Ha ñapresentátaramo peteĩ puvlikasión, jaheka vaʼerã peteĩ téxto ohóva hese. Pórke Ñandejára Ñeʼẽ katuete opokovéta umi persóna korasõre umi mbaʼe ñande jaʼévagui. Ha ndaijáiramo ñandéve jalee, ikatu ñamombeʼu mbaʼépa heʼi peteĩ téxto. Jesús tiémpope naentéroi oreko umi Eskritúra Evréa, upéicharamo jepe haʼe ha ijapostolkuéra heta vése omombeʼu mbykymi mbaʼépa heʼi umíva. Upévare reñehaʼãmbaite vaʼerã reaprende de memória umi téxto ojeporuvéva ha eiporu repredika jave, ha ndaikatúiramo relee, emombeʼu jepe mbykymi mbaʼépa heʼi.

Relee jave la Biblia, remoĩ vaʼerã ikatu hag̃uáicha pe ogajára ohecha avei. Ha oleéramo ivívliape voi, upéva koʼýte oipytyvõvéta chupe.

Péro nemanduʼa vaʼerã avei oĩha Biblia ndojetradusiporãiva algúna párte, upévare oĩ umi mbaʼe noñemoĩriva evréo ha griégope oĩ haguéicha. Por ehémplo heta Bíbliape noñemoĩri Jehová réra, noñemyesakãi mbaʼépa oiko umi omanóvagui, ha noñemombeʼuporãi Ñandejára rembipota ko yvýpe g̃uarã. Rehechauka hag̃ua noĩporãiha umi párte, ikatu rehecha mbaʼépa heʼi umi ótra traduksión ymave guare. Upearã ikatu nepytyvõ pe lívro Razonamiento a partir de las Escrituras. Upépe oñemyesakã jave peteĩ téma, oñemoĩ heta téxto oñeguenohẽva diferénte Bíbliagui. Umi persóna omombaʼéva pe añetegua ohechakuaáta iñimportanteha koʼã mbaʼe.

Umi rreunión ojejapóva kongregasiónpe. Opavavépe oñemokyreʼỹ vaʼerã oheka hag̃ua ivívliape umi téxto ojeleétava, ¿mbaʼérepa? Koʼã mbohapy mbaʼére: 1) upéva oipytyvõ umi ermánope oñekonsentra porãve hag̃ua rreunionhápe, 2) pe informasión og̃uahẽvéta chupekuéra olee rupi ivívliape voi, ha 3) ohechauka umi ou ramóvape opa mbaʼe jagueroviáva oñemopyendaha la Bíbliape.

Umi ermáno katuete ohekáta nendive umi téxto releétava remokyreʼỹramo chupekuéra ojapo hag̃ua upéva. Por ehémplo, ikatu ere umi nerendúvape oavri hag̃ua ivívlia ha tolee nendive peteĩ téxto.

Ndete reiporavo vaʼerã mbaʼe téxtopa releéta. Iporãvéta releéramo umi omopyendáva umi púnto iñimportantevéva nde diskúrsope. Netiémporamo, ikatu avei relee ótro téxto nepytyvõtava upearã.

Releéta jave peteĩ téxto, rehaʼarõ vaʼerã umi nerendúva otopa raẽ, ha upéi ae elee. Releéramo pyaʼeterei haʼekuéra otopa mboyve, sapyʼaitépe ikaiguepáta hikuái ha ndohekamoʼãvéima nendive umi téxto.

Ani hag̃ua ohasa hetaiterei tiémpo rehaʼarõ aja ojetopa umi téxto, eréma vaʼerã voi mbaʼe kapítulo ha versíkulopa ojeleéta. Jepe mbykyvéta pe informasión rehesaʼỹijótava, ideprovechoitereíta umi nerendúvape remeʼẽramo chupekuéra tiémpo oheka hag̃ua umi téxto.